1, 2. Ha ano nga paagi napamatud-an nga hi Jesus maaramon nga paragiya?

 HANDURAWA nga gintu-tour ka hin propesyonal nga tour guide ha usa nga makaruruyag nga syudad. Ikaw ngan an imo mga kaupod diri pamilyar hito nga syudad, salit namamati gud kamo ha ngatanan nga iya ginsisiring. Usahay eksayted kamo kon ano pa an makakaruruyag nga kiritaon han syudad. Kondi kon napakiana kamo ha iyo tour guide mahitungod hito, diri anay hiya nabaton tubtob ha husto nga panahon—kasagaran nga kon hirani na kamo umabot hito nga lugar. Salit naimpres ka han iya kahibaro tungod kay iginsusumat niya an impormasyon nga sadang niyo hibaroan ha takna nga kinahanglan niyo hibaroan ito.

² An tinuod nga mga Kristiano pariho hito nga mga turista. Eksayted kita mahibaro mahitungod han pinakamakaruruyag han mga syudad, an “syudad nga may totoo nga mga pundasyon,” an Ginhadian han Dios. (Heb. 11:10) Han nakanhi pa hi Jesus ha tuna, hiya mismo an naggiya han iya mga sumurunod basi magkaada hira mas hilarom nga kahibaro mahitungod hito nga Ginhadian. Ginbaton ba niya an ngatanan nira nga pakiana ngan ginsumatan han ngatanan mahitungod han Ginhadian ha usa la ka higayon? Waray. Hiya nagsiring: “Damu pa an akon igsisiring ha iyo, pero diri kamo makakasabot hito yana.” (Juan 16:12) Sugad nga an pinakamaaramon nga guide o paragiya, waray paurani ni Jesus an iya mga disipulo hin kahibaro nga diri pa nira masasabtan.

3, 4. (a) Paonan-o padayon nga gintututdoan ni Jesus an magtinumanon nga katawohan mahitungod han Ginhadian han Dios? (b) Ano an aton paghihisgotan dinhi hini nga kapitulo?

³ Ha ultimo nga gab-i ni Jesus ha tuna, iya iginyakan an mga pulong ha Juan 16:12. Kondi han hiya mamatay, paonan-o niya padayon nga matututdoan an matinumanon nga katawohan mahitungod han Ginhadian han Dios? Iya ginpasarig an iya mga apostol: “An espiritu han kamatuoran, gigiyahan kamo . . . basi masabtan niyo hin bug-os an kamatuoran.” a (Juan 16:13) Maipapariho an baraan nga espiritu ha mapailubon nga paragiya. Ito nga espiritu an ginagamit ni Jesus ha pagtutdo han iya mga sumurunod han ira sadang hibaroan mahitungod han Ginhadian ha panahon nga kinahanglan nira hibaroan ito.

⁴ Paghisgotan naton kon paonan-o gin-gigiyahan han baraan nga espiritu ni Jehova an sinsero nga mga Kristiano basi hisabtan an Ginhadian. Siyahan, hisgotan naton kon ha ano nga paagi  naton hinsabtan kon kakan-o nagtikang magmando an Ginhadian han Dios. Ikaduha, usisahon naton kon hin-o an mga magmarando ngan mga sakop han Ginhadian ngan kon ano an ira paglaom. Ikatulo, kikitaon naton kon ha ano nga paagi mas hinsabtan han mga sumurunod han Kristo an panginahanglan ha pagin maunungon ha Ginhadian.

5, 6. (a) Ano an sayop nga mga ideya han mga Estudyante han Biblia mahitungod han kaestablisar han Ginhadian ngan han pag-ani? (b) Kay ano diri sadang pagruhaduhaan kon gin-gigiyahan ba ni Jesus an iya mga sumurunod tungod la hin sayop nga mga ideya?

⁵ Sugad han siring han Kapitulo 2 hini nga libro, damu na ka dekada nga nagsiniring an mga Estudyante han Biblia nga an 1914 magigin importante nga tuig ha katumanan han tagna ha Biblia. Kondi, hito nga panahon natoo hira nga an presensya han Kristo nagtikang han 1874, ngan nagtikang hiya pagmando ha langit han 1878, ngan an Ginhadian bug-os nga maiestablisar la ha Oktubre 1914. An pag-ani mahitatabo tikang han 1874 tubtob han 1914 ngan matatapos kon matirok na an mga dinihogan ha langit. Tungod hinin sayop nga mga ideya, pagruruhaduhaan ba naton kon gin-gigiyahan ni Jesus iton magtinumanon nga katawohan pinaagi han baraan nga espiritu?

⁶ Diri gud! Tagda utro an ilustrasyon ha siyahan nga parapo. Tungod han abanse nga mga ideya ngan mga pakiana han mga turista, pagruruhaduhaan ba naton an pagin masasarigan han tour guide? Diri! Ha pariho nga paagi, bisan kon usahay nagsasari an katawohan ni Jehova nga hisabtan an detalye han iya katuyoan antes han paggiya ha ira han baraan nga espiritu ngada hito nga mga kamatuoran, klaro nga ginigiyahan hira ni Jesus. Hito nga paagi, napapamatud-an nga an magtinumanon andam kumarawat hin pagtadong, ngan mapainubsanon nga ginbag-o an ira pagsabot.—San. 4:6.

7. Ano nga mga idlap han espirituwal nga kahayag an nakarawat han katawohan han Dios?

⁷ Katapos han 1919, ginbendisyonan an katawohan han Dios hin dugang nga mga idlap han espirituwal nga kahayag. (Basaha an Salmo 97:11.) Han 1925, iginpagowa an importante nga artikulo ha The Watch Tower nga “Birth of the Nation.” Naghisgot ito han makakombinse nga ebidensya tikang ha Kasuratan nga an Mesianiko nga Ginhadian naestablisar han 1914. Katumanan ini han tagna ha Pahayag kapitulo 12 mahitungod han pag-anak han langitnon nga babaye han Dios. b An artikulo nagsiring liwat nga an paglutos ngan kakurian nga naeksperyensyahan han katawohan ni Jehova ha panahon han girra klaro nga tigaman nga iginlabog hi Satanas tikang ha langit “nga may daku nga kasina, kay maaram hiya nga halipot na la an iya panahon.”—Pah. 12:12.

8, 9. (a) Paonan-o hinbaroan han katawohan han Dios an pagkaimportante han Ginhadian? (b) Ano nga mga pakiana an aton paghihisgotan?

⁸ Mationan-o kaimportante an Ginhadian? Han 1928, ginpabug-atan han The Watch Tower nga mas importante an Ginhadian kay han personal nga kaluwasan pinaagi han lukat. Ngani, pinaagi han Mesianiko nga Ginhadian—babaraanon ni Jehova an iya ngaran, bibindikaron an iya pagkasoberano, ngan tutumanon an iya katuyoan ha katawohan.

⁹ Hin-o an makakaupod han Kristo ha pagmando hito nga Ginhadian? Hin-o an magigin mga sakop hito nga Ginhadian dinhi  ha tuna? Ngan ano nga buruhaton an sadang magin prayoridad han mga sumurunod han Kristo?

10. Ano an maiha na nga hinsabtan han katawohan han Dios mahitungod han 144,000?

¹⁰ Mga dekada antes han 1914, hinsabtan na han tinuod nga mga Kristiano nga 144,000 nga magtinumanon nga sumurunod an makakaupod han Kristo ha pagmando ha langit. c Nasantop han mga Estudyante han Biblia nga literal ito nga numero ngan gintikangan na an pagtirok hito han siyahan nga siglo C.E.

11. Paonan-o nagkaada husto nga pagsabot an magigin membro han nobya han Kristo mahitungod han ira bubuhaton ha tuna?

¹¹ Kondi, ano an iginpapabuhat ha magigin mga membro han nobya han Kristo samtang aanhi pa hira ha tuna? Nakita nira nga ginpabug-atan ni Jesus an pagsangyaw nga buruhaton ngan iginkaw-ing ito ha peryodo han pag-ani. (Mat. 9:37; Juan 4:35) Sumala ha Kapitulo 2, naghunahuna anay hira nga ito nga peryodo maabot hin 40 ka tuig, ngan matatapos kon matirok na an mga dinihogan ha langit. Kondi tungod kay katapos hin 40 ka tuig nagpadayon pa an buruhaton, kinahanglan an dugang nga pagpatin-aw. Yana, maaram kita nga an peryodo han pag-ani nagtikang han 1914. Ito an peryodo han pagbulag han trigo ha banwa, han matinumanon nga dinihogan nga mga Kristiano ha diri tinuod nga mga Kristiano. Panahon na basi ipokus an atensyon ha pagtirok han nanhibilin nga membro hiton langitnon nga klase!

12, 13. Ha ano nga paagi natutuman ha kataposan nga mga adlaw an ilustrasyon ni Jesus han napulo nga birhen ngan han talanton?

¹² Tikang han 1919 padayon, gin-giyahan han Kristo an matinumanon ngan maaramon nga uripon nga unahon an pagsangyaw. Iya iginhatag ito nga toka han siyahan nga siglo. (Mat. 28:19, 20) Gin-unabi liwat niya kon ano nga mga kalidad an pagkikinahanglanon han iya dinihogan nga mga sumurunod basi matuman an toka. Ha ano nga paagi? Ha ilustrasyon han napulo nga birhen, iya iginpakita nga an dinihogan sadang magpabilin nga mabinantayon ngan nagmamata ha espirituwal basi makab-ot an ira tumong nga magin bahin han daku nga kasal ha langit, kon ikasal na an Kristo ha iya “karaslon nga babaye” han 144,000. (Pah. 21:2) Ngan ha ilustrasyon han talanton, nagsiring hi Jesus nga an iya dinihogan nga mga surugoon sadang magin maduruto ha pagtuman han iya igintoka ha ira.—Mat. 25:1-30.

 ¹³ Hinin naglabay nga siglo, an mga dinihogan napamatud-an nga nagmamata ngan maduruto. Waray ruhaduha nga ginbalosan gud an ira pagkamabinantayon! Kondi, limitado la ba an daku nga pag-ani nga buruhaton ha pagtirok han nanhibilin nga membro han 144,000 nga makakaupod han Kristo ha pagmando?

14, 15. Ano nga upat nga grupo an ginhisgotan ha The Finished Mystery?

¹⁴ An matinumanon nga kalalakin-an ngan kababayin-an maiha na nga interesado gud ha “daku nga grupo” (“daku nga kadam-an,” King James Version) nga gin-unabi ha Pahayag 7:9-14. Diri urusahon nga antes ihayag han Kristo kon hin-o ito nga grupo, damu na an iginsiring mahitungod hito nga naiiba gud ha klaro ngan simple nga kamatuoran nga aton hinbabaroan ngan ginpapabilhan yana.

¹⁵ Han 1917, an libro nga The Finished Mystery nagsiring nga may “duha nga bahin o klase han Langitnon nga kaluwasan, ngan duha nga bahin o klase han tunan-on nga kaluwasan.” Hin-o an membro hinin upat nga grupo nga may iba-iba nga kaluwasan? Siyahan, an 144,000 nga magmamando kaupod han Kristo. Ikaduha, an daku nga kadam-an. Gintotoohan hadto nga hira an nag-aangkon nga mga Kristiano kondi nagpapabilin nga membro han Kakristianohan. Hira may pagtoo pero waray kaisog nga tindogan ito. Salit, mas hamubo an posisyon nga ihahatag ha ira ha langit. May kalabotan ha tuna, gintoohan nga an ikatulo nga grupo, an “kadaan nga mga takos”—mga magtinumanon sugad kanda Abraham, Moises, ngan iba pa—magmamando ha ikaupat nga grupo, an katawohan ha kabug-osan.

16. Ano nga mga espirituwal nga kahayag an nakarawat han 1923 ngan 1932?

¹⁶ Paonan-o gin-giyahan han baraan nga espiritu an mga sumurunod han Kristo ngadto ha mga katutdoan nga hinbabaroan naton yana? Pinaagi han hinay-hinay nga pagsanag han espirituwal nga kahayag. Tikang han 1923, iginpakilala han The Watch Tower an usa nga grupo nga waray magtinguha pagkadto ha langit, lugod naghingyap pag-ukoy dinhi ha tuna ilarom han pagmando han Kristo. Han 1932, ginhisgotan han The Watchtower hi Jonadab (Jehonadab), nga inupod ha dinihogan han Dios nga hadi han Israel nga hi Jehu basi buligan ito ha pakig-away kontra ha buwa nga pagsingba. (2 Hadi 10:15-17) An artikulo nagsiring nga may klase hin mga tawo ha moderno nga panahon nga pariho kan Jonadab, ngan nagdugang ito nga luluwason ni Jehova ini nga klase “ha Armagedon” basi mag-ukoy dinhi ha tuna.

17. (a) Ano nga mas masanag nga espirituwal nga kahayag an nakarawat han 1935? (b) Ano an epekto han bag-o nga pagsabot mahitungod han daku nga kadam-an ha matinumanon nga mga Kristiano? (Kitaa an kahon nga “ Nakaginhawa Gud an Damu.”)

¹⁷ Han 1935 mas nagsanag an espirituwal nga kahayag. Ha kombensyon ha Washington, D.C., nakilala an daku nga kadam-an sugad nga an tunan-on nga klase nga amo an mga karnero ha parabola ni Jesus han mga karnero ngan mga kanding. (Mat. 25:33-40) An daku nga kadam-an magigin bahin han “iba nga mga karnero,” nga mahitungod ha ira hi Jesus nagsiring: “Kinahanglan dad-on ko liwat hira.” (Juan 10:16) Han an mamumulong nga hi J. F. Rutherford nagsiring: “Mahimo ba tumindog an ngatanan nga  may-ada paglaom nga mabuhi ha waray kataposan dinhi ha tuna?” sobra katunga han tinambong an tumindog! Katapos hiya siniring: “Kitaa! An daku hinduro nga kadam-an!” Nalipay gud an damu kay hinsabtan na nira kon ano an ira paglaom.

18. Ha ano nga paagi iginsentro han sumurunod han Kristo an ira pangalimbasog ha ministeryo, ngan ano an resulta?

¹⁸ Tikang hito nga takna, gin-giyahan han Kristo an iya katawohan ha pagsentro han ira pangalimbasog ha pagtirok han magigin mga membro hinin daku nga grupo nga makakatalwas nga buhi ha daku nga kasakitan. Ha tinikangan, baga hin diri makatirigamnan an resulta han ira buruhaton. Ngani, bisan hi Bugto Rutherford nakagkomento: “Baga hin an ‘daku nga grupo han katawohan’ diri gud daku.” Syempre yana, maaram kita nga ginbibendisyonan gud ni Jehova an buruhaton tikang hito nga panahon! Ha paggiya ni Jesus ngan han baraan nga espiritu, an mga dinihogan ngan an ira kaupod nga “iba nga mga karnero” nagin sugad han igintagna ni Jesus—“usa nga panon” nga nag-aalagad ha “usa nga paraataman.”

19. Paonan-o kita makikigbahin ha pagpadaku han daku nga grupo?

¹⁹ An kadam-an han matinumanon nga katawohan mabubuhi ha waray kataposan ha paraiso nga tuna nga pagmamandoan han Kristo ngan han 144,000 nga iya igkasi-magmarando. Diri ba makalilipay hunahunaon kon paonan-o gin-giyahan han Kristo an katawohan han Dios ngada hiton klaro nga paglaom nga basado ha Biblia? Pribilehiyo gud an pagsumat hito ha iba! Salit tubtob han aton mahihimo, magin aktibo kita basi an daku nga grupo magdaku pa gud, ngan maghatag hin mas daku nga pagdayaw ha ngaran ni Jehova!—Basaha an Lucas 10:2.

20. Ano an nagkukompwesto han organisasyon ni Satanas, ngan paonan-o ito mahimo makaapekto ha pagkamaunungon han usa nga Kristiano?

²⁰ Samtang an katawohan han Dios nagpapadayon ha pagkuha hin kahibaro mahitungod han Ginhadian, sadang nira masabtan hin bug-os an kahulogan han pagin maunungon hiton langitnon nga gobyerno. May kalabotan hini, ginhisgotan han The Watch Tower han 1922 an duha nga organisasyon nga nagios, an kan Jehova ngan an kan Satanas. An organisasyon ni Satanas ginkukompwesto han komersyo, relihiyon, ngan politika. Adton maunungon ha Ginhadian han Dios ilarom han pagmando han Kristo sadang maglikay ha bisan ano nga pakigbahin hito nga organisasyon. (2 Cor. 6:17) Ano an karuyag sidngon hini?

21. (a) Ha ano nga paagi ginpapahamangnoan han matinumanon nga uripon an katawohan han Dios may kalabotan ha dagku nga negosyo? (b) Han 1963, ano an iginhayag han The Watchtower mahitungod han “Babilonya nga Gamhanan”?

²¹ An espirituwal nga pagkaon tikang ha matinumanon nga uripon padayon nga nagbuhayhag han korapsyon han dagku nga negosyo ngan nagpapahamangno ha katawohan han Dios kontra ha materyalismo. (Mat. 6:24) Iginbubuhayhag liwat han aton publikasyon an relihiyoso nga bahin han organisasyon ni Satanas. Han 1963, iginpatin-aw han The Watchtower nga an “Babilonya nga Gamhanan” nagsisimbolo diri la han Kakristianohan kondi han imperyo han buwa nga relihiyon. Salit, sugad han aton dugang nga mahibabaroan ha Kapitulo 10 hini nga libro, ginbubuligan an katawohan han Dios ha tagsa nga nasud ngan kultura nga ‘gumawas ha iya,’ pinaagi ha paglimpyo ha ira kalugaringon tikang  ha tanan nga buruhaton han buwa nga mga relihiyon.—Pah. 18:2, 4.

22. Paonan-o ginsabot han damu han katawohan han Dios an Roma 13:1 durante han Girra ha Kalibotan I?

²² Kondi, kumusta man an politikal nga bahin han organisasyon ni Satanas? Mahimo ba makigbahin an tinuod nga mga Kristiano ha mga girra ngan pagkabahin-bahin han mga nasud? Han Girra ha Kalibotan I, hinsabtan han mga Estudyante han Biblia nga an mga sumurunod han Kristo diri sadang pumatay hin tawo. (Mat. 26:52) Kondi ginsabot han damu nga an pagsagda ha Roma 13:1 nga magin masinugtanon ha “higtaas nga awtoridad” nangangahulogan ha pakigbahin ha militar, pagsul-ot han uniporme han sundalo, ngan pagdara hin armas; kondi kon obligaron pagpatay hin kaaway, mapabuto la hira ngadto ha igbaw.

23, 24. Paonan-o naton ginsabot an Roma 13:1 durante han Girra ha Kalibotan II, ngan ha ano nga mas husto nga pagsabot gin-giyahan an mga sumurunod han Kristo?

²³ Ha pagbuto han Girra ha Kalibotan II han 1939, detalyado nga ginhisgotan han The Watchtower an neutralidad. Iginpatin-aw hito nga an mga Kristiano diri sadang magin bahin ha mga girra ngan pagkabahin-bahin han mga nasud ha kalibotan ni Satanas. Napapanahon an sagdon! Napanalipdan gud an mga Kristiano ha duro nga pagin salaan ha dugo han mga nasud durante hito nga girra. Kondi tikang han 1929, an aton mga publikasyon nagsiring liwat nga an higtaas nga awtoridad ha Roma 13:1 diri an sekular nga mga magmarando, kondi hi Jehova ngan hi Jesus. Salit, ginkikinahanglan pa an dugang nga pagsabot.

²⁴ Ha giya han baraan nga espiritu, an mga sumurunod han Kristo nagkaada husto nga pagsabot hadton 1962, han an importante  nga kahayag mahitungod han Roma 13:1-7 iginpublikar ha mga gowa han Nobyembre 15 ngan Disyembre 1 nga The Watchtower. Dida hito, hinsabtan han katawohan han Dios an prinsipyo han relatibo nga pagpasakop nga iginpatin-aw ni Jesus ha iya bantogan nga mga pulong: “Ihatag ha Cesar an mga butang han Cesar, pero ihatag ha Dios an mga butang han Dios.” (Luc. 20:25) Yana, hinsasabtan han tinuod nga mga Kristiano nga an higtaas nga awtoridad amo an sekular nga mga gahum hini nga kalibotan, ngan kinahanglan hira magpasakop hito, kondi ha relatibo la nga paagi. Kon obligaron kita han sekular nga awtoridad nga talapason hi Jehova nga Dios, sadang kita bumaton pariho han baton han mga apostol: “Kinahanglan sugton namon an Dios sugad nga magmarando imbes nga an mga tawo.” (Buh. 5:29) Ha Kapitulo 13 ngan 14 hini nga libro, dugang nga mahibabaroan naton kon paonan-o gin-aaplikar han katawohan han Dios an prinsipyo han neutralidad sugad han ginbuhat han Kristo.

25. Kay ano nga gin-aapresyar mo an bulig han baraan nga espiritu ha pagsabot mahitungod han Ginhadian han Dios?

²⁵ Hunahunaa an ngatanan nga igintututdo ha mga sumurunod han Kristo mahitungod han Ginhadian hinin naglabay nga siglo. Hinbaroan naton kon kakan-o naestablisar ha langit an Ginhadian han Dios ngan kon mationan-o kaimportante ito. Hinbaroan liwat naton an duha nga paglaom han matinumanon nga katawohan, an langitnon ngan tunan-on nga paglaom. Ngan hinbaroan naton kon paonan-o magigin maunungon ha Ginhadian han Dios samtang relatibo nga nagpapasakop ha sekular nga mga awtoridad. Pakianhi an imo kalugaringon, ‘Mahibabaroan ko ba iton presyoso nga mga kamatuoran kon waray giyahi ni Jesu-Kristo an iya matinumanon nga uripon ha tuna nga hisabtan ngan itutdo ito?’ Oo, daku gud nga bendisyon an paggiya han Kristo ngan han baraan nga espiritu!