Tikang han Enero 2018, nagkaada sampol nga pakiistorya ha kobre han Workbook Para ha Katirok ha Pagkinabuhi Ngan Ministeryo. Gin-aaghat kita nga magpokus ha pakiistorya ha mga tawo imbes nga magtanyag la hin literatura. Basi mabuligan an mga magwarali ha pagbuhat hini, iginpapakita han mga video han sampol nga pakiistorya kon paonan-o magtitikang hin pakiistorya gamit la an Biblia. Pero karuyag sidngon ba hini nga diri na kita magamit hin literatura kon nagsasangyaw ha balay-balay? Diri man. Pananglitan, an paggamit hin tract epektibo nga paagi ha pagtikang hin pakiistorya. Puydi naton gamiton an masunod nga paagi kon nagamit hin bisan ano nga tract:

1. Ibangon an pakiana ha kobre.

2. Ipakita an baton han Biblia nga makikita ha igbaw nga bahin han ikaduha nga pahina. Kon may panahon pa, basaha ngan hisguti an pipira nga impormasyon nga sulod han tract.

3. Ihatag an tract ha tagbalay, ngan aghata hiya nga basahon an iba pa nga impormasyon ha iya kombinyente nga panahon.

4. Antes bumaya, ipakita an pakiana ha seksyon nga “Alayon Hunahunaa Ini” ngan pakigsabot nga hihisgotan niyo an baton han Biblia ha imo pagbalik.

Pagbalik mo, hisguti an baton ngan pagbilin hin pakiana nga iyo hihisgotan ha sunod. Puydi ka magpili hin pakiana ha aton website o ha publikasyon nga gin-uunabi ha luyo nga kobre han tract. Kon angayan, ipakita an brosyur nga Maopay nga Sumat Tikang ha Dios! o an iba pa nga publikasyon nga ginagamit ha pag-aram nga aada ha Toolbox ha Pagpanutdo.