Kasagaran na nga nakukombinse han tumuroo nga mga asawa an ira bana ha kamatuoran tungod han ira panggawi nga pariho han kan Kristo Jesus. Pero bangin magpasabot ini nga kinahanglan nira mag-ilob hin mga kakurian ha damu nga katuigan. (1Pe 2:21-23; 3:1, 2) Kon diri maopay an pagtratar ha imo, padayon nga daoga an maraot pinaagi han maopay. (Ro 12:21) An imo maopay nga panggawi bangin magkaada positibo nga epekto nga diri nahihimo han mga pulong la.

Paningkamuti nga masabtan an panhunahuna han imo padis. (Fil 2:3, 4) Ipakita an empatiya ngan pagpaid, ngan himoa an imo pinakamaopay basi matuman an imo responsabilidad sugad nga asawa. Magin andam ha pagpamati. (San 1:19) Magin pasensyoso, ngan pasariga hiya nga hinigugma mo hiya. Bisan kon diri niya iginpapakita ha imo an pariho nga pagkabuotan ngan respeto, makakasarig ka nga ginpapabilhan ni Jehova an imo pagkamatinumanon.​—1Pe 2:19, 20.

KITAA AN VIDEO NGA GINPAPARIG-ON KITA NI JEHOVA BASI MADARA AN ATON PINAS-AN, NGAN BATONA AN MASUNOD:

• Ano an nagin kinabuhi ni Grace Li han bag-o pa la hiya nga inasaw-an?

• Ano an nakapainteres ha iya ha kamatuoran?

• Paonan-o nagpailob hi Sister Li ha mga pagsari katapos niya mabawtismohan?

• Ano an igin-ampo ni Sister Li mahitungod ha iya bana?

• Ano nga mga bendisyon an napahimulosan ni Sister Li tungod han iya putli nga panggawi ngan daku nga respeto?