Paglampos han Hingyap ha Pagbuhat han Masturbasyon

An masturbasyon usa nga buhat nga kinangangalasan han Dios tungod kay nag-aaghat ito ha pagsentro la ha pagtagbaw ha kalugaringon ngan paghinunahuna hin magraot nga butang. a Mahimo tagdon han nagbubuhat hito an iba sugad nga seksuwal nga butang la nga iya magagamit ha pagtagbaw han iya gana ha sekso. Mahimo hiya magtikang paghunahuna nga an sekso diri kapahayagan han gugma hin duha ka tawo, kondi pisikal la nga reaksyon basi makahatag hin madaliay nga kalipay ngan katagbaw ha sekso. Kondi, ito nga katagbaw temporaryo la. Ha pagkatinuod, imbes nga patayon an mga bahin han lawas may kalabotan ha ‘pakighilawas, kahugaw,’ ngan sayop nga hingyap ha sekso, gin-aaghat lugod ito han nagbubuhat han masturbasyon.​—Kolosas 3:5.

Hi apostol Pablo nagsurat: “Mga hinigugma, maglinis kita tikang ha ngatanan nga mga hugaw han unod ngan han espiritu, ngan paghingpiton ta an pagkaputli ha kahadlok ha Dios.” (2 Korinto 7:1) Kon nakukurian ka pagsunod hini, ayaw pagturaw. Hi Jehova andam pirme “ha pagpasaylo” ngan pagbulig. (Salmo 86:5; Lukas 11:9-13) Ha pagkamatuod, an imo kasingkasing nga nagsasamok ha imo ngan an imo pangalimbasog ha pag-undang  hiton maraot nga buhat​—bisan pa han panalagsa nga pakabuhat utro—​nagpapakita hin maopay nga disposisyon. Ayaw liwat hingalimti nga “an Dios daku pa ha aton kasingkasing, ngan maaram ha ngatanan nga mga bagay.” (1 Juan 3:20) Diri la an aton sala an nakikita han Dios; nakikita niya an aton bug-os nga pagkatawo. Tungod kay maaram hiya han ngatanan mahitungod ha aton, mahimo niya pamatian an aton sinsero nga pangamuyo para han iya kalooy. Salit ayaw gud undang ha mapainubsanon ngan sinsero nga pag-ampo, pariho hin bata nga nadaop ha iya tatay ha pagpaugop. Hito nga paagi, tatagan ka ni Jehova hin limpyo nga konsensya. (Salmo 51:1-12, 17; Isaias 1:18) Syempre, kinahanglan mo gumios uyon ha imo gin-aampo. Pananglitan, sadang ka mangalimbasog paglikay ha ngatanan nga klase han pornograpiya ngan magraot nga kaupod. b

Kon nagpapadayon an imo problema may kalabotan ha masturbasyon, alayon ipakiistorya ito ha usa nga Kristiano nga kag-anak o hamtong ha espirituwal ngan mapinairon nga sangkay. c​—Proberbios 1:8, 9; 1 Tesalonika 5:14; Tito 2:3-5.

[Mga footnote]