Job 3:1-26
3 Katapos hini hi Job nagtikang pagyakan ngan pagsumpa han adlaw han iya katawo.*+
2 Hi Job nagsiring:
3 “Mawara unta an adlaw han akon katawo,+Pati na an gab-i han may nagsiring: ‘Usa nga lalaki an iginburod!’
4 Magsirom unta ito nga adlaw.
Diri unta ito pakitaan hin pagtagad han Dios ha igbaw;Diri unta sumanag an kahayag ngada hito.
5 Bawion unta ito han duro gud nga kasisidman.*
Magpabilin unta ha bawbaw hito an masirom nga dampog.
Hadlukon unta ito han anoman nga nakakapasirom han adlaw.
6 Ito nga gab-i—kuhaon unta ito han duro nga kasisidman;+Diri unta ito magrayhak upod han mga adlaw han tuig,Ngan diri unta ito ig-api ha bisan ano nga bulan.
7 Oo! Magin baog unta ito nga gab-i;Waray unta mabatian nga malipayon nga singgit durante hito.
8 Igsumpa unta ito han mga nagsusumpa han adlaw,Han mga nakakapukaw han Leviatan.*+
9 Magsirom unta an mga bitoon hito nga gab-i;Makawang unta an paghulat hito han kapawa han adlaw,Ngan diri unta hito makita an pagpamanagbanag ha kaagahon.
10 Kay waray hito sadhi an mga purtahan han tagoangkan han akon nanay;+Ngan waray hito itago an kakurian tikang ha akon mga mata.
11 Kay ano nga waray na la ako mamatay han natawo ako?
Kay ano nga waray na la ako mamatay paggawas ko ha tagoangkan?+
12 Kay ano nga may mga tuhod nga kinarawat ha akon
Ngan mga suso nga nagpasuso ha akon?
13 Kay yana nahigda na unta ako nga waray nagsasamok;+Nakaturog na unta ako ngan napahuway+
14 Upod han mga hadi han tuna ngan han ira mga magsaragdon,Nga nagtukod para ha ira kalugaringon hin mga lugar nga guba na yana,*
15 O upod han mga prinsipe nga nagtag-iya hin bulawan,Nga an mga balay puno hin silber.
16 O kay ano nga waray na la ako magin pariho hin bata nga napunit,Pariho hin kabataan nga waray gud makakita han kalamrag?
17 Didto bisan an magraot diri na nasasamok;Didto an mga kinakapoy namamahuway na.+
18 Didto an ngatanan nga priso hayahay na;Diri nira nababatian an tingog han tawo nga nagpipirit ha ira nga magtrabaho.
19 Didto an mga ubos ngan an mga prominente papriho la,+Ngan an uripon nakagawas na tikang ha iya agaron.
20 Kay ano nga gintatagan niya hin kalamrag an tawo nga nag-aantos
Ngan hin kinabuhi an mga nasasakit gud?*+
21 Kay ano nga ginhihingyap nira an kamatayon, pero diri ito naabot?+
Mas gin-uukad nira ito kay han tinago nga mga bahandi,
22 Nagrarayhak gud hira,Ngan nalilipay hira kon naaagian nira an lubnganan.
23 Kay ano nga gintatagan niya hin kalamrag an tawo nga nawawara ha dalan,An tawo nga gin-alad han Dios?+
24 Kay imbes nga kumaon nanhahayhay ako,+Ngan an akon pangaraba+ naawas sugad hin tubig.
25 Kay an akon ginkakabarak-an amo an inabot ha akon,Ngan an akon ginkakahadlokan amo an nahitabo ha akon.
26 Waray ako kamurayawan, pirme nasasamok, ngan waray kapahuwayan,Ngan an mga problema padayon nga nagkakaabot.”
Mga footnote
^ Lit., “pagsumpa han iya adlaw.”
^ O “han kasisidman ngan han lambong han kamatayon.”
^ Ginhuhunahuna nga nagtutudlok ha buaya o ha iba nga daku ngan makusog nga hayop ha katubigan.
^ O posible nga “nagtukod para ha ira kalugaringon hin mga lugar nga waray naukoy.”
^ O “an mga mapait an kalag.”
