AGIDAW! Ano ini nga ginbubuhat han mga tawo? Nag-aampo hira ha baka! Kay ano nga ginbubuhat nira ini?

Han nag-iha hi Moises ha bukid, an mga tawo nagsiring: ‘Diri kita maaram kon ano an nahitabo kan Moises. Salit maghimo kita hin dios nga magpapagawas ha aton tikang hini nga lugar.’

‘Sige,’ siring ni Aaron nga bugto ni Moises. ‘Kuhaa an iyo bulawan nga mga ariyos, ngan dad-a ngadi ha akon.’ Han gindara ito ha iya, gintunaw niya ito ngan ginhimo nga bulawan nga baka. Ngan an katawohan nagsiring: ‘Ini an aton Dios, nga nagtalwas ha aton ha Ehipto!’ Katapos, nagkalipay hira ngan nagsingba ha bulawan nga baka.

Han nakita ini ni Jehova, nasina gud hiya. Salit nagsiring hiya kan Moises: ‘Pagdagmit ngan lusad dayon. Maraot gud an ginbubuhat han katawohan. Hinngalimtan nira an akon mga balaud ngan nagsisingba ha bulawan nga baka.’

Linusad dayon hi Moises. Ngan han hirani na hiya, nakita niya an katawohan nga nagkakaranta ngan nagsasarayaw ha palibot han bulawan nga baka! Nasina gud hi Moises salit iya iginpusdak an duha nga papan nga bato nga ginsuratan han mga balaud, ngan narumok ito. Katapos, iya ginkuha an bulawan nga baka ngan gintunaw ito. Ngan gin-giling niya ito tubtob nga mapulbos.

Maraot gud an ginbuhat han katawohan. Salit ginsugo niya an pipira nga kalalakin-an nga kumuha hin mga espada. ‘An magraot nga katawohan nga nagsingba han bulawan nga baka kinahanglan mamatay,’ siring ni Moises. Salit, 3,000 ka tawo an ginpatay hito nga kalalakin-an! Diri ba ipinapakita hini nga kinahanglan hi Jehova gud la an aton singbahon, diri an bisan ano nga palso nga mga dios?