KITAA an ginbubuhat han mga Israelita dinhi. Okupado hira ha pagtukod han mga pader han Jerusalem. Han ginbungkag ni Hadi Nabukodonosor an Jerusalem 152 ka tuig na an naglabay, ginruba niya an mga pader ngan ginsunog an mga ganghaan han syudad. Waray ito tukora utro han mga Israelita han inuli hira tikang ha Babilonya.

Ha imo hunahuna, ano an inabat han mga tawo nga maiha na nga nangungukoy ha ira syudad nga waray pader? Waray hira seguridad. Masayon la hira sulungon ngan atakehon han ira mga kaaway. Kondi yana binuligan ni Nehemia an katawohan ha pagtukod utro han mga pader. Nakilala ka ba kan Nehemia?

Israelita hi Nehemia nga tikang ha syudad han Susan, diin naukoy hira Mordekay ngan Ester. Nagtatrabaho hi Nehemia ha palasyo han hadi, salit posible nga duok hiya nga sangkay nira Mordekay ngan Rayna Ester. Kondi waray unabiha ha Biblia kon nagtrabaho hiya ha bana ni Ester nga hi Hadi Ahasuerus. Nagtrabaho hiya ha sumunod nga hadi nga amo hi Hadi Artaherhes.

Hinumdumi nga hi Artaherhes an buotan nga hadi nga naghatag han ngatanan nga kwarta nga gindara ni Esra ha Jerusalem basi opayon an templo ni Jehova. Kondi waray ipaopay ni Esra an ruba nga pader han syudad. Aton kitaon kon kay ano nga hi Nehemia an nanguna hini nga pagpader.

Mga 13 ka tuig na tikang nga naghatag hi Artaherhes hin kwarta kan Esra basi opayon an templo. Hito nga panahon hi Nehemia an punoan nga paratagay hin alaksiw kan Hadi Artaherhes. Nangangahulogan ini nga hiya an nagsiserbi han alaksiw han hadi ngan nagsisiguro nga waray maghihilo ha hadi. Importante gud ito nga trabaho.

Usa ka adlaw binisita kan Nehemia an iya bugto nga hi Hanani ngan an iba nga kalalakin-an tikang ha Israel. Ginsumatan nira hiya nga damu an problema han mga Israelita, ngan guba la gihapon an mga pader han Jerusalem. Nasubo gud hini hi Nehemia, salit nag-ampo hiya kan Jehova mahitungod hini.

Usa ka adlaw naobserbahan han hadi nga masurub-on hi Nehemia, salit nagpakiana hiya: ‘Kay ano nga masurub-on ka hinduro?’ Nagsumat hi Nehemia nga tungod ito kay makuri an kahimtang han Jerusalem ngan guba an mga pader hito. ‘Ano an imo karuyag?’ nagpakiana an hadi.

‘Tuguti ako nga kumadto ha Jerusalem basi tindugon ko utro an mga pader,’ siring ni Nehemia. Buotan hinduro hi Hadi Artaherhes. Gintugotan niya hi Nehemia, ngan ginbuligan hiya nga makakuha hin mga kahoy basi gamiton ha pagpader. Han inabot hi Nehemia ha Jerusalem, ginsumatan niya an katawohan han iya mga plano. Naruyagan nira ito, ngan nagsiring: ‘Tikangan na naton an pagpader.’

Han nakita han mga kaaway nga nagpapader na an mga Israelita, nagsiring hira: ‘Kadto kita ngan pamatayon naton hira basi mapaundang an pagpader.’ Kondi hinbaroan ito ni Nehemia, salit pinanagan niya hin mga espada ngan bangkaw an mga trabahador. Ngan hiya nagsiring: ‘Ayaw kamo kahadlok ha aton mga kaaway. Pakig-away kamo para ha iyo kabugtoan, mga anak, mga asawa, ngan para ha iyo mga balay.’

Maisog gud an mga Israelita. Dara-dara nira an ira mga kampilan ha adlaw ngan gab-i, samtang padayon hira nga nagpapader. Salit natapos nira an pader ha sulod la hin 52 ka adlaw. Naabat na yana hin seguridad an mga tawo ha sulod han syudad. Gintutdoan hira ni Nehemia ngan ni Esra mahitungod han balaud han Dios, ngan malipayon hira.

Kondi an ira kahimtang diri la gihapon pariho han waray pa hira mabihag ha Babilonya. Ginmamandoan hira han hadi han Persia ngan kinahanglan magpasakop ha iya. Kondi nagsaad hi Jehova nga magpapadara hiya hin bag-o nga hadi, ngan ini nga hadi an maghahatag hin kamurayawan ha katawohan. Hin-o ini nga hadi? Ano an iya bubuhaton basi magkaada kamurayawan ha kalibotan? Mga 450 ka tuig pa antes hibaroan an dugang nga impormasyon mahitungod hini. Katapos, natawo an pinakaimportante nga bata. Kondi iba ito nga istorya.