1, 2. (a) Ano an baton ni Bugto Russell ha ministro nga nagpakiana kon paonan-o ginagastohan an buruhaton han mga Estudyante han Biblia? (b) Ano an paghihisgotan hini nga kapitulo?

MAKAUSA ginpakianhan hi Bugto Charles T. Russell hin ministro han Reformed Church kon paonan-o ginagastohan an buruhaton han mga Estudyante han Biblia.

“Diri kami nangungolekta,” siring ni Bugto Russell.

“Diin man tikang an iyo pan-gasto?” nagpakiana an ministro.

“Kon susumatan ko ikaw han tinuod, bangin diri ka tumoo,” an baton ni Russell. “Kon may natambong ha amon mga katirok, waray hira nakikita nga iginpapasa nga sibot. Kondi nakikita nira an mga kagarastohan ngan nahuhunahuna nira, ‘Ini nga katirokan gin-gastohan . . . Paonan-o daw la ako makakaamot para hini?’ ”

Diri makatoo an ministro han ginsiring ni Bugto Russell.

“Ginsusumatan ko ikaw han kamatuoran,” siring ni Russell. “Tinuod nga may mga napakiana ha akon, ‘Paonan-o daw la ako makakaamot para hini nga buruhaton?’ Kon an usa nakarawat hin bendisyon ngan maopay an panginabuhi, karuyag niya gamiton ito para ha Ginoo. Kondi kon diri maopay an iya panginabuhi, kay ano nga piriton naton hiya ha paghatag?” *

² Waray ruhaduha nga “kamatuoran” an ginsiring ni Bugto Russell. Hadto pa man, an katawohan han Dios boluntaryo nga naghahatag hin kontribusyon para ha tinuod nga pagsingba. Hini nga kapitulo, uusisahon naton an pipira nga ehemplo hito tikang ha Kasuratan ngan ha aton panahon yana. Samtang ginhihisgotan kon paonan-o ginagastohan yana an buruhaton han Ginhadian, maopay nga pakianhan naton an aton kalugaringon, ‘Paonan-o ko maipapakita an akon suporta ha Ginhadian?’

3, 4. (a) Ha ano nasarig hi Jehova ha iya mga magsiringba? (b) Paonan-o iginpakita han mga Israelita an ira suporta ha pagtukod han tabernakulo?

³ Nasarig gud hi Jehova ha iya tinuod nga mga magsiringba. Maaram hiya nga kon tatagan hira hin higayon, malilipay hira pagpakita han ira debosyon pinaagi ha boluntaryo nga paghatag. Tagda an duha nga ehemplo ha panahon han mga Israelita.

 ⁴ Katapos pagawson an mga Israelita ha Ehipto, ginsugo hira ni Jehova ha paghimo hin nadadara-dara nga tolda, o tabernakulo, para ha pagsingba. Damu gud nga materyales ngan gamit an pagkikinahanglanon. Ginsugo ni Jehova hi Moises nga tagan hin higayon an katawohan ha pagsuporta han proyekto. Hiya nagsiring: “Bisan hin-o nga may talinguha ha iya kasingkasing magdara hiya kan Jehova.” (Eks. 35:5) Paonan-o ginios an katawohan nga pakakagawas pa la tikang ha ngatanan nga kakurian han pagkauripon? (Eks. 1:14) Bug-os nga sinuporta hira pinaagi ha paghatag han ira bulawan, silber, ngan iba pa nga marahalon nga panag-iya nga an kadam-an posible nga tikang ha ira mga agaron hadto ha Ehipto. (Eks. 12:35, 36) Sobra gud an ira iginhatag, salit sadang na hira ‘pugngan.’—Eks. 36:4-7.

5. Paonan-o ginios an mga Israelita han gintagan hira ni David hin higayon ha paghatag para ha pagtukod han templo?

⁵ Paglabay hin mga 475 ka tuig, naghatag hi David tikang ha iya “kalugaringon” nga “bahandi” para ha pagtukod han templo—an siyahan nga permanente nga katirokan han tinuod nga pagsingba dinhi ha tuna. Iya liwat gintagan hin higayon ha paghatag an iya mga igkasi-Israelita. Hiya nagpakiana: “Hin-o ha iyo in may-ada kasingkasing hin paghatag hin regalo para han Ginoo?” Sugad nga baton, an katawohan boluntaryo nga naghatag kan Jehova “ha hingpit nga kasingkasing.” (1 Kron. 29:3-9; Maopay nga Sumat) Tungod kay maaram hi David kon tikang kan kanay an mga kontribusyon, ha pag-ampo kan Jehova hiya nagsiring: “An ngatanan nga butang tikang ha imo, ngan han imo kalugaringon amon ihinatag ha imo.”—1 Kron. 29:14.

6. Kay ano nga kinahanglan naton an kwarta ha pagtuman han buruhaton yana, ngan ano nga mga pakiana an nabangon?

⁶ Waray pirita ni Moises o ni David an katawohan han Dios ha paghatag. Kinasingkasing hira nga naghatag. Kumusta man yana? Maaram kita nga nagkikinahanglan hin kwarta an buruhaton han Ginhadian han Dios. Daku nga kantidad an ginkikinahanglan ha pagpublikar ngan pagpanaltag han Biblia ngan literatura han Biblia, pagtukod ngan pagmintinar hin mga katirokan ngan pasilidad han sanga nga opisina, ngan pagtagana hin bulig ha kabugtoan ha panahon hin kalamidad. Salit nabangon an importante nga mga pakiana: Tikang diin an aton pundo? Kinahanglan ba piriton paghatag an mga sumurunod han Hadi?

7, 8. Kay ano nga an katawohan ni Jehova diri nakikilimos o naghahangyo hin kwarta?

⁷ Waray subara ni Bugto Russell ngan han iya mga kaupod an mga estratihiya han mga relihiyon han Kakristianohan ha pagtirok hin kwarta. Ha ikaduha nga gowa han Watch Tower, ha ulohan nga “Karuyag Mo ba Magkaada hin ‘Zion’s Watch Tower’?” hi Russell nagsiring: “Natoo kami nga hi JEHOVA an nagpapaluyo han ‘Zion’s Watch Tower,’ ngan tungod hito diri gud ini makikilimos o maghahangyo hin suporta ha mga tawo. Kon Hiya nga nasiring: ‘Akon an ngatanan nga bulawan ngan  salapi han kabukiran,’ mapakyas ha pagtagana han kinahanglanon nga mga pundo, sasabuton namon ito nga panahon na ha pag-undang ha pagpublikar.” (Hag. 2:7-9) Paglabay hin sobra 130 ka tuig, an The Watchtower ngan an organisasyon nga nagpupublikar hito nagpapabilin nga marig-on!

⁸ Diri nakikilimos an katawohan ni Jehova. Diri hira nangungolekta o nagsusolisit hin kwarta. Diri liwat hira nagpapabingo, namamaligya, o nagpaparapol basi la makakwarta. Gintitindogan nira an maiha na nga ginsiring han Watch Tower: “Bisan kakan-o, waray gud namon hunahunaa nga husto an pagsolisit hin kwarta para ha buruhaton han Ginoo, sugad la han ginbubuhat han kadam-an . . . Para ha amon, an kwarta nga natirok pinaagi han iba-iba nga estratihiya ha pagpangaro ha ngaran han Ginoo makaarawod, diri niya nalilipayan, ngan diri makarawat hin bendisyon an mga naghatag o an buruhaton nga nahimo.” *

9, 10. Ano an usa nga rason kon kay ano nga karuyag gud naton maghatag?

⁹ Sugad nga mga sakop han Ginhadian, diri kita kinahanglan piriton ha paghatag. Lugod, nalilipay kita paggamit han aton kwarta ngan iba nga gintatag-iya ha pagsuporta han buruhaton han Ginhadian. Kay ano nga karuyag gud naton maghatag? Tagdon naton an tulo nga rason.

¹⁰ Siyahan, tungod kay hinigugma naton hi Jehova ngan karuyag naton buhaton an “nakakalipay ha iya.” (1 Juan 3:22) Nalilipay gud hiya ha iya magsiringba nga nahatag tikang ha kasingkasing. Usisahon naton an prinsipyo nga ginsiring ni apostol Pablo ha mga Kristiano mahitungod ha paghatag. (Basaha an 2 Corinto 9:7.) An tinuod nga Kristiano diri nag-aalang o napipiritan paghatag. Lugod, nahatag hiya kay ito an “karuyag han iya kasingkasing.” * Karuyag sidngon, nahatag hiya katapos niya hibaroan an panginahanglan ngan kitaon kon paonan-o makakabulig. An sugad nga indibiduwal duok ha kasingkasing ni Jehova tungod kay “an Dios nahigugma ha malipayon nga nahatag.” An usa pa nga hubad hito nasiring: “Hinigugma han Dios an tawo nga naruruyag gud paghatag.”

11. Ano an nag-aaghat ha aton ha paghatag kan Jehova han aton pinakamaopay nga regalo?

¹¹ Ikaduha, boluntaryo kita nga nahatag sugad nga pagpasalamat han damu nga bendisyon ni Jehova ha aton. Tagdon naton an prinsipyo ha Mosaiko nga Balaud basi mausisa naton an aton kasingkasing. (Basaha an Deuteronomio 16:16, 17.) Kon natambong ha tulo nga tinuig nga piyesta, an tagsa nga Israelita nga lalaki kinahanglan maghatag hin regalo nga katugbang “han bendisyon nga kan Jehova” iginhatag ha iya. Salit antes tumambong, sadang niya ihapon an bendisyon ha iya ngan usisahon an iya kasingkasing basi makagdesisyon kon ano an pinakamaopay nga mairiregalo. Ha pariho nga paagi, kon ginpapamalandong naton an damu nga bendisyon ha aton, naaaghat kita paghatag  han aton pinakamaopay nga regalo. An aton kinasingkasing nga paghatag hin regalo, ngan an aton materyal nga kontribusyon, nagpapakita nga gin-aapresyar gud naton an hura nga bendisyon ni Jehova.—2 Cor. 8:12-15.

12, 13. Paonan-o an aton boluntaryo nga paghatag nagpapakita han aton gugma ha Hadi, ngan mationan-o kadaku an sadang ihatag han kada tagsa?

¹² Ikatulo, pinaagi han boluntaryo nga paghatag, naipapakita naton an aton gugma ha Hadi nga hi Jesus-Kristo. Paonan-o? Tigamni an ginsiring ni Jesus ha iya mga disipulo han iya ultimo nga gab-i dinhi ha tuna. (Basaha an Juan 14:23.) Hiya nagsiring: “An bisan hin-o nga nahigugma ha akon magtutuman han akon pulong.” An “pulong” ni Jesus nag-uupod han iya sugo ha pagsangyaw han maopay nga sumat han Ginhadian ha bug-os nga tuna. (Mat. 24:14; 28:19, 20) Gintutuman naton an “pulong” pinaagi ha paghatag han aton maaakos—panahon, kusog, ngan materyal ha pagsuporta ha pagsangyaw. Hito nga paagi, naipapakita naton an aton gugma ha Mesianiko nga Hadi.

¹³ Oo, sugad nga maunungon nga mga sakop han Ginhadian, karuyag gud naton ipakita an aton suporta hito pinaagi hin  pinansyal nga kontribusyon. Mationan-o kadaku an aton ihahatag? Personal ito nga desisyon. An tagsa ha aton naghahatag tubtob han aton maaakos. Kondi damu ha aton an nagkukuri ha pinansyal. (Mat. 19:23, 24; San. 2:5) Pero nakakaliaw nga ginpapabilhan ni Jehova ngan han iya Anak bisan an gutiay nga kontribusyon basta tikang ito ha kasingkasing.—Mar. 12:41-44.

14. Paonan-o igintanyag han mga Saksi ni Jehova an ira literatura ha damu ka tuig?

¹⁴ Ha damu ka tuig, may espisipiko nga kantidad an Kasuratanhon nga mga literatura nga igintatanyag han mga Saksi ni Jehova. Pero ito nga kontribusyon gintipigan nga hamubo basi bisan an mga pobre makakabasa. Syempre, kon interesado an tagbalay kondi waray kwarta, malilipay an mga magwarali nga ibilin la gihap an literatura ha iya. An ira hingyap amo an pagpahamutang han literatura ha mga tawo nga magbabasa gud ngan magpapahimulos hito.

15, 16. (a) Ano nga pagbag-o ha paagi han pagtanyag hin literatura an ginhimo han Nagmamando nga Lawas han 1990? (b) Paonan-o naton mahimo ihatag an aton donasyon? (Kitaa liwat an kahon nga “ Nahingangain an Aton mga Donasyon?”)

¹⁵ Han 1990, ginbag-o han Nagmamando nga Lawas an paagi ha pagtanyag han literatura. Tikang hito nga tuig ha Estados Unidos, an ngatanan han aton literatura igintatanyag nga waray espisipiko nga kantidad. An surat para ha ngatanan nga kongregasyon didto nagsiring: “An mga magasin ngan literatura ihahatag ha mga magwarali ngan mga interesado nga waray gin-aaro o gin-uunabi nga espisipiko nga kantidad sugad nga kabalyo. . . . An bisan hin-o nga naruruyag pagdonar para ha kagarastohan han aton buruhaton ha pagtutdo diri man ginpupugngan, makarawat la gihap hira hin literatura magdonar man hira o diri.” Tungod hito nga kahikayan, nagin klaro nga an aton buruhaton boluntaryo ngan relihiyoso, ngan “diri kita . . . parabaligya han pulong han Dios.” (2 Cor. 2:17) Ha urhi, iginpatuman ito ha ngatanan nga sanga nga opisina.

¹⁶ Paonan-o naton mahimo ihatag an aton donasyon? Ha mga Kingdom Hall han mga Saksi ni Jehova, may mga kahon para ha kontribusyon ha angayan nga mga dapit. Mahimo ihulog didto han mga indibiduwal an ira kontribusyon o ipadara ha usa han legal nga korporasyon nga ginagamit han mga Saksi ni Jehova. Kada tuig ginhihisgotan han usa nga artikulo ha An Barantayan kon paonan-o makakahatag hin kontribusyon.

17-19. Isaysay kon paonan-o ginagamit an mga donasyon para ha (a) bug-os- kalibotan nga buruhaton, (b) pagtukod hin mga Kingdom Hall ha bug-os nga kalibotan, ngan (c) kagarastohan han kongregasyon.

¹⁷ Bug-os-kalibotan nga buruhaton. Ini nga pundo igintatapar ha mga gastos ha pagsangyaw nga buruhaton ha bug-os nga tuna: pagpublikar ngan pagpanaltag hin literatura ha bug-os nga kalibotan, pagtukod ngan pagmintinar hin mga sanga nga opisina ngan Bethel home, ngan pagdumara hin iba-iba nga teokratiko nga eskwelahan. Ini gihap an ginagamit para ha mga misyonero,  nagbibiyahe nga mga paramangno, ngan mga espesyal payunir. Dinhi liwat ginkukuha an kwarta nga ginagamit ha pagbulig han aton kabugtoan ha panahon han kalamidad. *

¹⁸ Pagtukod hin mga Kingdom Hall ha bug-os nga kalibotan. Ini nga pundo ginagamit basi buligan an mga kongregasyon ha pagtukod o pag-ayad hin Kingdom Hall. Samtang padayon nga nagdudonar an kabugtoan, mas damu pa nga kongregasyon an nabubuligan. *

¹⁹ Kagarastohan han kongregasyon. Ini nga pundo ginagamit ha pagmintinar han Kingdom Hall ngan ha iba nga kagarastohan. Mahimo irekomendar han mga tigurang nga magpadara hin pundo ha lokal nga sanga nga opisina basi magamit para ha bug-os-kalibotan nga buruhaton. Ha sugad nga kahimtang, an mga tigurang magpipresenta hin resolusyon ha kongregasyon. Kon umuyon an kongregasyon, ipapadara an ginkauruyonan nga kantidad. Kada bulan, an bugto nga nag-aasikaso han accounts nag-aandam hin report han kwenta nga babasahon ha kongregasyon.

20. Paonan-o mo mapapasidunggan hi Jehova pinaagi han imo “manggad”?

²⁰ Kon ginpapamalandong naton an ngatanan nga ginkikinahanglan basi matuman an pagsangyaw ngan paghimo hin disipulo ha bug-os nga kalibotan, napapagios kita nga ‘pasidunggan hi Jehova pinaagi han [aton] manggad.’ (Prob. 3:9, 10) Kaupod han aton “manggad” an aton pisikal, mental, ngan espirituwal nga panag-iya. Sigurado nga karuyag naton gamiton ito hin bug-os para ha buruhaton han Ginhadian. Kondi hinumdumi, upod han “manggad” an aton materyal nga panag-iya. Salit, batasanon unta naton an paghatag uyon han aton maaakos. An aton boluntaryo nga donasyon nagpapasidungog kan Jehova ngan nagpapakita han aton suporta ha Mesianiko nga Ginhadian.