MGA dekada antes pa, iginpasamwak na han mga estudyante han Biblia nga magkakaada importante nga mga hitabo ha 1914. Ano ini nga mga hitabo, ngan ano nga ebidensya an nagtutudlok ha 1914 sugad nga importante gud nga tuig?

Sugad han iginrekord ha Lukas 21:24, hi Jesus nagsiring: “An Jerusalem pagtatamakan han mga Hentil, tubtob ha katuman han mga  panahon han mga Hentil.” An Jerusalem amo an kapital nga syudad han Judio nga nasud—an lugar nga tikang didto nagmando an katulinan han kahadian tikang ha pamilya ni Hadi David. (Salmo 48:1, 2) Kondi, ini nga kahadian naiiba ha mga lider han mga nasud. Liningkod hira ha “trono ni Jehova” sugad nga mga representante han Dios mismo. (1 Kronikas 29:23) Tungod hito, an Jerusalem usa nga simbolo han pagmando ni Jehova.

Kondi, paonan-o ngan kakan-o nagtikang ‘pagtamakan han mga Hentil’ an pagmando han Dios? Nahitabo ini han 607 A.K.P. han an Jerusalem ginsakop han mga Babilonyahanon. Nabakante an “trono ni Jehova,” ngan nautod an katulinan han kahadian nga nagtikang kan David. (2 Hadi 25:1-26) Magpapadayon ba ha waray kataposan ini nga ‘pagtamak’? Diri, kay an tagna ni Esekiel nagsiring mahitungod han kataposan nga hadi han Jerusalem nga hi Sedekia: “Hukasa an mitra, ngan kuhaa an korona. . . . Ini liwat mawawaray na, ngada nga hiya umabot kan kanay katadongan [“legal nga katungod,” NW] amo ini; ngan akon ihahatag ini ha iya.” (Esekiel 21:26, 27) An usa nga may “legal nga katungod” ha korona ni David amo hi Kristo Jesus.  (Lukas 1:32, 33) Salit matatapos an ‘pagtamak’ kon magin Hadi na hi Jesus.

San-o mahitatabo iton importante nga hitabo? Ipinakita ni Jesus nga an mga Hentil magmamando ha sulod hin itinanda nga panahon. An asoy ha Daniel kapitulo 4 nagsusumat han yawi ha paghibaro kon mationan-o kahilawig magpapadayon ito nga panahon. Iginsasaysay hito an matagnaon nga inop ni Hadi Nabukodonosor han Babilonya. Hinkit-an niya an usa ka daku nga puno nga kahoy nga ginpulod. An tuód hito diri makakatubo tungod kay ginbutok ito hin puthaw ngan hin tumbaga. Usa nga anghel an nagsiring: “Palabya ha iya an pito nga panahon.”—Daniel 4:10-16.

Ha Biblia, an mga puno nga kahoy ginagamit usahay ha pagrepresentar han pagmando. (Esekiel 17:22-24; 31:2-5) Salit an pagpulod han simboliko nga puno nga kahoy nagrirepresentar kon paonan-o mauutod an pagmando han Dios, nga an kahadian ha Jerusalem amo an Iya mga representante. Kondi, an bisyon nagpahayag nga ini nga ‘pagtamak ha Jerusalem’ temporaryo la—ha sulod hin “pito nga panahon.” Mationan-o kahilawig ito nga panahon?

Ipinapakita han Pahayag 12:6, 14 nga an tulo ngan tunga nga panahon katugbang han “usa ka yukot duha ka gatos ngan kaunman ka adlaw.” Salit an “pito nga panahon” magigin doble an kahilawig, o 2,520 ka adlaw. Kondi an Hentil nga mga nasud waray umundang ha ‘pagtamak’ ha pagmando han Dios paglabay hin 2,520 la ka adlaw katapos han kabungkagan han Jerusalem. Matin-aw, kon sugad, nga ini nga tagna naghihisgot hin mas hilawig pa gud nga peryodo han panahon. Kon igbabasar ha Numeros 14:34 ngan Esekiel 4:6, nga nag-uunabi han “kada adlaw para ha usa ka tuig,” an “pito nga panahon” kon sugad, may kahilawig nga 2,520 ka tuig.

An 2,520 ka tuig nagtikang han Oktubre 607 A.K.P., han ginbungkag an Jerusalem han mga Babilonyahanon ngan an hadi ha katulinan ni David ginpabaya ha iya trono. An panahon natapos han Oktubre 1914. Hito nga panahon, natapos an itinanda nga “mga panahon han mga Hentil,” ngan ginpalingkod hi Jesu-Kristo sugad nga langitnon nga Hadi han Dios. *—Salmo 2:1-6; Daniel 7:13, 14.

 Sugad la han igintagna ni Jesus, an iya “pagkanhi” o presensya sugad nga langitnon nga Hadi gintitigamnan hin dagku nga mga hitabo ha kalibotan—girra, gutom, mga linog, mga peste. (Mateo 24:3-8; Lukas 21:11, NW) An sugad nga mga hitabo marig-on nga nagpapamatuod nga an 1914 tinuod nga nagtigaman han katukod han langitnon nga Ginhadian han Dios ngan han tinikangan han “kataposan nga mga adlaw” hinin presente nga maraot nga sistema han mga butang.—2 Timoteo 3:1-5.