An mga tawo kasagaran nga namamati ha mensahe han Ginhadian kon igin-iistorya ito ha ira pinulongan. Posible nga ini an rason kon kay ano nga iginpahinabo ni Jehova han Pentekostes 33 C.E. nga hibatian han “debotado nga mga Judio ha Jerusalem nga tikang ha ngatanan nga nasud ha ilarom han langit” an maopay nga sumat ha ira “kalugaringon nga linggwahe” bisan kon posible maaram hira hin komon nga yinaknan, sugad han Hebreo o Griego. (Bu 2:5, 8) Ha mga lugar nga iba-iba an linggwahe, posible nga damu an kongregasyon nga nagamit hin iba nga pinulongan an nakatoka dida hito nga lugar. Paonan-o malilikyan han mga magwarali hito nga mga kongregasyon an diri organisado nga pagsangyaw basi malikyan nga maaringit an mga tagbalay?

• Pagpakiana (Pr 15:22): Sadang mag-uroistorya an mga paramangno han pag-alagad ngan maghimo hin sistematiko nga kahikayan ha pagsangyaw nga mapulsanon gud para ha tanan nga nahidadabi. Kondi kon limitado an ira teritoryo, an mga kongregasyon nga nagamit hin iba nga linggwahe bangin maruyag nga laktawan niyo an mga balay nga an yinaknan han residente pariho han linggwahe han ira kongregasyon. Kondi kon diri nira regular nga nakukobrehan an ira mga teritoryo tungod kay burublag ito ha daku nga lugar, bangin maruyag hira nga diri mo laktawan an mga balay didto pero pahibaroon hira kon may magpakita hin interes. (od 93 ¶37) O mahimo hira maghangyo nga buligan hira han iyo kongregasyon nga makabiling hin mga tawo nga nagyayakan han pinulongan han ira kongregasyon ngan mahimo ihatag ha ira an mga adres hito nga mga interesado. (km 7/12 5, kahon) Hinumdumi nga ha pipira nga sitwasyon, diri la uusa nga linggwahe an ginagamit han mga naukoy han usa nga balay. An mga kahikayan ha pagkobre han mga teritoryo sadang sumunod ha mga balaud nga naglilimita ha pagpasarang han mga impormasyon mahitungod han mga tuminungnong.

• Pakigkooperar (Efe 4:16): Sunda hin maopay an tanan nga instruksyon han iyo paramangno han pag-alagad. Nagdudumara ka ba hin pag-aram ha Biblia ha usa nga an linggwahe diri gin-gagamit han iyo kongregasyon? An estudyante posible mag-uswag hin malaksi kon ibabalhin hiya ha hirani nga kongregasyon o grupo nga nagamit han iya linggwahe.

• Pag-andam (Pr 15:28; 16:1): Kon an usa nga tagbalay ha iyo teritoryo nagyayakan hin iba nga linggwahe, pangalimbasugi nga maisangyaw ha iya an maopay nga sumat. Puydi ka mangandam pinaagi ha paghunahuna hin abanse kon ano nga mga yinaknan an posible nga ginagamit han mga tawo ha teritoryo ngan pinaagi ha abanse nga pag-download hin iba-iba nga hubad han Biblia ngan mga video ha imo gadyet. Mahimo mo liwat gamiton an app nga JW Language basi mahibaro hin mga pulong ha pipira nga linggwahe ngan makagtikang hin pakiistorya.