KON mamatay ka, ano daw la an aabaton han imo nanay kon mabuhi ka utro? Sigurado nga malilipay hiya! Kondi mabubuhi ba utro an tawo nga namatay na? Nahitabo na ba ito hadto?

Kitaa dinhi an lalaki, ngan an babaye ngan an bata. An lalaki amo hi propeta Elias. An babaye usa nga balo ha syudad han Sarepat, ngan anak niya an bata. Usa ka adlaw, nagkasakit an bata. Nagtikagrabe gud an iya sakit ngan namatay hiya. Katapos, nagsiring hi Elias ha babaye: ‘Ihatag ha akon an bata.’

Iginhatag han babaye an patay nga bata ngan gindara ito ni Elias ha igbaw nga kwarto ngan iginbutang ha higdaan. Katapos, hi Elias nag-ampo: ‘O Jehova, buhia utro an bata.’ Ngan an bata gininhawa! Dida hito, gindara ni Elias an bata ha ubos ngan nagsiring ha babaye: ‘Kitaa, buhi an imo anak!’ Salit nalipay gud an nanay.

Usa pa nga importante nga propeta han Dios amo hi Eliseo. Hiya an kabulig ni Elias. Kondi inabot an panahon nga ginpabuhat liwat ni Jehova hi Eliseo hin mga milagro. Usa ka adlaw, kinadto hi Eliseo ha syudad han Sunem, diin may-ada babaye nga buotan gud ha iya. Ha urhi, ini nga babaye nagkaada anak nga lalaki.

Usa ka aga, han durodaku na an bata, inupod hiya ha iya tatay ha pagtrabaho ha uma. Tigda la nga ginuliat an bata: ‘Masakit an akon ulo!’ Igin-uli an bata, ngan waray pag-iha namatay ito. Nasubo gud an iya nanay! Salit linakat dayon an iya nanay ngan ginhangyo hi Eliseo nga umupod ha iya.

Pag-abot ni Eliseo, kinadto hiya ha kwarto han patay nga bata. Nag-ampo hiya kan Jehova, ngan tinungbaw hiya ha bata. Waray pag-iha, nagpaso an lawas han bata, ngan hinatsing ito hin pito ka beses. Nalipay gud an nanay hini nga bata han sinulod hiya ha kwarto ngan nakita nga buhi an iya anak!

Damu nga tawo an nagkamatay na. Tungod hito nasubo gud an ira pamilya ngan kasangkayan. Waray kita gahum ha pagbanhaw han mga patay. Kondi may-ada gahum hi Jehova. Mahibabaroan naton kon paonan-o niya babanhawon an minilyon nga tawo nga nagkamatay.