Levitico 8:1-36
-
Aaron ngan iya mga anak ginhimo nga mga saserdote (1-36)
8 Hi Jehova padayon nga nakiistorya kan Moises, nga nasiring:
2 “Dad-a hi Aaron upod an iya mga anak nga lalaki,+ an mga bado,+ an lana nga pandihog,+ an baka nga lalakí nga halad tungod han sala, an duha nga karnero nga lalakí, ngan an basket han tinapay nga waray libadura,+
3 ngan tiroka an bug-os nga komunidad ha may aragian tipasulod ha tolda nga katirokan.”
4 Katapos, ginbuhat ni Moises an iginsugo ni Jehova ha iya, ngan nagkatirok an komunidad ha may aragian tipasulod ha tolda nga katirokan.
5 Yana hi Moises nagsiring ha komunidad: “Ini an iginsugo ni Jehova nga aton pagbubuhaton.”
6 Salit gindara ni Moises hi Aaron ngan an iya mga anak ha hirani ngan ginkarigoan hira.+
7 Katapos hito, iginsul-ot niya kan Aaron an hilaba nga bado,+ igin-alikos ha iya an paha,+ iginsul-ot ha iya an bado nga waray pako,+ ngan iginbutang ha iya an epod+ ngan ginhigtan ito han hinablon nga paha*+ han epod, basi maihigot ito hin maopay ha iya.
8 Sunod, igintaod niya ha iya an tabon ha dughan+ ngan iginbutang an Urim ngan Tumim+ ha tabon ha dughan.
9 Katapos, iginsul-ot niya ha iya an putos ha ulo,+ ngan iginbutang ha prente han putos ha ulo an mainggat nga plaka nga bulawan, an baraan nga tigaman han dedikasyon,*+ sugad han iginsugo ni Jehova kan Moises.
10 Katapos, ginkuha ni Moises an lana nga pandihog ngan gindihogan an tabernakulo ngan an ngatanan nga aada hito+ ngan ginbaraan ito.
11 Kahuman, iginwisik niya an iba han lana hin pito ka beses dida ha halaran ngan gindihogan an halaran ngan an ngatanan nga garamiton hito ngan an planggana ngan an tungtongan hito basi baraanon ito.
12 Ha kataposan iya iginbubo an iba han lana nga pandihog ha ulo ni Aaron ngan gindihogan hiya basi baraanon hiya.+
13 Katapos, gindara ni Moises an mga anak ni Aaron ha hirani ngan ginsul-otan hira hin higlaba nga mga bado ngan igin-alikos ha ira an mga paha ngan ginbutangan* hira hin tabon ha ulo,+ sugad han iginsugo ni Jehova kan Moises.
14 Katapos, iya gindara an baka nga lalakí nga halad tungod han sala, ngan igintungbaw ni Aaron ngan han iya mga anak an ira mga kamot ha ulo han baka nga lalakí nga halad tungod han sala.+
15 Gin-ihaw* ito ni Moises ngan nagkuha hin dugo+ pinaagi han iya tudlo ngan iginpahid ito ha mga sungay nga aada ha mga eskina han halaran, ngan iya ginputli an halaran tikang ha sala, pero an nabibilin nga dugo iya iginhuwad ha ubos han halaran, para baraanon ito basi himoon an pagpara han sala dida hito.
16 Katapos hito, iya ginkuha an ngatanan nga tambok nga ada ha mga tinai, an tambok han atay, ngan an duha nga kidney pati an tambok hito, ngan ginpaaso ito ni Moises dida ha halaran.+
17 Katapos, an iba pa nga mga parte han baka nga lalakí, an panit hito, an karne hito, ngan an tai hito, iya iginpasunog ha kalayo ha gawas han kampo,+ sugad han iginsugo ni Jehova kan Moises.
18 Yana iya gindara ha hirani an karnero nga lalakí para ha halad nga sinunog, ngan igintungbaw ni Aaron ngan han iya mga anak an ira mga kamot ha ulo han karnero nga lalakí.+
19 Katapos, gin-ihaw ito ni Moises ngan iginwisik an dugo ha ngatanan nga ligid han halaran.
20 Iya gin-atado an karnero nga lalakí, ngan ginpaaso ni Moises an ulo, an gin-atado nga mga parte, ngan an tambok.*
21 Iya ginhugasan hin tubig an mga tinai ngan an mga tiil, ngan ginpaaso ni Moises an bug-os nga karnero nga lalakí dida ha halaran. Usa ito nga halad nga sinunog nga nakakapalipay* an hamot. Halad ito nga ginsunog ha kalayo para kan Jehova, sugad han iginsugo ni Jehova kan Moises.
22 Katapos, iya gindara an ikaduha nga karnero nga lalakí, an karnero nga lalakí para ha pagbutang ha katungdanan,+ ngan igintungbaw ni Aaron ngan han iya mga anak an ira mga kamot ha ulo han karnero nga lalakí.+
23 Gin-ihaw ito ni Moises ngan nagkuha han iba han dugo hito ngan iginpahid ito ha ubos han too nga talinga ni Aaron ngan ha tamuragko han iya too nga kamot ngan ha tamuragko han iya too nga tiil.
24 Sunod, gindara ni Moises an mga anak ni Aaron ha unhan ngan ginpahiran han iba han dugo an ubos han ira too nga talinga ngan an tamuragko han ira too nga kamot ngan an tamuragko han ira too nga tiil; pero an nabibilin nga dugo iginwisik ni Moises ha ngatanan nga ligid han halaran.+
25 Katapos, iya ginkuha an tambok, an matambok nga ikog, an ngatanan nga tambok nga ada ha mga tinai, an tambok han atay, an duha nga kidney pati an tambok hito, ngan an too nga paa.+
26 Nagkuha hiya ha basket han tinapay nga waray libadura nga ada ha atubangan ni Jehova hin usa nga tinapay nga singsing an kurti nga waray libadura,+ usa nga tinapay nga singsing an kurti nga ginbutangan hin lana,+ ngan usa nga tinapay nga manipis. Kahuman, iya ito iginbutang dida ha mga tambok ngan ha too nga paa.
27 Katapos hito, iya iginbutang ito ngatanan ha mga palad ni Aaron ngan ha mga palad han iya mga anak nga lalaki ngan igin-abyog ito ngadto-nganhi sugad nga halad nga gin-aabyog ha atubangan ni Jehova.
28 Kahuman, ginkuha ito ni Moises tikang ha ira mga kamot ngan ginpaaso ito ha halaran ha bawbaw han halad nga sinunog. Ito an mga halad para ha pagbutang ha katungdanan nga nakakapalipay* an hamot. Halad ito nga ginsunog ha kalayo para kan Jehova.
29 Katapos, ginkuha ni Moises an dughan ngan igin-abyog ito ngadto-nganhi sugad nga halad nga gin-aabyog ha atubangan ni Jehova.+ Tikang ha karnero nga lalakí nga para ha pagbutang ha katungdanan, ito an nagin malon ni Moises, sugad han iginsugo ni Jehova kan Moises.+
30 Ngan ginkuha ni Moises an iba han lana nga pandihog+ ngan an iba han dugo dida ha halaran ngan iginwisik ito kan Aaron ngan ha iya mga bado, ngan ha iya mga anak ngan ha mga bado han iya mga anak nga upod niya. Hito nga paagi, iya ginbaraan hi Aaron ngan an iya mga bado, ngan an iya mga anak+ ngan an ira mga bado.+
31 Katapos, hi Moises nagsiring kan Aaron ngan ha iya mga anak: “Pakaladkari+ an karne dida ha aragian tipasulod ha tolda nga katirokan, ngan kakaunon niyo ito dida pati an tinapay nga aada ha basket nga gin-gagamit para ha pagbutang ha katungdanan, sugad han iginsugo ha akon, ‘Hi Aaron ngan an iya mga anak makaon hito.’+
32 An mahisalin nga karne ngan tinapay iyo susunugon ha kalayo.+
33 Ayaw kamo paggawas tikang ha aragian tipasulod ha tolda nga katirokan ha sulod hin pito ka adlaw, tubtob nga makompleto an mga adlaw ha pagbutang ha iyo ha katungdanan, kay maabot hin pito ka adlaw an pagbutang ha iyo ha katungdanan sugad nga mga saserdote.*+
34 Iginsugo ni Jehova nga buhaton naton an aton ginbuhat yana nga adlaw basi himoon an pagpara han sala para ha iyo.+
35 Magpapabilin kamo dida ha aragian tipasulod ha tolda nga katirokan ha adlaw ngan gab-i ha sulod hin pito ka adlaw+ ngan tumana an iyo obligasyon kan Jehova,+ basi diri kamo mamatay; kay ito an iginsugo ha akon.”
36 Ngan ginbuhat ni Aaron ngan han iya mga anak an ngatanan nga butang nga iginsugo ni Jehova pinaagi kan Moises.
Mga footnote
^ O “takgong.”
^ O “an baraan nga diadema.”
^ O “ginpudongan.”
^ Ha iba nga lugar, “Ginpatay.”
^ O “an tambok ha palibot han mga kidney.”
^ O “nakakarelaks.” Lit., “nakakapakalma.”
^ O “nakakarelaks.” Lit., “nakakapakalma.”
^ Lit., “pagpuno han iyo kamot.”
