Numeros 25:1-18
25 Han an Israel naukoy ha Sitim,+ an katawohan nagbuhat hin seksuwal nga imoralidad upod han mga anak nga babaye ha Moab.+
2 An mga babaye nag-imbitar han katawohan nga kumadto ha ira paghalad ha ira mga dios,+ ngan an katawohan nangaon ngan nanyukbo ha ira mga dios.+
3 Salit an Israel inapi ha pagsingba ha* Baal han Peor,+ ngan hi Jehova nasina hinduro ha Israel.
4 Hi Jehova nagsiring kan Moises: “Kuhaa an ngatanan nga lider* hini nga katawohan nga nakasala ngan bitaya hira ha atubangan ni Jehova durante han adlaw,* basi an naglalaga nga kasina ni Jehova mawara ha Israel.”
5 Katapos, hi Moises nagsiring ha mga hukom han Israel:+ “Sadang patayon han tagsa ha iyo an iya mga tawo nga inapi ha pagsingba* ha Baal han Peor.”+
6 Pero hito mismo nga takna, may inabot nga usa han mga Israelita nga nagdara hirani ha iya kabugtoan hin Midianita nga babaye+ nga nakikita ni Moises ngan han bug-os nga komunidad han mga Israelita, samtang nananangis hira ha aragian tipasulod ha tolda nga katirokan.
7 Han nakita ito ni Pinehas+ nga anak nga lalaki ni Eleazar nga anak nga lalaki ni Aaron nga saserdote, binuhát dayon hiya ha butnga han komunidad ngan kinuha hin bangkaw.*
8 Katapos, iya ginlanat an lalaki nga Israelita ngadto ha tolda ngan gintuhog hira nga duha, an lalaki nga Israelita ngan an babaye dida ha iya ikinatawo. Ngan inundang an peste ha mga Israelita.+
9 An kadamu han nagkamatay tungod han peste 24,000.+
10 Katapos, hi Jehova nagsiring kan Moises:
11 “Hi Pinehas+ nga anak ni Eleazar nga anak ni Aaron nga saserdote, nakapawara han akon kapungot ha katawohan han Israel kay waray gud hiya tumugot nga may kaagaw ako dida ha ira.+ Amo nga waray ko pooha an mga Israelita tungod han akon pag-obligar hin eksklusibo nga debosyon.+
12 Salit siring, ‘Akon iginhahatag ha iya an akon ginhimo nga kasabotan para ha kamurayawan.
13 Ngan ito magigin kasabotan han nagpapadayon nga pagkasaserdote para ha iya ngan ha iya katulinan nga masunod ha iya,+ tungod kay waray hiya tumugot nga may kaagaw an iya Dios+ ngan iya ginhimo an pagpara han sala para ha katawohan han Israel.’”
14 Nahituman nga an ngaran han lalaki nga Israelita nga ginpatay upod han Midianita nga babaye amo hi Zimri nga anak ni Salu, usa nga lider han panimalay* han mga Simeonita.
15 An ngaran han Midianita nga babaye nga ginpatay amo hi Cozbi nga anak ni Zur;+ lider hiya han mga angkan han usa nga panimalay* ha Midian.+
16 Ha urhi hi Jehova nagsiring kan Moises:
17 “Atakeha an mga Midianita ngan pamataya hira,+
18 kay ira kamo ginsinamok pinaagi han ira tuso nga pakig-upod ha iyo didto ha Peor+ ngan tungod han ginbuhat ni Cozbi nga anak hin lider ha Midian, an ira bugto nga babaye nga ginpatay+ ha adlaw nga nagkaada peste tungod han nahitabo didto ha Peor.”+
Mga footnote
^ O “nagin duok ha.”
^ Lit., “mga ulo.”
^ Lit., “ha atubangan han adlaw.”
^ O “nakigduok.”
^ O “sugob.”
