Mga Salmo 51:1-19
Para ha direktor. Kanta ni David han kinadto ha iya an propeta nga hi Nathan katapos makighilawas hi David kan Bat-seba.+
51 O Dios, ipakita ha akon an imo pagkabuotan, uyon ha imo maunungon nga gugma.+
Paraa an akon mga pagtalapas uyon ha imo daku nga kalooy.+
2 Hugasi ako hin maopay tikang ha akon sayop,+Ngan limpyuhi ako tikang ha akon sala.+
3 Kay maaram gud ako han akon mga pagtalapas,Ngan an akon sala aadi pirme ha akon atubangan.*+
4 Kontra ha imo—labaw ha ngatanan ha imo*—ako nakasala;+Nagbuhat ako hin maraot ha imo pagkita.+
Salit matadong ka kon ikaw nagyayakan,Husto ka ha imo paghukom.+
5 Kitaa! Igin-anak ako nga salaan,Ngan ha sala iginburod ako han akon nanay.*+
6 Kitaa! Nalilipay ka ha kamatuoran nga aada ha sulod nga pagkatawo;+Tutdui han tinuod nga kinaadman an akon gisusuluri nga personalidad.*
7 Putlia ako tikang ha akon sala pinaagi hin hisopo, basi magin limpyo ako;+Hugasi ako, basi magin mas mabusag ako kay ha niebe.+
8 Pabatia ako hin mga aringasa ha kalipay ngan pagrayhak,Basi magrayhak an mga tul-an nga imo gindugmok.+
9 Ilingiw an imo nawong* tikang ha akon mga sala,+Ngan wad-a* an ngatanan ko nga sayop.+
10 Tagi* ako hin putli nga kasingkasing, O Dios,+Ngan butangi ako hin bag-o nga disposisyon,*+ usa nga marig-on.
11 Ayaw ako pagpaiwasa ha imo presensya;Ngan ayaw pagkuhaa ha akon an imo baraan nga espiritu.
12 Ibalik ha akon an kalipay tungod han imo pagtalwas;+Pagiosa ako nga kinaburut-on nga sumugot ha imo.*
13 Tututdoan ko han imo mga dalan an mga paratalapas,+Basi bumalik ha imo an magpakasasala.
14 Talwasa ako tikang ha pagin salaan ha dugo,+ O Dios, an Dios nga nagtatalwas ha akon,+Basi an akon dila malipayon nga magpasamwak han imo pagkamatadong.+
15 O Jehova, abriha an akon mga im-im,Basi an akon baba magpasamwak han imo kadayawan.+
16 Kay diri ka naruruyag hin halad—kay kon naruruyag ka, ihahatag ko ito;+Diri ka nalilipay ha bug-os nga halad nga sinunog.+
17 An mga halad nga nakakapalipay ha Dios amo an ruba nga espiritu;An kasingkasing nga ruba ngan rumok, O Dios, diri mo isasalikway.*+
18 Buhata an maopay para ha Zion uyon ha imo maopay nga kaburut-on;Tukora an mga pader han Jerusalem.
19 Tungod hito malilipay ka han mga halad ha pagkamatadong,Han mga halad nga sinunog ngan han bug-os nga mga halad;Ngan an todo nga mga baka ighahalad ha imo halaran.+
Mga footnote
^ O “ha akon hunahuna.”
^ Lit., “ha imo gud la.”
^ O “Ngan makasasala tikang han iginburod ako han akon nanay.”
^ O “akon tago nga personalidad.”
^ O “paraa.”
^ O “Itago an imo nawong.”
^ Lit., “Himoi.”
^ Lit., “espiritu.”
^ Lit., “Hinaot buligan mo ako pinaagi hin kinaburut-on nga espiritu.”
^ O “tatamayon.”
