Kapitulo 93

Kon Igpahayag na an Anak han Tawo

HAN nakadto pa hi Jesus ha norte (bangin ha Samaria o ha Galilea), nagpakiana ha iya an mga Pariseo mahitungod han pag-abot han Ginhadian. Natoo hira nga maabot ito nga may magarbo nga parada ngan seremonya, pero nagsiring hiya: “Diri ngatanan makakakita han pag-abot han Ginhadian han Dios. An mga tawo diri masiring, ‘Kitaa niyo didi!’ o ‘Didto!’ Kay an Ginhadian han Dios aada ha butnga niyo.”

An ginsiring ni Jesus nga “aada ha butnga niyo” danay iginhuhubad nga “aada ha sulod niyo.” Salit kahuna han iba nga an iya karuyag sidngon nga nagmamando an Ginhadian han Dios ha kasingkasing han mga surugoon han Dios. Pero matin-aw nga an Ginhadian han Dios waray dida ha kasingkasing han diri natoo nga mga Pariseo nga kaistorya ni Jesus. Kondi aada ito ha butnga nira, kay an pinili nga Hadi han Ginhadian han Dios, hi Jesu-Kristo, nakada kaupod mismo nira.

Posible nga pagbaya han mga Pariseo nagpadayon hi Jesus ha pag-istorya ha mga disipulo mahitungod ha pag-abot han Ginhadian. Nahuhunahuna niya an iya tidaraon nga pagmando ha Ginhadian han hiya nagpahamangno: “An mga tawo masiring ha iyo, ‘Kitaa niyo didto!’ o ‘Kitaa niyo didi!’ Ayaw kamo paggawas o paglanat [hinin buwa nga mga Mesias]. Kay pariho han kidlat nga naglalamrag tikang ha usa nga bahin ha ilarom han langit tubtob ha luyo nga bahin, magigin sugad liwat hito an Anak han tawo.” Iginpapasabot niya nga pariho han kidlat nga nakikita bisan ha hirayo, sugad man an ebidensya han iya presensya ha pagmando ha Ginhadian makikita hin matin-aw han ngatanan nga naruruyag makakita hito.

Nag-unabi hi Jesus hin kapariho nga mga panhitabo ha naglabay basi ipakita an paggawi han mga tawo ha panahon han iya presensya ha tidaraon. Nagsaysay hiya: “An nahitabo ha mga adlaw ni Noe mahitatabo liwat ha mga adlaw han Anak han tawo . . . Pariho liwat hito an nahitabo ha panahon ni Lot: Okupado an mga tawo ha pagpinangaon, pagpinanginom, pagpinamalit, pagpinamaligya, pagpinananom, ngan pagpinanhimo hin balay. Pero ha adlaw han paggawas ni Lot ha Sodoma, inuran hin kalayo ngan asupre tikang ha langit ngan namatay hira ngatanan. Pariho liwat hito an mahitatabo ha panahon kon igpahayag na an Anak han tawo.”

Diri iginpapasabot ni Jesus nga an mga tawo ha panahon ni Noe ngan ni Lot ginbungkag tungod la kay nagpadayon hira han adlaw-adlaw nga buruhaton sugad han pagpinangaon, pagpinanginom, pagpinamalit, pagpinamaligya, pagpinananom, ngan pagpinanhimo hin balay. Bisan hira Noe ngan Lot ngan an ira pamilya nagbuhat liwat hito. Pero samtang ginbubuhat han iba ito nga adlaw-adlaw nga buruhaton, waray hira maghatag hin atensyon ha kaburut-on han Dios, ngan ito an rason nga ginbungkag hira. Ito liwat an rason nga bubungkagon an mga tawo kon igpahayag na an Kristo durante han daku nga kasakitan hini nga sistema.

Basi pabug-atan nga importante gud nga gumios dayon uyon ha ebidensya han iya tidaraon nga presensya ha pagmando ha Ginhadian, nagsiring hiya: “Hito nga panahon, an aadto ha atop han balay diri lumusad pagkuha han iya mga gamit ha sulod han balay, ngan an aadto ha uma diri liwat umuli pagkuha han mga butang nga iya ginbayaan. Hinumdumi niyo an asawa ni Lot.”

Kon makita na an ebidensya han presensya han Kristo, diri sadang magpaulang an mga tawo ha paggios dayon tungod han pag-awil ha ira mga panag-iya. Han tigawas na ha Sodoma, posible nga liningi an asawa ni Lot kay naawil hiya ha mga butang nga ginbayaan, salit nagin harigi nga asin hiya.

Nagsaysay pa hi Jesus ha mga disipulo han magigin sitwasyon ha panahon han iya presensya ha tidaraon. Nagsiring hiya: “Hito nga gab-i may duha nga tawo ha usa nga higdaan; an usa kukuhaon pero an usa babayaan. May duha nga babaye nga naggigiling ha usa nga gilingan; an usa kukuhaon pero an usa babayaan.”

An pagkuhaa katugbang ha pagsulod ni Noe ngan han iya pamilya ha arka pati ha pagdara han anghel kan Lot ngan han iya pamilya tipagawas ha Sodoma. Nangangahulogan ito hin katalwasan. Pero an pagbayai nangangahulogan hin kabungkagan.

Hito nga takna, nagpakiana an mga disipulo: “Diin, Ginoo?”

“Kon hain an lawas, didto matitirok an mga agila,” binaton hi Jesus. An mga “kukuhaon” para matalwas pariho han mga agila nga nakakakita ha hirayo salit nagtitirirok hira ha “lawas.” An lawas amo an totoo nga Kristo ha iya diri nakikita nga presensya ha pagmando ha Ginhadian ngan amo liwat an espirituwal nga piyesta nga igin-aandam ni Jehova. Lucas 17:20-37; Genesis 19:26.

▪ Kay ano nga an Ginhadian aada ha butnga han mga Pariseo?

▪ Kay ano nga an presensya han Kristo iginpariho ha kidlat?

▪ Kay ano nga bubungkagon an mga tawo durante han presensya han Kristo tungod han ira mga buhat?

▪ Ano an kahulogan han pagkuhaa ngan pagbayai?