Sumala kan Marcos 9:1-50

I-PLAY

Pagbag-o han hitsura ni Jesus (1-13)
Bata nga ginsaniban gintambal (14-29)
- An ngatanan posible ha tawo nga may pagtoo (23)
Igintagna utro an kamatayon ni Jesus (30-32)
An mga disipulo nagdiskusyon kon hin-o an pinakalabaw (33-37)
An bisan hin-o nga diri kontra ha aton dapig ha aton (38-41)
Mga hiparakdolan (42-48)
“Magkaada kamo asin ha iyo kalugaringon” (49, 50)

9 Dugang pa, nagsiring hiya ha ira: “Ha pagkamatuod nasiring ako ha iyo nga may-ada pipira nga naninindog dinhi nga diri gud mamamatay kon diri anay nira makita an Ginhadian han Dios nga inabot na nga may gahum.”+ ² Paglabay hin unom ka adlaw, igin-upod ni Jesus hira Pedro ngan Santiago ngan Juan ngan gindara hira ha hitaas nga bukid nga hira la. Ngan nabag-o an iya hitsura ha ira atubangan;+ ³ an iya pantungbaw nga mga bado nagin masilaw, nga nagin mas mabusag pa kay han kaya pabusagon han bisan hin-o nga paraglaba dinhi ha tuna. ⁴ Sugad man, ira nakita hi Elias nga kaupod hi Moises, ngan nakikiistorya hira kan Jesus. ⁵ Katapos, nagsiring hi Pedro kan Jesus: “Rabbi, maopay kay aanhi kami. Salit magtitindog kami hin tulo nga tolda, usa para ha imo, usa para kan Moises, ngan usa para kan Elias.” ⁶ Ha pagkamatuod, diri hiya maaram kon ano an isisiring, kay nahahadlok gud hira. ⁷ Ngan nagkaada dampog nga naglambong ha ira, ngan may tingog+ nga hinbatian tikang ha dampog: “Ini an akon Anak nga hinigugma.+ Pamati kamo ha iya.”+ ⁸ Katapos tigda nga nagkita hira ha palibot ngan nakita nira nga waray na hira iba nga kaupod kondi hi Jesus na la. ⁹ Samtang nalugsad hira ha bukid, marig-on nga gintugon niya hira nga diri isumat ha bisan hin-o an ira nakita+ tubtob nga an Anak han tawo mabuhi tikang ha mga patay.+ ¹⁰ Ginseryoso nira an iya ginsiring,* pero nag-iristorya hira nga hira la kon ano an kahulogan hini nga pagbuhi tikang ha mga patay. ¹¹ Ngan nagtikang hira pagpakiana ha iya, nga nasiring: “Kay ano man nga nasiring an mga eskriba nga kinahanglan mahiuna+ pagkanhi hi Elias?”+ ¹² Nagsiring hiya ha ira: “Mahiuuna gud pagkanhi hi Elias ngan iya igpapahiuli an ngatanan nga butang;+ pero kay ano nga iginsurat nga an Anak han tawo kinahanglan makaeksperyensya hin damu nga pag-antos+ ngan tamayon?+ ¹³ Pero nasiring ako ha iyo nga ha pagkamatuod kinanhi na hi Elias,+ ngan ginbuhat nira ha iya an anoman nga ira karuyag, sugad han nahisurat mahitungod ha iya.”+ ¹⁴ Pagkadto nira ha iba nga mga disipulo, nakita nira nga damu nga tawo an nakapalibot ha ira, ngan may mga eskriba nga nakikiglantugi ha ira.+ ¹⁵ Kondi pakakita gud ha iya han ngatanan nga tawo, nahipausa hira, ngan nandadlagan hira basi tapoon hiya. ¹⁶ Salit nagpakiana hiya ha ira: “Ano an iyo ginlalantugian?” ¹⁷ Ngan usa ha ira an binaton: “Magturutdo, gindara ko ha imo an akon anak nga lalaki kay ginsaniban hiya hin espiritu nga nagpahinabo han iya kangula.+ ¹⁸ Kon naatake ito ha iya, iginlalamba hiya hito ha tuna, ngan nagbubura an iya baba, nangingigot an iya mga ngipon, ngan nanluluya hiya. Ginhangyo ko an imo mga disipulo nga pagawson ito, pero waray nira ito mapagawas.” ¹⁹ Nagsiring hiya ha ira: “O waray pagtoo nga henerasyon,+ tubtob san-o ako makikig-upod ha iyo? Tubtob san-o ako mag-iilob ha iyo? Dad-a hiya ha akon.”+ ²⁰ Salit ira gindara ha iya an bata, kondi pakakita ha iya han espiritu, ginpakisaykisay dayon hito an bata. Katapos niya matumba ha tuna, nagpuropulilid* hiya nga nagbubura an baba. ²¹ Katapos ginpakianhan ni Jesus an tatay: “Kakan-o pa ini nagtikang mahitabo ha iya?” Binaton hiya: “Tikang pa han iya kabata, ²² ngan agsob hiya hito ilabog ha kalayo ngan pati liwat ha tubig basi patayon hiya. Pero kon may mahihimo ka, malooy ka ha amon ngan buligi kami.” ²³ Hi Jesus nagsiring ha iya: “Ito nga mga pulong nga ‘Kon may mahihimo ka’! Aw, an ngatanan nga butang posible para ha tawo nga may pagtoo.”+ ²⁴ An tatay han bata nagyakan dayon ha daku nga tingog: “May pagtoo ako! Buligi ako kon diin kulang an akon pagtoo!”+ ²⁵ Yana, pakakita ni Jesus nga an mga tawo nandadadlagan ngada ha ira, ginsaway niya an mahugaw nga espiritu, nga ginsisidngan ito: “Ikaw nga espiritu nga hinungdan han kangula ngan kabungol han bata, ginsusugo ko ikaw, gawas tikang ha iya ngan ayaw na pagsulod utro ha iya!”+ ²⁶ Katapos gumuliat ngan mangisaykisay hin damu ka beses, ginawas ito, ngan nagin sugad hin patay an bata, salit an kadam-an nagsiring: “Patay na hiya!” ²⁷ Pero ginkaptan ni Jesus an iya kamot ngan ginbuhát hiya, ngan tinindog hiya. ²⁸ Salit katapos ni Jesus sumulod ha usa nga balay, an iya mga disipulo nagpakiana ha iya hin pribado: “Kay ano nga waray namon ito mapagawas?”+ ²⁹ Nagsiring hiya ha ira: “Ito nga klase mapapagawas la pinaagi han pag-ampo.” ³⁰ Binaya hira didto ngan ginlatas an Galilea, kondi diri niya karuyag nga mahibaroan ito han bisan hin-o. ³¹ Kay gintututdoan niya an iya mga disipulo ngan ginsusumatan hira: “An Anak han tawo patraydor nga itutubyan ha mga kamot han mga tawo, ngan papatayon nira hiya,+ pero bisan kon patayon hiya, mabubuhi hiya paglabay hin tulo ka adlaw.”+ ³² Pero waray hira makasabot han iya ginyakan, ngan nahahadlok hira pagpakiana ha iya. ³³ Ngan inabot hira ha Capernaum. Yana han nakadto na hiya ha balay, nagpakiana hiya ha ira: “Ano an iyo gindidiskusyonan ha dalan?”+ ³⁴ Naghilom la hira, kay ha dalan gindiskusyonan nira kon hin-o ha ira an pinakalabaw. ³⁵ Salit liningkod hiya ngan gintawag an Dose ngan nagsiring ha ira: “Kon an bisan hin-o karuyag magin una, kinahanglan magin urhi hiya ha ngatanan ngan surugoon han ngatanan.”+ ³⁶ Katapos nagkuha hiya hin bata ngan ginpatindog hiya ha butnga nira; ngan gin-agbayan niya an bata ngan nagsiring ha ira: ³⁷ “An bisan hin-o nga nakarawat ha usa han mga bata+ nga pariho hini tungod ha akon ngaran nakarawat liwat ha akon; ngan an bisan hin-o nga nakarawat ha akon nakarawat diri la ha akon kondi pati ha Iya nga nagsugo ha akon.”+ ³⁸ Hi Juan nagsiring ha iya: “Magturutdo, nakakita kami hin tawo nga nagpapagawas hin mga demonyo pinaagi han imo ngaran, ngan nagsari kami pagpugong ha iya, kay diri hiya nasunod ha aton.”+ ³⁹ Kondi hi Jesus nagsiring: “Ayaw kamo pagsari ha pagpugong ha iya, kay waray bisan hin-o nga maghihimo hin gamhanan nga buhat pinaagi han akon ngaran ngan katapos gud hito magyayakan hin maraot mahitungod ha akon. ⁴⁰ Kay an bisan hin-o nga diri kontra ha aton dapig ha aton.+ ⁴¹ Ngan an bisan hin-o nga nahatag ha iyo hin usa ka baso nga tubig nga maiinom tungod kay kanan Kristo kamo,+ ha pagkamatuod susumatan ko kamo, diri gud mawawara ha iya an iya balos.+ ⁴² Pero an bisan hin-o nga nakakapakdol* han usa hini nga mga ubos nga may pagtoo, mas maopay pa kon higtan an iya liog hin gilingan nga bato nga ginbibirik hin asno ngan ilabog hiya ha dagat.+ ⁴³ “Kon pananglitan an imo kamot nagigin hinungdan han imo kahipakdol, utda ito. Mas maopay pa nga baldado ka nga masulod ha kinabuhi kay ha duha an imo kamot pero mahingangadto ka ha Gehenna,* ngadto ha kalayo nga diri napaparong.+ ⁴⁴ * —— ⁴⁵ Ngan kon an imo tiil nagigin hinungdan han imo kahipakdol, utda ito. Mas maopay pa nga piay ka nga masulod ha kinabuhi kay ha duha an imo tiil pero ilalabog ka ha Gehenna.*+ ⁴⁶ * —— ⁴⁷ Ngan kon an imo mata nagigin hinungdan han imo kahipakdol, ilabog ito.+ Mas maopay pa nga usa la an imo mata nga masulod ha Ginhadian han Dios kay ha duha an imo mata pero ilalabog ka ha Gehenna,*+ ⁴⁸ diin an mga ulod diri namamatay ngan an kalayo diri napaparong.+ ⁴⁹ “Kay an kada tagsa kinahanglan asinan hin kalayo.+ ⁵⁰ An asin maopay, pero kon magtab-ang an asin, paonan-o niyo maibabalik an kaásin hito?+ Magkaada kamo asin ha iyo kalugaringon,+ ngan padayon kamo nga makigmurayaw ha usa kag usa.”+