Kapitulo 81

Gin-ikaparatay na Liwat hi Jesus

KATHAGKOT adto salit didto hi Jesus naglalakat-lakat ha aragian nga may atop nga tinatawag nga portiko ni Solomon ha ligid han templo. Didto ginpalibotan hiya han mga Judio ngan nagsiring: “San-o mo kami susumatan han kamatuoran? Kon ikaw an Kristo, prangka nga sumati kami.”

Binaton hi Jesus: “Ginsumatan ko na kamo, pero diri kamo natuod.” Waray niya isumat hin direkta ha ira nga hiya an Kristo, sugad han iya iginsumat ha Samaritana ha may atabay. Pero sugad hin iginsumat na niya kon hin-o hiya han iginsaysay niya nga tikang hiya ha igbaw ngan buhi na antes pa matawo hi Abraham.

Karuyag ni Jesus nga an mga tawo mismo an makasantop nga hiya an Kristo pinaagi ha pagtanding han iya mga ginbubuhat ha igintagna ha Biblia nga pagbubuhaton han Kristo. Salit gintugon niya an mga disipulo nga diri gud magsumat ha bisan hin-o nga hiya an Kristo. Ngan ito an hinungdan nga ginsidngan niya an nakontra nga mga Judio: “An mga ginbubuhat ko ha ngaran han akon Amay nagpapamatuod mahitungod ha akon. Pero diri kamo natuod.”

Kay ano nga diri hira natoo? Tungod ba kay kulang hin ebidensya nga hi Jesus an Kristo? Diri. Iginsumat niya an rason: “Diri ko kamo mga karnero. An akon mga karnero namamati han akon tingog. Kilala ko hira, ngan nasunod hira ha akon. Gintatagan ko hira hin kinabuhi nga waray kataposan. Diri gud hira mamamatay, ngan waray bisan hin-o nga mag-aagaw ha ira tikang ha akon kamot. An iginhahatag ha akon han Amay mas importante gud kay ha iba nga mga butang, ngan waray makakaagaw ha ira tikang ha kamot han Amay.”

Katapos iginsaysay ni Jesus an iya duok nga relasyon ha iya Amay: “Ako ngan an Amay uusa.” Tungod kay hito nga panahon nakanhi hiya ha tuna samtang an iya Amay aadto ha langit, matin-aw nga diri niya iginpapasabot nga literal o pisikal nga uusa hiya ngan an iya Amay. Lugod, karuyag niya sidngon nga usa an ira katuyoan, ngan nagkakahiusa hira.

Nasina an mga Judio ha ginsiring ni Jesus salit namurot hira hin mga bato basi patayon hiya, sugad han ira ginhimo durante han Piyesta han mga Tabernakulo, o mga Payag. Waray kahadlok nga gin-atubang niya an mga nag-iikaparatay ha iya, ngan ginsidngan: “Nagpakita ako ha iyo hin damu nga mag-opay nga buhat tikang ha Amay. Hain hito nga mga buhat an hinungdan nga iyo ako babatuhon?”

Binaton an mga Judio: “Babatuhon ka namon diri tungod ha maopay nga buhat, kondi tungod ha pagpasipara, kay nasiring ka nga usa ka nga dios bisan kon tawo ka la.” Waray mag-angkon hi Jesus nga dios hiya, pero kay ano nga ito an ira ginsiring?

Matin-aw nga tungod ito ha ginsiring ni Jesus nga may gahum hiya, kay natoo an mga Judio nga Dios la an may-ada hito. Pananglitan, mahitungod ha “mga karnero,” nagsiring hiya nga “gintatagan ko hira hin kinabuhi nga waray kataposan,” nga diri mahihimo han bisan hin-o nga tawo. Kondi ginbalewaray han mga Judio an iya ginsiring nga gintagan hiya hin awtoridad han iya Amay.

Basi ipakita nga ubos hiya ha Dios, nagpakiana hiya: “Diri ba nahisurat ha iyo Balaud [ha Salmo 82:6], ‘Nagsiring ako: “Mga dios kamo”’? Kon gintawag niya nga ‘mga dios’ adton ginhukman han pulong han Dios, . . . kay ano nga ako nga ginbaraan ngan ginsugo han Amay nganhi ha kalibotan ginsisidngan niyo, ‘Nagpapasipara ka,’ kay nagsiring ako nga Anak ako han Dios?”

Tungod kay ha Kasuratan gintatawag nga “mga dios” bisan an mga tawo nga hukom nga diri magtadong, ano an nakita han mga Judio nga sayop ha ginsiring ni Jesus nga “Anak ako han Dios”? Nagsiring pa hiya: “Kon diri ko ginbubuhat an buruhaton han akon Amay, ayaw kamo pagtuod ha akon. Pero kon ginbubuhat ko ito, bisan kon diri kamo natuod ha akon ginsisiring, tuod kamo tungod han akon mga buhat basi mahibaroan niyo ngan masabtan hin maopay nga an Amay kahiusa ko ngan ako kahiusa han Amay.”

Han ginsiring ito ni Jesus, nagsari pag-aresto ha iya an mga Judio. Pero linikay hiya, sugad han iya ginhimo ha Piyesta han mga Tabernakulo. Binaya hiya ha Jerusalem ngan tinabok ha Salog Jordan ha dapit diin nagtikang hi Juan ha panbawtismo haros upat ka tuig na an naglabay. Ito nga lugar posible nga diri hirayo ha sur nga baybayon han Dagat han Galilea nga duha ka adlaw o sobra pa nga pagbaktas tikang ha Jerusalem.

Damu an kinadto kan Jesus hito nga lugar ngan nagsiring: “Hi Juan waray gud paghimo hin bisan usa nga milagro, pero totoo an ngatanan nga ginsiring ni Juan mahitungod hini nga tawo.” Salit damu didto an tinoo kan Jesus. Juan 10:22-42; 4:26; 8:23, 58; Mateo 16:20.

▪ Ha ano nga paagi karuyag ni Jesus nga masantop han mga tawo nga hiya an Kristo?

▪ Ha ano nga paagi uusa hi Jesus ngan an iya Amay?

▪ Kay ano nga nakasiring an mga Judio nga nagpapakadios hi Jesus?

▪ Han ginkotar ni Jesus an Salmo, paonan-o niya iginpakita nga diri hiya nag-aangkon nga katupong hiya han Dios?