Mga Proberbios 3:1-35
3 Anak ko, ayaw kalimti an akon katutdoan,*Ngan hinaot sundon han imo kasingkasing an akon mga sugo,
2 Kay magdudugang ito hin damu nga adlaw
Ngan hin mga tuig han kinabuhi ngan hin kamurayawan ha imo.+
3 Ayaw pagtugot nga bumaya ha imo an maunungon nga gugma ngan an pagkamatinumanon.*+
Isangbod ito ha imo liog;Isurat ito ha imo kasingkasing;+
4 Ha pagbuhat hito, makakakarawat ka hin pag-uyon ngan makikilala ka nga may hilarom nga pagsabotHa pagkita han Dios ngan han mga tawo.+
5 Sarig kan Jehova+ ha imo bug-os nga kasingkasing,Ngan ayaw pagtapod* ha imo kalugaringon nga pagsabot.+
6 Ha ngatanan mo nga dalan tagda hiya,+Ngan iya tatadungon an imo mga aragian.+
7 Ayaw paghunahuna nga maaramon ka.+
Kahadluki hi Jehova ngan pahirayo ha maraot.
8 Makakaopay ito ha imo lawas*Ngan makakarepresko ha imo mga tul-an.
9 Pasidunggi hi Jehova pinaagi han imo birilhon nga mga butang,+Pinaagi han siyahan nga mga bunga* han ngatanan mo nga ani;*+
10 Ha pagbuhat hito, an imo mga bodega mapupuno gud,+Ngan an imo mga bariles* magsasap-ay hin bag-o nga bino.
11 Anak ko, ayaw igsalikway an disiplina ni Jehova,+Ngan ayaw kangalasi an iya pagsaway,+
12 Kay an mga ginhihigugma ni Jehova iya ginsasaway,+Sugad han ginbubuhat han usa nga tatay ha iya anak nga nalilipayan.+
13 Malipayon an tawo nga nakakaagi hin kinaadman+Ngan an tawo nga nagkakaada hin husto nga pagturotimbang;
14 An pagkaada hito mas maopay kay ha pagkaada hin silber,Ngan an pagkaada hito sugad nga ganansya mas maopay kay ha pagkaada hin bulawan.+
15 Mas presyoso ito kay ha mga korales;*Waray bisan ano ha imo ginhihingyap an maipapariho hito.
16 An hilawig nga kinabuhi aada ha too nga kamot hito;An mga bahandi ngan an dungog aada ha wala nga kamot hito.
17 Makalilipay an mga dalan hito,Ngan murayaw an ngatanan nga aragian hito.+
18 Usa ito nga kahoy han kinabuhi para ha mga nakapot hito,Ngan adton padayon nga nakapot hito hin marig-on tatagdon nga malipayon.+
19 Iginlatag ni Jehova an pundasyon han tuna pinaagi han kinaadman.+
Iginpahamutang niya hin marig-on an langit pinaagi han husto nga pagturotimbang.+
20 Pinaagi han iya kahibaro natunga an hilarom nga katubiganNgan an madampog nga kalangitan nagpaturo hin tun-og.+
21 Anak ko, tipigi ini* ha imo hunahuna.
Panalipdi an praktikal nga kinaadman ngan an abilidad ha paghunahuna;
22 Maghahatag ito ha imo* hin kinabuhiNgan magigin maopay nga kwintas ha imo liog;
23 Katapos, maglalakat ka nga talwas ha imo dalan,Ngan an imo tiil diri mahipapakdol.*+
24 Ha imo paghigda, diri ka mahahadlok;+Mahigda ka, ngan magigin maopay an imo katurog.+
25 Diri ka mahahadlok ha bisan ano nga tigda nga kadaot+
O ha bagyo nga tiabot ha magraot.+
26 Kay masasarigan mo gud hi Jehova;+Iya papanalipdan an imo tiil tikang ha kahilit-ag.+
27 Ayaw pagpugngi an imo kalugaringon ha paghatag hin maopay ha mga nanginginahanglan hito+Kon kaya mo man* bumulig.+
28 Ayaw pagsiring ha imo igkasi-tawo, “Kadto na, balik na la buwas ngan ihahatag ko ito ha imo,”
Kon maihahatag mo man ito yana.
29 Ayaw pagplano hin maraot ha imo igkasi-tawo+Kon naabat hiya hin pagin talwas ha pag-ukoy kaupod mo.
30 Ayaw pakig-away ha usa nga tawo hin waray la hinungdan+Kon waray man hiya nahimo nga maraot ha imo.+
31 Ayaw kaawa ha bayolente nga tawo+Ngan ayaw pilia an bisan hain han iya mga dalan,
32 Kay mangil-ad kan Jehova an malimbong nga tawo,+Pero duok Hiya nga sangkay han magtadong.+
33 Iginsusumpa ni Jehova an balay han maraot nga tawo,+Pero iya ginbibendisyonan an balay han magtadong.+
34 Kay iya ginmiminos an mga nananamay,+Pero nagpapakita hiya hin pag-uyon ha mga maaghop.+
35 An mga maaramon makakapanunod hin kadungganan,Pero an mga lurong nagpapasidungog ha kaarawdan.+
Mga footnote
^ O “balaud.”
^ O “kamatuoran.”
^ Lit., “pagsandig.”
^ Lit., “pusod.”
^ O “kità.”
^ O “han pinakamaopay gud.”
^ O “mga purog-an nga panbino.”
^ Matin-aw nga nagtutudlok ha mga kalidad han Dios nga gin-unabi ha nahiuna nga mga bersikulo.
^ O “imo kalag.”
^ O “mahimamalmal ha bisan ano.”
^ O “Kon kaya man han imo kamot nga.”
