Pagsaludo ha Bandera, Pagbutos, Ngan Pagserbisyo ha Komunidad

Pagsaludo ha bandera. An mga Saksi ni Jehova natoo nga an pagyukbo o pagsaludo ha bandera​—agsob nga gindudunganan hin kanta han nasud—​relihiyoso nga buhat nga nagpapakita nga an katalwasan nagtitikang, diri ha Dios, kondi ha gobyerno ngan ha mga lider hito. (Isaias 43:11; 1 Korinto 10:14; 1 Juan 5:21) Usa han sugad nga lider hi Hadi Nabukodonosor han kadaan nga Babilonya. Basi dayawon an iya pagkaharangdon ngan pagin relihiyoso, inin gamhanan nga hadi nagtukod hin daku nga imahen ngan nag-obligar han iya mga sakop ha pagyukbo hito samtang ginpapatokar an musika​—pariho hin kanta han nasud. Kondi, an tulo nga Hebreohanon​—Sadrak, Mesak, ngan Abednego—​nagdumiri pagyukbo, bisan pa han sirot nga kamatayon.​—Daniel, kapitulo 3.

Yana, “an bandera an nangunguna nga nasyonalistiko nga simbolo han pagtoo ngan an pinakaimportante nga butang ha pagsingba,” nagsurat an historyador nga hi Carlton Hayes. “Ginhuhukas han kalalakin-an an ira kalo kon igin-aagi an bandera; ngan ha pagdayaw ha bandera, an mga parasiday nagkukomposo hin siday ngan an kabataan nagkakanta hin himno.” Hiya nagdugang nga an nasyonalismo may-ada liwat mga pyesta, sugad han Hunyo 12, an Adlaw han Independensia han Pilipinas, ngan mga bayani nga ginpapasidunggan sugad nga santo, ngan mga monumento nga gintatagad sugad nga templo. Ha usa nga seremonya ha Brazil, an ministro heneral han militar nagsiring: “An bandera gintatahod ngan ginsisingba . . . sugad la nga ginsisingba an Iroy nga Tuna.” Oo, “an bandera, pariho ha krus, sagrado,” makausa nagsiring an The Encyclopedia Americana.

 Hinin bag-o la, an gin-unabi nga ensayklopidya nagsiring nga an mga kanta han nasud “kapahayagan han nasyonalistiko nga pag-abat nga agsob gin-uupdan hin pangamuyo ha Dios nga giyahan ngan panalipdan unta an mga tuminungnong o an ira mga magmarando.” Salit, an mga surugoon ni Jehova makatadunganon ha paghunahuna nga relihiyoso an nasyonalistiko nga mga seremonya may kalabotan ha pagsaludo ha bandera ngan kanta han nasud. Ha pagkamatuod, han nagkomento an libro nga The American Character mahitungod ha pagdumiri han mga anak han mga Saksi ha pagsaludo ha bandera o pagsumpa hin pagkamaunungon ha mga eskwelahan ha E.U., ito nagsiring: “Ha kataposan, ginkompirma han Korte Suprema ha sunod-sunod nga kaso nga relihiyoso ini nga mga seremonya nga ginbubuhat kada adlaw.”

Bisan kon an katawohan ni Jehova diri nakikigbahin ha seremonya nga ira gintatagad nga diri-Kasuratanhon, gintatahod gud nira an katungod han iba ha pakigbahin hito. Ira liwat gintatahod an bandera sugad nga simbolo ngan ginkikilala an gobyerno nga “kagamhanan” nga nag-aalagad sugad nga “ministro han Dios.” (Roma 13:1-4) Tungod hito, ginsusunod nira an sagdon nga mag-ampo may kalabotan ‘ha mga hadi ngan ha ngatanan nga may kagamhanan.’ Kondi, ginbubuhat nira ito basi ‘makag-ukoy ha mahusay ngan malinaw [nga may bug-os] nga pagtahod ha Dios ngan kaligdong.’​—1 Timoteo 2:2.

Pagbutos ha eleksyon ha politika. An tinuod nga Kristiano nagtatahod han katungod han iba ha pagbutos. Diri hira nangangampanya kontra ha eleksyon, ngan nakooperar hira ha napili nga mga opisyal. Kondi, nagpapabilin hira nga neutral gud ha politika. (Mateo 22:21; 1 Pedro 3:16) Ano an sadang buhaton han usa nga Kristiano ha katunaan diin gin-oobligar an pagbutos o ginkukontra an diri nakadto ha presinto? Tungod kay maaram nga kinadto hira Sadrak, Mesak, ngan Abednego ha kapatagan han Dura, an usa nga Kristiano nga aada ha pariho nga kahimtang mahimo magdesisyon pagkadto ha presinto kon igintutugot han iya konsensya. Kondi, sadang hiya mag-ikmat nga diri niya matalapas an iya pagin neutral. Sadang niya tagdon an masunod nga unom nga prinsipyo:

 1. An sumurunod ni Jesus ‘diri kanan kalibotan.’​—Juan 15:19.

2. An mga Kristiano nagrirepresentar kan Kristo ngan han iya Ginhadian.​—Juan 18:36; 2 Korinto 5:20.

3. An Kristiano nga kongregasyon nagkakaurosa ha ira gintotoohan, ngan an mga membro hito ginbubugkos han gugma nga pariho han kan Kristo.​—1 Korinto 1:10; Kolosas 3:14.

4. Adton nabutos para hin partikular nga opisyal may baratunon ha ginbubuhat hito nga opisyal.​—Tigamni an mga prinsipyo ha 1 Samuel 8:5, 10-18 ngan 1 Timoteo 5:22.

5. Gintagad ni Jehova an paghingyap han Israel nga magkaada tawhanon nga magmarando sugad nga pangirilal-an nga ira iginsalikway Hiya.​—1 Samuel 8:7.

6. An mga Kristiano sadang magkaada limpyo nga konsensya kon nakikiistorya mahitungod ha gobyerno han Ginhadian han Dios ha mga tawo anoman an ira gintotoohan ha politika.​—Mateo 24:14; 28:19, 20; Hebreo 13:18.

Pagserbisyo ha Komunidad. Ha pipira nga katunaan, gin-oobligar han gobyerno an nagdudumiri pagserbisyo ha militar nga magserbisyo ha komunidad. Kon naatubang hin sugad nga kahimtang, sadang kita mag-ampo mahitungod hito. Mahimo naton ipakiistorya ito ha hamtong nga igkasi-Kristiano, katapos pagdesisyon nga ginagamit an aton konsensya uyon ha aton hinbabaroan.​—Proberbios 2:1-5; 1 Pedro 2:15.

Ginsasagda kita han Pulong han Dios nga ‘magmasinugtanon, ngan mag-andam ha ngatanan nga mag-opay nga buhat, [magin] magtalunoy.’ (Tito 3:1, 2) Samtang ginhuhunahuna ito, mahimo naton pakianhan an aton kalugaringon: ‘Maikukompromiso ko ba an akon neutralidad o mahidadabi ba ako ha palso nga relihiyon kon magserbisyo ako ha komunidad?’ (Mika 4:3, 5; 2 Korinto 6:16, 17) ‘Kon buhaton ko ini nga trabaho, makukurian o mapupugngan ba ako ha pagtuman han akon responsabilidad sugad nga Kristiano?’ (Mateo 28:19, 20; Efeso 6:4; Hebreo 10:24, 25) ‘Ha luyo nga bahin, kon magserbisyo ako ha komunidad, magkakaada ba ako panahon ha pagpahaluag han akon espirituwal nga buruhaton ngan makasulod pa ngani ha bug-os-panahon nga pag-alagad?’​—Hebreo 6:11, 12.

 Kon an usa nga Kristiano magdesisyon uyon ha iya konsensya nga imbes mapriso, mahimo hiya magserbisyo ha komunidad, sadang tahuron han iba nga Kristiano an iya desisyon. (Roma 14:10) Kondi, kon diri natugot an iya konsensya ha sugad nga serbisyo, sadang liwat ito tahuron han iba.​—1 Korinto 10:29; 2 Korinto 1:24.