Kapitulo 1

“Amo Ini an Gugma han Dios”

“Amo ini an gugma han Dios, nga pagtumanon ta an iya mga sugo; ngan an iya mga sugo diri magbug-at.”​—1 JUAN 5:3.

1, 2. Ano an nakaaghat ha imo nga higugmaon hi Jehova nga Dios?

 HINIGUGMA mo ba an Dios? Kon igindedikar mo na an imo kinabuhi kan Jehova nga Dios, sigurado nga oo an imo baton​—ngan husto ito! Natural la nga higugmaon naton hi Jehova. Ha pagkamatuod, hinigugma naton an Dios tungod kay nahigugma hiya ha aton. Iginsaysay ito han Biblia hini nga paagi: “Nahigugma kita, kay una hiya [Jehova] naghigugma ha aton.”​—1 Juan 4:19.

² Hi Jehova an nag-una ha pagpahayag hin gugma ha aton. Gintagan kita niya hin makaruruyag nga urukyan nga tuna. Gintatagana niya an aton pisikal ngan materyal nga mga kinahanglanon. (Mateo 5:43-48) Gin-aataman niya an aton espirituwal nga panginahanglan. Iya ginhatag an iya Pulong, an Biblia. Dugang pa, iya kita ginhahangyo nga mag-ampo ha iya ngan nagpapasarig nga pamamatian kita ngan tatagan han iya baraan nga espiritu basi buligan kita. (Salmo 65:2; Lukas 11:13) Ngan labaw ha ngatanan, ginsugo niya an iya pinakapresyoso nga Anak nga magin Manunubos naton basi magin posible an aton katalwasan ha sala ngan kamatayon. Daku gud nga gugma an iginpakita ni Jehova ha aton!​—Juan 3:16; Roma 5:8.

3. (a) Basi magpabilin ha gugma han Dios, ano an aton kinahanglan buhaton? (b) Ano an importante nga pakiana an kinahanglan tagdon naton, ngan diin mabibilngan an baton hito?

³ Karuyag ni Jehova nga magpahimulos kita han iya gugma  tubtob ha waray kataposan. Kondi, ha pagkamatuod, depende na ha aton kon makakapahimulos ba kita o diri ha gugma han Dios. Ginsasagdonan kita han Pulong han Dios: ‘Magpadayon kamo ha gugma han Dios [nga ginlalantaw an] kinabuhi nga waray kataposan.’ (Judas 21) An mga pulong nga “magpadayon kamo” nagpapasabot nga basi magpabilin ha gugma han Dios, kinahanglan an buhat. Sadang gumios kita uyon ha iya gugma ha espisipiko nga mga paagi. Salit importante nga tagdon naton ini nga pakiana, ‘Paonan-o ko maipapakita an akon gugma ha Dios?’ An baton mababasa ha giniyahan nga mga pulong ni apostol Juan: “Amo ini an gugma han Dios, nga pagtumanon ta an iya mga sugo; ngan an iya mga sugo diri magbug-at.” (1 Juan 5:3) Sadang naton usisahon  hin maopay an kahulogan hini tungod kay karuyag naton ipakita ha Dios an aton daku gud nga gugma ha iya.

“AMO INI AN GUGMA HAN DIOS”

4, 5. (a) Ano an kahulogan han mga pulong nga “an gugma han Dios”? (b) Isaysay kon paonan-o nagtubo ha imo kasingkasing an gugma kan Jehova.

⁴ “An gugma han Dios”​—ano an ginhuhunahuna ni apostol Juan han ginsurat niya ini? Nangangahulogan ini diri ha gugma han Dios ha aton, kondi ha aton gugma ha iya. Nahinunumdoman mo ba an panahon han nagtikang magtubo an gugma kan Jehova ha imo kasingkasing?

⁵ Pamalandonga anay an siyahan nga higayon nga hinbaroan mo an kamatuoran mahitungod kan Jehova ngan han iya mga katuyoan ngan nagtikang ka magkaada pagtoo. Nasabtan mo nga bisan kon igin-anak ka nga makasasala ngan bulag ha Dios, pinaagi kan Kristo gintagan ka ni Jehova hin higayon nga madangat an kahingpitan nga nawara ni Adan, ngan makapanunod hin kinabuhi nga waray kataposan. (Mateo 20:28; Roma 5:12, 18) Nasantop mo an pagkadaku han sakripisyo ni Jehova ha pagsugoa han iya pinakapresyoso nga Anak basi mamatay para ha imo. Nabantad an imo kasingkasing, ngan nagtikang ka paghigugma ha Dios nga nagpapakita hin daku nga gugma ha imo.​—1 Juan 4:9, 10.

6. (a) Paonan-o naipapakita an tinuod nga gugma? (b) An gugma ha Dios nag-aaghat ha imo nga buhaton an ano?

⁶ Kondi, ito nga pag-abat tinikangan pa la han tinuod nga gugma kan Jehova. An gugma diri pag-abat la; diri man liwat ito ha pulong la. An tinuod nga gugma ha Dios nag-uupod hin labaw pa ha pagsiring, “Hinigugma ko hi Jehova.” Pariho ha pagtoo, an tinuod nga gugma naipapakita pinaagi ha mga buhat. (Jakobo 2:26) Ha espisipiko nga paagi, ipinapakita naton an gugma pinaagi ha mga buhat nga nakakalipay ha aton hinigugma. Salit, kon an gugma kan Jehova nakagamot ha imo kasingkasing, maghihingyap ka nga magkinabuhi ha paagi nga nalilipayan han imo langitnon  nga Amay. Kumusta ka man, bawtismado ka na ba nga Saksi? Kon bawtismado ka na, an imo hilarom nga gugma ngan pagkamaunungon nag-aghat ha imo nga himoon an pinakaimportante nga desisyon ha imo kinabuhi. Igindedikar mo an imo kalugaringon kan Jehova basi buhaton an iya kaburut-on, ngan ginsimbolohan ito pinaagi ha pagpabawtismo. (Roma 14:7, 8) An pagtuman hinin seryoso nga saad kan Jehova nag-uupod han sunod nga gin-unabi ni apostol Juan.

“PAGTUMANON TA AN IYA MGA SUGO”

7. Ano an pipira han sugo han Dios, ngan ano an nahiuupod ha pagtuman hito?

⁷ Iginsaysay ni Juan an kahulogan han gugma ha Dios: “Pagtumanon ta an iya mga sugo.” Ano an mga sugo han Dios? Naghahatag hi Jehova ha aton hin espisipiko nga mga sugo pinaagi han iya Pulong, an Biblia. Pananglitan, igindidiri niya an mga buhat sugad han paghubog, pakighilawas, idolatriya, pangawat, ngan pagbuwa. (1 Korinto 5:11; 6:18; 10:14; Efeso 4:28; Kolosas 3:9) An pagtuman han mga sugo han Dios nag-uupod ha pagkinabuhi uyon ha matin-aw nga mga suruklan han Biblia ha moral.

8, 9. Paonan-o naton mahibabaroan kon ano an nalilipayan ni Jehova bisan ha mga kahimtang diin waray espisipiko nga balaud an Biblia? Paghatag hin ehemplo.

⁸ Kondi, basi mapalipay hi Jehova sadang buhaton naton an labaw pa kay ha pagtuman la han iya espisipiko nga mga sugo. Diri kita niya ginbubut-an pinaagi ha paghatag hin mga balaud ha ngatanan nga bahin han aton adlaw-adlaw nga pagkinabuhi. Salit, kada adlaw bangin umatubang kita hin mga kahimtang diin waray espisipiko nga surundon an Biblia. Ha sugad nga mga kahimtang, paonan-o naton hibabaroan kon ano an makakalipay kan Jehova? An Biblia nagsusulod hin matin-aw nga mga kapahayagan mahitungod han paagi han panhunahuna han Dios. Samtang gin-aadman naton ito, hibabaroan naton kon ano an iya naruruyagan ngan nangangalasan. (Salmo 97:10; Proberbios 6:16-19) Hibabaroan  naton an mga disposisyon ngan buhat nga iya ginpapabilhan. Kon mas hinbabaroan naton an personalidad ngan mga paagi ni Jehova, mas gintutugotan naton an iya panhunahuna nga maggiya ha aton mga desisyon ngan makaimpluwensya ha aton buhat. Salit, bisan ha mga kahimtang nga waray espisipiko nga balaud an Biblia, agsob nga nasasantop naton an “kaburut-on” ni Jehova.​—Efeso 5:17.

⁹ Pananglitan, ha Biblia waray direkta nga sugo nga nagdidiri ha aton ha pagkita hin sine o programa ha TV nga nagpapasalida hin kamadarahog o imoralidad. Kondi nanginginahanglan gud ba kita hin espisipiko nga balaud nga magdidiri ha aton ha pagkita hito? Maaram kita kon paonan-o ito gintatagad ni Jehova. An iya Pulong matin-aw nga nasiring: “An naghihigugma ha paglugos nangalasan han [kan Jehova] kalag.” (Salmo 11:5) Ito liwat nasiring: “An mga makihihilawason ngan an mga paralibog paghuhukman han Dios.” (Hebreo 13:4) Pinaagi ha pagpamalandong hini nga mga teksto, matin-aw nga masasantop naton an kaburut-on ni Jehova. Salit nagdesisyon kita nga diri maliaw ha pagkinita han mga salida nga nagpapakita han mga buhat nga kinangangalasan han Dios. Maaram kita nga nalilipay hi Jehova kon linilikyan naton an kahugawan ha moral nga igin-aaghat hini nga kalibotan sugad nga diri nakakadaot nga kaliawan. a

10, 11. Kay ano nga ginpili naton nga magin masinugtanon kan Jehova, ngan ano nga klase hin pagkamasinugtanon an aton iginhahatag ha iya?

¹⁰ Ano an nangunguna nga hinungdan ha aton pagtuman han mga sugo han Dios? Kay ano nga karuyag naton magkinabuhi kada adlaw uyon ha paagi han panhunahuna han Dios nga aton hinbabaroan? Waray naton pilia an pagbuhat hito basi makalikay la hin sirot o nakakadaot nga mga resulta nga naieksperyensyahan hadton nagbabalewaray han kaburut-on han Dios. (Galasia 6:7) Lugod, gintatagad naton an pagkamasinugtanon kan Jehova sugad nga birilhon nga  higayon ha pagpakita han aton gugma ha iya. Sugad la nga disidido makuha han usa nga bata an pag-uyon han iya amay, karuyag man naton makuha an pag-uyon ni Jehova. (Salmo 5:12) Hiya an aton Amay, ngan hinigugma naton hiya. Waray nakakahatag ha aton hin mas daku nga kalipay o mas hilarom nga katagbaw kay ha paghibaro nga nagkikinabuhi kita ha paagi nga makakahatag ha aton han “pagpaid ni Jehova.”​—Proberbios 12:2.

¹¹ Salit an aton pagkamasinugtanon diri pinirit la; diri man ito namimili o may kondisyon. b Diri kita nagpipili kon ano nga sugo an aton susugton o diri, nagsusugot la kon kombinyente ha aton o kon diri makuri an pagsugot. Ha kabaliktaran, “matinumanon [kita] tikang ha kasingkasing.” (Roma 6:17) Inaabat naton an pariho han gin-abat han salmista nga nagsurat: “Maglilipay ako ngahaw dida ha imo mga sugo, nga akon ginhigugma.” (Salmo 119:47) Oo, karuyag gud naton sugton hi Jehova. Maaram kita nga takos hiya​—ngan nagkikinahanglan—​han aton bug-os ngan waray kondisyon nga pagsugot. (Deuteronomio 12:32) Karuyag naton nga isiring ni Jehova mahitungod ha aton, an ginsiring han Iya Pulong mahitungod kan Noe. Mahitungod hiton matinumanon nga patriarka nga nagpakita hin gugma ha Dios pinaagi ha pagin masinugtanon ha sulod hin damu ka dekada, an Biblia nasiring: “Sugad hini ginbuhat ni Noe; sugad ha ngatanan nga kanan Dios ginsugo ha iya, iya ginbuhat.”​—Genesis 6:22.

12. San-o nakakalipay kan Jehova an aton pagkamasinugtanon?

¹² Ano an inaabat ni Jehova kon kinaburut-on nga nasugot kita ha iya? An iya Pulong nasiring nga aton ‘napapalipay an iya kasingkasing.’ (Proberbios 27:11) Nakakalipay gud ba ha kasingkasing han Soberano nga Ginoo han uniberso an aton pagsugot ha iya? Oo​—ngan may-ada hiya husto nga hinungdan  nga malipay! Ginlarang niya kita nga may kagawasan ha pagbuot. Nangangahulogan ini nga may kagawasan kita ha pagpili; makakapili kita ha pagsugot ha Dios, o ha pagtalapas ha iya. (Deuteronomio 30:15, 16, 19, 20) Kon kinaburut-on nga ginpipili naton nga sugton hi Jehova ngan kon ginhihimo naton ito tungod han hilarom nga gugma ha iya, napapalipay gud naton an aton langitnon nga Amay. (Proberbios 11:20) Hito nga paagi ginpipili liwat naton an gimaopayi nga paagi ha pagkinabuhi.

“AN IYA MGA SUGO DIRI MABUG-AT”

13, 14. Kay ano nga masisiring nga an mga sugo han Dios diri mabug-at, ngan paonan-o ini mahimo iilustrar?

¹³ Mahitungod ha mga igin-oobligar ni Jehova, hi apostol Juan makapadasig nga nagsiring: “An iya mga sugo diri mabug-at.” An usa pa nga hubad hini nasiring: “Diri gud makuri para ha aton an pagtuman han iya mga sugo.” (Maopay nga Sumat) An mga gin-oobligar ni Jehova makatadunganon ngan diri mabangis. c Diri imposible para ha diri hingpit nga mga tawo an pagtuman han iya mga balaud.

¹⁴ Mahimo naton iilustrar ito hini nga paagi. Usa nga duok nga sangkay an nagpabulig ha imo ha iya pagbalhin hin urukyan. Damu an kahon nga kinahanglan ibalhin. An iba hito magaan ngan maaakos hin usa la ka tawo, kondi an iba mabug-at ngan kinahanglan duha an mag-alsa. Ginpili han imo sangkay an mga kahon nga karuyag niya ipaalsa ha imo. Paaalsahon ka ba niya hin mga kahon nga maaram hiya nga diri mo maaakos? Diri. Diri hiya maruruyag nga mabaldado ka tungod ha pag-alsa nga nag-uusahan. Ha pariho nga paagi, an aton maloloy-on ngan mahigugmaon nga Dios diri naghahangyo ha aton ha pagtuman hin mga sugo nga makuri hinduro sundon. (Deuteronomio 30:11-14) Diri gud kita  niya hahangyoon ha pagdara hin sugad kabug-at nga pinas-an. Maaram hi Jehova han aton mga limitasyon tungod kay ‘hiya nakilala han aton panlawas; nahinunumdom nga tapotapo kita.’​—Salmo 103:14.

15. Kay ano nga makakasarig kita nga an mga sugo ni Jehova para gud ha aton kaopayan?

¹⁵ An mga sugo ni Jehova diri gud mabug-at; para gud ito ha aton kaopayan. (Isaias 48:17) Tungod hito, hi Moises nagsiring ha kadaan nga Israel: “Hi Jehova nagsugo ha amon pagtuman hini ngatanan nga mga kasugoan, pagkahadlok kan Jehova, nga aton Dios, ha amon kaopayan gihapon nga iya kami mapadayon nga buhi, sugad han iyo nakita hini nga adlaw.” (Deuteronomio 6:24) Makakasarig liwat kita nga ha paghatag ni Jehova han iya mga balaud, interesado hiya han aton nagpapadayon ngan waray tubtoban nga kaopayan. Ha pagkatinuod, imposible gud nga magsugo hi Jehova hin makakadaot ha aton. Waray tubtoban an iya kinaadman. (Roma 11:33) Salit maaram hiya han makakaopay gud ha aton. Hiya liwat an personipikasyon han gugma. (1 Juan 4:8) Gugma, an iya nangunguna nga kalidad, an nagpapagios ha iya ha ngatanan nga iya ginsisiring ngan ginbubuhat. Ito an basihan han ngatanan niya nga sugo ha iya katawohan.

16. Bisan pa han impluwensya hinin maraot nga kalibotan ngan han mga hilig han aton pagkadiri-hingpit, kay ano nga posible pa gihapon kita magin masinugtanon?

¹⁶ Diri ini nagpapasabot nga masayon an pagsugot ha Dios. Kinahanglan naton atohan an impluwensya hinin maraot nga kalibotan nga ‘kanan yawa.’ (1 Juan 5:19) Sadang liwat naton atohan an pagkadiri-hingpit nga nag-aaghat ha aton nga talapason an mga balaud han Dios. (Roma 7:21-25) Kondi an aton gugma ha Dios mahimo maglampos. Ginbibendisyonan ni Jehova adton nagpapakita han ira gugma ha iya pinaagi ha pagkamasinugtanon. Iya iginhahatag an iya baraan nga espiritu “ha mga nagsusugot ha iya.” (Buhat 5:32) Tungod hito nga espiritu nakukultibar naton an mag-opay hinduro  nga bunga​—presyoso nga mga kalidad nga makakabulig ha aton nga magin masinugtanon.​—Galasia 5:22, 23.

17, 18. (a) Ano an aton uusisahon dinhi hini nga libro, ngan samtang ginbubuhat ito, ano an sadang naton hinumdoman? (b) Ano an paghihisgotan ha sunod nga kapitulo?

¹⁷ Dinhi hini nga libro, uusisahon naton an kan Jehova mga prinsipyo ngan suruklan ha moral ngan an damu pa nga kapahayagan han iya kaburut-on. Samtang gin-uusisa naton ini, kinahanglan naton hunahunaon an pipira nga importante nga butang. Hinumdoman naton nga diri kita ginpipirit ni Jehova nga sundon an iya mga balaud ngan prinsipyo; karuyag niya an kinaburut-on nga pagsugot nga nagtitikang ha kasingkasing. Diri naton hingalimtan nga ginhahangyo kita niya nga magkinabuhi ha paagi nga magriresulta ha hura nga bendisyon yana ngan magtutugway ha waray kataposan nga kinabuhi ha tidaraon. Ngan tagdon naton an aton kinasingkasing nga pagkamasinugtanon sugad nga presyoso nga higayon ha pagpakita nga hinigugma gud naton hi Jehova.

¹⁸ Basi hibaroan an husto ngan sayop, mahigugmaon nga gintagan kita ni Jehova hin konsensya. Kondi, basi magin masasarigan nga giya, kinahanglan ito bansayon sugad han paghihisgotan ha sunod nga kapitulo.

[Mga footnote]

ANO AN IMO BATON?

▪ Ano nga klase hin pagkamasinugtanon an ginlalaoman ni Jehova ha iya mga magsiringba, ngan kay ano nga para gud ito ha aton kaopayan?​—Deuteronomio 5:28-33.

▪ Mationan-o kaimportante kan Jehova an aton pagkamasinugtanon?​—1 Samuel 15:22, 23.

▪ Ano nga leksyon an aton mahibabaroan ha pagkamasinugtanon ni Jesus ha Dios?​—Juan 8:29.

▪ Kay ano nga husto gud nga sugton naton hi Jehova?​—Pahayag 4:11.

[Mga Pakiana]

 [Bug-os-pahina nga retrato ha pahina 4]

[Retrato ha pahina 6]

An dedikasyon ngan bawtismo tigaman han tinikangan han pagkinabuhi nga nagpapakita hin gugma ngan pagkamasinugtanon kan Jehova