PAGTIKANG HA PAKIISTORYA
LEKSYON 1
Pagpakita hin Interes
Prinsipyo: “An gugma . . . diri nagbibiling han kalugaringon la nga kaopayan.”—1 Cor. 13:4, 5.
An Ginbuhat ni Jesus
1.Kitaa an VIDEO, o basaha an Juan 4:6-9. Katapos, batona an masunod nga mga pakiana:
-
Ano an gin-obserbaran ni Jesus parte ha babaye antes hiya magtikang pakiistorya?
-
Hi Jesus nagsiring: “Tagi ako hin maiinom.” Kay ano nga epektibo ini nga paagi han pagtikang ha pakiistorya?
Ano an Aton Mahibabaroan kan Jesus?
2. Mas daku an posibilidad nga magkakaada maopay nga pakiistorya kon titikangan ta ito hin topiko nga naruruyagan han aton kaistorya.
Subara hi Jesus
3. Magin andam pag-adjust. Ha pagtikang ha pakiistorya, ayaw ipirit an topiko nga imo igin-andam. Pagtikang pinaagi hin topiko nga ginhuhunahuna nira yana. Pakianhi an imo kalugaringon:
-
‘Ano an aada ha balita?’
-
‘Ano an gin-iistoryahan han akon mga amyaw, katrabaho, o kaklase?’
4. Magin maobserbaron. Pakianhi an imo kalugaringon:
-
‘Ano an iya ginbubuhat? Ano an posible nga iya ginhuhunahuna?’
-
‘Ano an iginsusumat ha akon han iya pamado, hitsura, o balay parte han iya gintotoohan o kultura?’
-
‘Ini ba an tama nga panahon nga makiistorya ha iya?’
5. Pamati.
-
Ayaw pagyinakan hin damu.
-
Ipaabat ha iya nga puydi niya isumat an iya ginhuhunahuna. Kon angayan, pagpakiana.
