Isaias 44:1-28
44 “Yana pamati, O Jacob nga akon surugoon,Ngan ikaw, O Israel, nga akon ginpili.+
2 Ini an siring ni Jehova,Hiya nga naghimo ha imo ngan Hiya nga nagporma ha imo,+Nga binulig ha imo tikang pa ha tagoangkan:*
‘Ayaw kahadlok, Jacob nga akon surugoon,+Ngan ikaw, Jesurun,*+ nga akon ginpili.
3 Kay magbububo ako hin tubig ha tawo nga gin-uuhaw*+Ngan hin naawas nga mga sapa ha mamara nga tuna.
Ibububo ko ha imo mga anak* an akon espiritu+Ngan ha imo mga tulin an akon bendisyon.
4 Ngan maturok hira pariho hin mga tanom ha butnga han berde nga mga banwa,+Pariho hin mga kahoy nga alamo ha ligid han mga sapa.
5 An usa masiring: “Kan Jehova ako.”+
An usa naman magtatawag ha iya kalugaringon ha ngaran ni Jacob,Ngan an usa pa magsusurat ha iya kamot: “Kan Jehova.”
Ngan ngangaranan niya an iya kalugaringon han ngaran ni Israel.’
6 Ini an siring ni Jehova,An Hadi han Israel+ ngan an iya Paratubos,+ hi Jehova han mga hugpo:
‘Ako an una ngan ako an ultimo.+
Waray Dios labot ha akon.+
7 Hin-o an kapariho ko?+
Magyakan hiya ngan isumat ito ngan pamatud-an ito ha akon!+
Tikang han panahon nga gin-establisar ko an katawohan ha kadaan nga panahon,Isumat nira an mga butang nga tiabot naNgan an mga butang nga maiha pa mahitabo.
8 Ayaw kamo kabaraka,Ngan ayaw kamo kagupong tungod han kahadlok.+
Diri ba ginsumatan ko na nga daan an tagsa ha iyo ngan iginpahayag ito?
Kamo an akon mga saksi.+
May-ada ba lain nga Dios labot ha akon?
Waray, waray na iba nga Bato;+ waray ako kilala nga bisan usa.’”
9 An ngatanan nga nagpuporma hin inukit nga mga imahen mga waray pulos,Ngan an ira minahal nga mga butang magigin waray kapulsanan.+
Sugad nga ira mga saksi, waray hira* nakikita ngan waray hinbabaroan,+Salit an mga naghimo ha ira mahibubutang ha kaarawdan.+
10 Hin-o an maghihimo hin dios o magmumolde hin metal nga imahen*Nga waray maihahatag nga kapulsanan?+
11 Kitaa! An ngatanan niya nga kaupod mahibubutang ha kaarawdan!+
An mga eksperto nga parahimo mga tawo la.
Magtirirok hira ngatanan ngan tumindog.
Mahahadlok gud hira ngan urupod nga mahibubutang ha kaarawdan.
12 An panday hin metal nagdadangdang han puthaw ha bawbaw han bága pinaagi han iya garamiton.
Iya ito ginpuporma gamit an mga martilyoPinaagi han iya makusog nga butkon.+
Katapos, ginugutom hiya ngan nawawad-an hin kusog;Diri hiya nainom hin tubig ngan ginkakapoy hiya.
13 Gin-uunat han paraukit hin kahoy an higot nga isurukol ngan ginmamarkahan an surubdan pinaagi hin pula nga tisa.
Iya ito gin-uukit gamit an tigib ngan ginmamarkahan ito gamit an kompas.
Ginkukurtihan niya ito sugad han dagway han tawo,+Nga may katahom han usa nga tawo,Basi umukoy ha balay.*+
14 May tawo nga an trabaho amo an pamulod hin mga kahoy nga sedro.
Nagpipili hiya hin partikular nga klase hin kahoy, an kahoy nga roble,Ngan iya ito ginpapatubo tubtob nga magin marig-on ito ha butnga han mga kahoy ha kagurangan.+
Nagtatanom hiya hin kahoy nga laurel, ngan ginpapatubo ito han uran.
15 Katapos, ginagamit ito han usa nga tawo sugad nga sungo.
Nagkukuha hiya hin bahin hito basi magpapaso;Naghaharing hiya ngan nagluluto hin tinapay.
Kondi naghihimo liwat hiya hin dios ngan ginsisingba ito.
Ginhihimo niya ito nga inukit nga imahen, ngan ginyuyukboan niya ito.+
16 An katunga hito iya ginsusungo ha kalayo;Dida hito nga katunga iya ginlilitson an karne nga iya ginkakaon, ngan nabubusog hiya.
Nagpapapaso liwat hiya ngan nasiring:
“Ah! Mapaso-paso na ako samtang ginkikinita ko an kalayo.”
17 Kondi an katunga pa hito ginhihimo niya nga dios, nga iya inukit nga imahen.
Ginyuyukboan niya ito ngan ginsisingba.
Gin-aampoan niya ito ngan nasiring:
“Talwasa ako, kay ikaw an akon dios.”+
18 Waray hira nahibabaroan, waray hira nasasabtan,+Kay an ira mga mata gintahoban ngan diri hira nakakakita,Ngan an ira kasingkasing waray hilarom nga pagsabot.
19 Waray bisan usa nga namamalandong ha iya kasingkasingO may kahibaro o pagsabot, nga nasiring:
“An katunga hito akon ginsungo ha kalayo,Ngan ha bága hito nagluto ako hin tinapay ngan naglitson hin karne basi kaunon.
Katapos, hihimoon ko ba nga mangil-ad nga butang an iba pa hito?+
Sisingbahon ko ba an usa nga uga nga kahoy?”
20 Nakaon hiya hin abo.
Iginsimang hiya han iya mismo kasingkasing nga nalimbongan.
Diri hiya makakatalwas ha iya kalugaringon,* ngan diri liwat hiya nasiring:
“Waray ba buwa ha akon too nga kamot?”
21 “Hinumdumi ini nga mga butang, O Jacob, ngan ikaw, O Israel,Kay surugoon ko ikaw.
Ginporma ko ikaw, ngan surugoon ko ikaw.+
O Israel, diri ko ikaw kakalimtan.+
22 Paparaon ko an imo mga pagtalapas nga sugad hin gintatabonan ito hin dampog+Ngan an imo mga sala nga sugad hin gintatabonan ito hin madakmol nga dampog.
Balik ha akon, kay tutubuson ko ikaw.+
23 Singgit hin malipayon, kamo nga kalangitan,Kay hi Jehova ginios!
Singgit tungod ha kadaogan, kamo nga kahiladman han tuna!
Singgit tungod ha kalipay, kamo nga kabukiran,+Ikaw nga kagurangan, ngan an ngatanan mo nga kahoy!
Kay gintubos ni Jehova an Jacob,Ngan iginpapakita niya ha Israel an iya pagkaharangdon.”+
24 Ini an siring ni Jehova, an imo Paratubos,+Nga nagporma ha imo tikang han nakadto ka ha tagoangkan:
“Ako hi Jehova, nga naghimo han ngatanan.
Gin-unat ko an kalangitan nga nag-uusahan la ako,+Ngan iginpahamutang ko an tuna.+
Hin-o an kaupod ko hito nga panahon?
25 Ginpapakyas ko an mga tigaman han mga nagyayakan hin waray pulos,*Ngan ako an nagpapahinabo nga an mga parapanigo gumios sugad hin mga lurong;+An nagwuwurok han maaramon nga mga tawo
Ngan naghihimo han ira kahibaro nga magin kalurongan;+
26 An nagpapahinabo nga matuman an pulong han iya surugoonNgan an bug-os nga nagtutuman han mga tagna han iya mga mensahero;+An nasiring mahitungod han Jerusalem, ‘Uukyan hiya,’+
Ngan mahitungod han mga syudad han Juda, ‘Tutukuron hira utro,+Ngan aaydon ko an iya kagubaan’;+
27 An nasiring ha hilarom nga katubigan, ‘Pagmara,Ngan pahuhubason ko an ngatanan mo nga salog’;+
28 An nasiring mahitungod kan Ciro,+ ‘Hiya an akon pinili nga paraataman,*Ngan bug-os nga tutumanon niya an ngatanan ko nga karuyag’;+An nasiring mahitungod han Jerusalem, ‘Tutukuron hiya utro,’
Ngan mahitungod han templo, ‘Ipapahamutang an imo pundasyon.’”+
Mga footnote
^ O “tikang pa ha katawo.”
^ Nangangahulogan nga “Hiya nga Matadong,” usa nga dungganon nga titulo para ha Israel.
^ O “ha tuna nga gin-uuhaw.”
^ Lit., “binhi.”
^ Karuyag sidngon, an mga imahen.
^ O “hinurma nga rebulto.”
^ O “groto.”
^ O “iya kalag.”
^ O “han buwa nga mga propeta.”
