KITAA an tuna dinhi! Makaruruyag gud an ngatanan! Kitaa an kabanwaan, kakahoyan, mga bukad ngan mga hayop. Nakikita mo ba an mga elepante ngan leon?

Paonan-o ginhimo inin makaruruyag nga hardin? Aton kitaon kon paonan-o igin-andam han Dios an tuna para ha aton.

Siyahan, ginlarang han Dios an berde nga kabanwaan basi matabonan an tuna. Ngan iya ginhimo an ngatanan nga klase hin tanom ngan kakahoyan. Tungod hito, nagin maopay gud pagkit-on an tuna. Kondi may-ada pa ito iba nga kaopayan. Damu hito an naghahatag ha aton hin magrasa nga pagkaon.

Katapos, ginhimo han Dios an mga isda basi lumangoy ha katubigan ngan an mga tamsi basi lumupad ha kalangitan. Ginhimo niya an mga ayam, misay ngan kabayo; an dagku ngan gudtiay nga hayop. Ano nga mga hayop an nakikita ha iyo lugar? Nalilipay kita nga ginhimo han Dios ini ngatanan para ha aton, diri ba?

Ha urhi, ginhimo han Dios an usa nga bahin han tuna nga makaruruyag gud. Gintawag niya ito nga hardin han Eden. Maopay gud ito. Makaruruyag an ngatanan nga aada hito. Ngan karuyag han Dios nga an bug-os nga tuna magin pariho hiton maopay nga hardin nga iya ginhimo.

Kondi, kitaa utro an retrato hito nga hardin. Maaram ka ba kon ano an kulang nga nakita han Dios? Aton kitaon.