Usa ka Tuna nga Waray Na Pag-antus
Bahin 2
Usa ka Tuna nga Waray Na Pag-antus
1, 2. Ano an kaiba nga panhunahuna han kadam-an nga mga tawo?
KONDI, kaiba gud an panhunahuna han minilyon nga mga tawo ha bug-os nga kalibotan. Nakikita nira nga daan an usa ka urosahon nga kabubuwason para han katawohan. Nasiring hira nga dinhi mismo ha tuna ha diri na mag-iiha magkakaada hin usa nga kalibotan nga bug-os nga talwas tikang ha karautan ngan pag-antus. Nasarig hira nga ha diri na mag-iiha pagwawad-on an maraut ngan matutukod an usa ka bug-os bag-o nga kalibotan. Nasiring pa ngani hira nga iginbubutang na an pundasyon hinin bag-o nga kalibotan yana mismo!
2 Natoo ini nga mga tawo nga an bag-o nga kalibotan matatalwas tikang ha girra, kabangis, krimen, pagtalumpigos, ngan kakablas. Magigin usa nga kalibotan ito nga waray sakit, kabidoan, mga luha, ngan bisan kamatayon. Hiton nga panahon an katawohan magtutubo ha kahingpitan ngan mabubuhi ha waray kataposan ha kalipayan ha usa ka tunan-on nga paraiso. Aw, adton nagkamatay na babanhawon pa ngani ngan magkakaada higayon nga mabuhi ha waray kataposan!
3, 4. Kay ano nga may pagsarig an sugad nga mga tawo mahitungod han ira panhunahuna?
3 Ini ba nga panhunahuna han kabubuwason usa la nga inup, usa la nga panhunahuna nga diri matutuman? Diri, diri gud. Gintukod ito ha marig-on nga pundasyon han pagtoo nga inin tiarabut nga Paraiso sigurado nga maabut. (Hebreo 11:1) Kay ano nga sigurado gud ito? Tungod kay an makagagahum nga Maglalarang han uniberso an nagsaad hito.
4 Mahitungod han mga saad han Dios, an Biblia nasiring: “Waray usa nga pulong nga nakawang han ngatanan magopay nga mga pulong nga kan Jehova nga iyo Dios iginyakan ha iyo. An ngatanan natuman para ha iyo. Waray usa nga pulong nga nakawang.” “An Dios diri tawo nga hiya sadang magbuwa . . . Nagsiring hiya ngan diri ba ito niya bubuhaton, o hiya nagyakan ngan diri ba ito niya tutumanon?” “Hi Jehova han mga kasondalohan nagsumpa ha pagsiring: ‘Ha waray ruhaduha sugad han akon nahunahuna, amo man an mahananabu; ngan sugad han akon gintuyo, amo man an matindug.’ ”—Josue 23:14; Numeros 23:19; Isaias 14:24.
5. Ano nga mga pakiana an kinahanglan batunon?
5 Kondi, kon an katuyoan han Dios amo an pagtukod hin tunan-on nga paraiso nga talwas tikang ha pag-antus, kay ano nga tinutugotan niya an magraut nga mga butang nga mahitabu? Kay ano nga naghulat hiya hin unom ka yukot ka tuig tubtub yana ha pagtadong han sayop? Diri ba iginpapasabut hiton nga mga siglo han pag-antus nga an Dios tinuod nga diri nagtatagad ha aton, o diri naeksistir pa ngani hiya?
[Mga Pakiana]
