Bahin 5

An Urosahon nga Regalo han Luwas nga Pagbuot

1, 2. Ano iton urosahon nga regalo an bahin han aton pagkahimo?

 BASI hisabtan kon kay ano nga gintugotan han Dios an pag-antus ngan kon ano an iya pagbubuhaton mahitungod hito, kinahanglan apresyaron naton kon paonan-o kita ginhimo niya. Ginbuhat niya an labaw pa kay han paglarang ha aton upod an usa ka lawas ngan usa ka utok. Ginlarang liwat kita niya upod an espisyal nga mga kalidad ha hunahuna ngan emosyon.

² An importante nga bahin han aton hunahuna ngan emosyonal nga pagkahimo amo an luwas nga pagbuot. Oo, iginbutang han Dios ha aton an abilidad han kaluwasan ha pagpili. Tinuod nga usa ka urosahon ito nga regalo tikang ha iya.

Kon Paonan-o Kita Ginhimo

3-5. Kay ano nga inaapresyar naton an luwas nga pagbuot?

³ Tagdon naton kon paonan-o an luwas nga pagbuot nahiupod ha pagtugot han Dios han pag-antus. Siyahan, hunahunaa ini: Inaapresyar mo ba an pagkaada hin kaluwasan ha pagpili han imo bubuhaton ngan sisidngon, han imo kakaonon ngan isusul-ut, kon ano nga klase hin buruhaton an imo pagbubuhaton, ngan kon diin ngan kon paonan-o ka magkikinabuhi? O karuyag mo nga an usa magdikta han tagsa mo nga pulong ngan buhat ha tagsa nga takna han imo kinabuhi?

⁴ Waray normal nga tawo an maruruyag nga mawaray na hiya bug-os nga gahum ha iya kinabuhi. Kay ano? Tungod han paagi han paghimo ha aton han Dios. An Biblia nagsusumat ha aton nga ginhimo han Dios an tawo ha iya ‘ladawan ngan panagway,’ ngan usa han mga abilidad nga mayada an Dios mismo amo an kaluwasan ha pagpili. (Genesis 1:26; Deuteronomio 7:6) Han larangon niya an mga tawo, iya tinagan hira hiton pariho urosahon nga abilidad​—an regalo han luwas nga pagbuot. Iton an usa nga rason kon kay ano nga masurub-on para ha aton an mauripon han matalumpiguson nga mga magmarando.

⁵ Salit an hingyap hin kaluwasan diri aksidente, kay an Dios amo an Dios han kaluwasan. An Biblia nasiring: “Kon hain an espiritu ni Jehova, aadto man an kaluwasan.” (2 Korinto 3:17) Salit, an Dios naghatag ha aton hin luwas nga pagbuot sugad nga bahin  han aton pagkahimo. Tungod kay maaram hiya kon paonan-o magios an aton mga hunahuna ngan mga emosyon, maaram hiya nga magmamalipayon gud kita tungod han luwas nga pagbuot.

6. Paonan-o ginlarang han Dios an aton utok ha pagbuhat uyon han luwas nga pagbuot?

⁶ Upod han regalo han luwas nga pagbuot, tinagan kita han Dios han abilidad ha paghunahuna, pagturotimbang han mga bagay-bagay, paghimo hin mga desisyon, ngan paghibaro han husto tikang ha sayop. (Hebreo 5:14) Salit, an luwas nga pagbuot igbabasar ha maaramon nga pagpili. Waray kita himoa pariho han waray-hunahuna nga mga robot nga waray kalugaringon nga pagbuot. Waray man kita himoa nga gumios pinaagi han kinaiya sugad han mga hayop. Lugod, an aton urosahon nga utok dinisenyo ha pagbuhat uyon han aton kaluwasan ha pagpili.

An Gimaopayi nga Tinikangan

7, 8. Ano iton maopay nga tinikangan an iginhatag han Dios ha aton siyahan nga mga ginikanan?

⁷ Ha pagpakita kon paonan-o nagtatagad an Dios, pinaagi han regalo han luwas nga pagbuot, an aton siyahan nga mga ginikanan, hi Adan ngan Eva, tinagan han ngatanan nga butang nga karuyag han bisan hin-o. Iginbutang hira ha usa ka haluag, sugad-parke nga paraiso. Abunda hira ha materyal nga mga butang. Mayada hira hingpit nga hunahuna ngan lawas, salit diri hira malalagas o magkakasakit o mamamatay​—mabubuhi hira ha waray kataposan. Magkakaada hira hingpit nga mga anak nga magkakaada liwat hin malipayon, waray kataposan nga kabubuwason. Ngan an nagdadamu nga populasyon magkakaada makapatagbaw nga buruhaton ha paghimo han tuna nga usa ka paraiso.​—Genesis 1:​26-30; 2:15.

⁸ Mahitungod han mga tagana, an Biblia nasiring: “Ngan an Dios nakakita han ngatanan nga iya ginhimo ngan, kitaa! ito duro hin kaopay.” (Genesis 1:31) An Biblia nasiring liwat mahitungod han Dios: “An iya mga buhat hingpit.” (Deuteronomio 32:4) Oo, an Maglalarang naghatag ha tawhanon nga pamilya hin hingpit nga tinikangan. Maoroopay gud unta ito. Usa ka Dios hiya nga nagtatagad!

Kaluwasan ha Sulud han mga Tubtuban

9, 10. Kay ano nga an luwas nga pagbuot kinahanglan mandoan hin maopay?

⁹ Kondi, gintuyo ba han Dios an luwas nga pagbuot nga waray mga tubtuban? Hunahunaa la an usa ka sibut nga siyudad nga waray mga balaud ha trapiko, diin an ngatanan makakagmaneho ha bisan diin nga direksion ha bisan ano nga kalaksi. Karuyag mo ba magmaneho ha sugad nga mga kahimtang? Diri, sigurado nga magsasamok an trapiko ngan magreresulta ito ha damu nga aksidente.

¹⁰ Sugad man an regalo han Dios han luwas nga pagbuot. An waray tubtuban nga kaluwasan mangangahulogan hin kasamok ha sosiedad. Kinahanglan mayada mga balaud nga maggigiya ha mga buruhaton han tawo. An Pulong han Dios nasiring: “Mag-ukoy kamo sugad nga linuwas nga mga tawo, ngan diri niyo gamiton an iyo pagkalinuwas nga pasangilan ha pagbuhat hin maraut.” (1 Pedro 2:​16, JB) Karuyag han Dios nga pagmandoan an luwas nga pagbuot para han kaopayan han ngatanan. Gintuyo niya para ha aton nga magkaada diri bug-os nga kaluwasan, kondi relatibo nga kaluwasan, ilarum han pagmando han balaud.

Kan Kanay mga Balaud?

11. Dinisenyo kita basi sundon an kan kanay mga balaud?

¹¹ Dinisenyo kita basi sundon an kan kanay mga balaud? Usa pa nga bahin han teksto ha 1 Pedro 2:16  (JB) nasiring: “Diri kamo uripon han bisan hin-o kondi han Dios.” Diri ini nangangahulogan hin matalumpiguson nga pagkauripon, kondi, lugod, nangangahulogan ito nga dinisenyo kita basi magmalipayon ha pagpasakop ha mga balaud han Dios. (Mateo 22:​35-40) An iya mga balaud, labaw han anoman nga mga balaud nga hinimo han mga tawo, naghahatag han gimaopayi nga giya. “Ako, hi Jehova, nga imo Dios, nga nagtututdo ha imo ha pagpahimulos, nga nagmamando ha imo ha dalan nga imo paglalaktan.”​—Isaias 48:17.

12. Ano nga kaluwasan ha pagpili mayada kita ha sulud han mga balaud han Dios?

¹² Ha pariho nga panahon, an mga balaud han Dios nagtutugot hin daku nga kaluwasan ha pagpili ha sulud han mga tubtuban. Nagreresulta ini ha pagkaibaiba ngan naghihimo han tawhanon nga pamilya nga makaruruyag. Hunahunaa la an magkalainlain nga klase hin pagkaon, panapton, musika, arte, ngan mga balay ha bug-os nga kalibotan. Sigurado nga karuyag naton pumili ha sugad nga mga butang imbes nga iba nga tawo an magbuot para ha aton.

13. Ano iton pisikal nga mga balaud an kinahanglan sundon naton para han aton kalugaringon nga kaopayan?

¹³ Salit ginlarang kita basi magmalipayon kon nagpapasakop ha mga balaud han Dios para han buruhaton han tawo. Sugad man ha pagpasakop ha pisikal nga mga balaud han Dios. Pananglitan, kon aton igbalewaray an balaud han gravity o bug-at ngan lumukso kita ha hitaas nga lugar, masusul-an kita o mamamatay. Kon aton igbalewaray an mga balaud ha sulud han aton lawas ngan diri kumaon hin pagkaon, uminom hin tubig, o guminhawa hin hangin, mamamatay kita.

14. Paonan-o kita nahibaro nga waray himoa an mga tawo nga magin independente ha Dios?

¹⁴ Sugad la nga ginlarang kita upod an panginahanglan han pagpasakop ha pisikal nga mga balaud han Dios, ginlarang kita upod an panginahanglan han pagpasakop ha moral ngan sosyal nga mga balaud han Dios. (Mateo 4:4) Waray himoa an mga tawo nga magin independente ha ira Parahimo ngan magmalampuson. Hi propeta Jeremias nasiring: “Diri aada ha tawo nga naglalakat an pagmando han iya mga pitad. Waydongi ako, O Jehova.” (Jeremias 10:​23, 24) Salit ha tagsa nga paagi ginlarang an mga tawo basi mabuhi ilarum han pagmando han Dios, diri ha ira kalugaringon.

15. Mabug-at ba unta an mga balaud han Dios para kan Adan ngan Eva?

¹⁵ An pagsunod ha mga balaud han Dios diri gud unta mabug-at para han aton siyahan nga mga ginikanan. Lugod, nakahimo unta ito para han ira kaopayan ngan para han bug-os tawhanon nga pamilya. Kon an siyahan nga mag-asawa nagpabilin unta ha sulud han mga tubtuban han mga balaud han Dios, maopay unta an ngatanan. Ha pagkamatuod, nagkikinabuhi unta kita yana ha usa ka urosahon nga paraiso han kalipay sugad nga mahigugmaon, nagkakaurosa tawhanon nga pamilya! Waray unta karautan, pag-antus, ngan kamatayon.

[Mga Pakiana]

[Retrato ha pahina 11]

An Maglalarang naghatag ha mga tawo hin hingpit nga tinikangan

[Retrato ha pahina 12]

Karuyag mo ba magmaneho ha lugar nga duro an trapiko kon waray mga balaud ha trapiko?