Surat ha mga Taga-Galacia 3:1-29
-
Pagsunod ha Balaud igintanding ha pagtoo (1-14)
-
An matadong mabubuhi pinaagi han pagtoo (11)
-
-
An saad kan Abraham diri pinaagi han Balaud (15-18)
-
Tulin ni Abraham, an Kristo (16)
-
-
Gintikangan ngan katuyoan han Balaud (19-25)
-
Mga anak han Dios pinaagi han pagtoo (26-29)
-
Katulinan ni Abraham, an mga kanan Kristo (29)
-
3 O diri maaramon nga mga taga-Galacia! Hin-o an nag-impluwensya ha iyo hin maraot,+ bisan kon dayag nga iginhulagway ha iyo hi Jesu-Kristo sugad nga iginraysang ha kahoy?+
2 Ini an karuyag ko igpakiana* ha iyo: Nakarawat ba niyo an espiritu pinaagi ha pagsunod ha balaud o tungod ha pagtoo ha iyo hinbatian?+
3 Duro ba an iyo pagin diri maaramon? Katapos niyo magtikang ha espirituwal nga paagi,* iyo ba tatapuson ha unudnon nga paagi?*+
4 Nakaeksperyensya ba kamo hin damu hinduro nga pag-antos nga waray la hinungdan? Sigurado ako nga diri gud ito kay waray hinungdan.
5 Salit hiya ba nga naghahatag ha iyo han espiritu ngan nagbubuhat hin gamhanan nga mga buhat+ ha butnga niyo nagbubuhat hito tungod han iyo pagsunod ha balaud o tungod han iyo pagtoo ha iyo hinbatian?
6 Sugad kan Abraham nga “tinoo kan Jehova,* ngan ito nga iya ginbuhat gintagad nga matadong.”+
7 Sigurado nga maaram kamo nga an mga may pagtoo amo an mga anak ni Abraham.+
8 Yana, tungod kay iginpakita nga daan han kasuratan nga igpapahayag nga matadong han Dios an katawohan han mga nasud pinaagi han pagtoo, abanse nga iginpahayag hito an maopay nga sumat kan Abraham, nga nasiring: “Pinaagi ha imo an ngatanan nga nasud bibendisyonan.”+
9 Salit an mga may pagtoo ginbibendisyonan upod ni Abraham, nga may-ada pagtoo.+
10 An ngatanan nga nasarig ha ira abilidad ha pagsunod ha balaud maghihikaraot, kay nahisurat na: “Maghikaraot an bisan hin-o nga diri nasunod han ngatanan nga iginsurat ha linukot nga basahon han Balaud pinaagi ha pagbuhat hito.”+
11 Dugang pa, matin-aw nga pinaagi han balaud waray bisan usa nga iginpapahayag nga matadong ha atubangan han Dios,+ kay “an matadong mabubuhi tungod han pagtoo.”+
12 Yana an Balaud waray igbasar ha pagtoo. Lugod, “an bisan hin-o nga nagbubuhat hini nga mga butang mabubuhi pinaagi hito.”+
13 Ginpalit kita han Kristo,+ igin-gawas kita+ tikang ha panhimaraot han Balaud pinaagi ha pagkarawat han panhimaraot nga para ha aton, tungod kay ini an nahisurat: “Ginpanhimaraot an tagsa nga tawo nga ginbitay ha kahoy.”+
14 Nahitabo ito basi an iginsaad nga bendisyon kan Abraham makaabot ha mga nasud pinaagi kan Kristo Jesus,+ basi makarawat naton an iginsaad nga espiritu+ pinaagi han aton pagtoo.
15 Mga kabugtoan, nagyayakan ako pinaagi hin ilustrasyon han tawo: Kon an ginhimo nga kasabotan ginparig-on na, bisan kon pinaagi la hin tawo, waray bisan hin-o nga magbalewaray o magdugang hito.
16 Yana an mga saad iginpahayag kan Abraham ngan ha iya tulin.*+ Diri ito nasiring, “ngan han imo katulinan,”* nga nagpapasabot hin damu. Lugod, nasiring ito, “ngan han imo tulin,”* nga nagpapasabot hin usa, nga amo an Kristo.+
17 Nasiring liwat ako: An Balaud, nga iginhatag paglabay hin 430 ka tuig,+ diri nagbabalewaray han kasabotan nga ginhimo hadto han Dios, basi pagwad-on an saad.
18 Kay kon an panurundon basado ha balaud, diri na ito basado ha saad; pero mahigugmaon nga iginhatag ito han Dios kan Abraham pinaagi hin saad.+
19 Kon sugad, kay ano nga iginhatag an Balaud? Igindugang ito basi maipahayag an mga pagtalapas,+ tubtob nga umabot an tulin*+ nga makarawat han saad; ngan iginpasumat ito pinaagi han mga anghel+ ha kamot han usa nga tagapamutnga.+
20 Yana waray tagapamutnga kon usa la nga persona an nahidadabi, pero an Dios uusa la.
21 Salit nakontra ba an Balaud ha mga saad han Dios? Diri gud! Kay kon an usa nga balaud nga iginhatag makakahatag hin kinabuhi, kon sugad, an pagkamatadong pinaagi unta han balaud.
22 Kondi an ngatanan nga butang igintubyan han Kasuratan ilarom han pagkontrol han sala, basi an saad nga resulta han pagtoo kan Jesu-Kristo maihatag ha mga nagpapakita hin pagtoo.
23 Pero antes umabot an pagtoo, ginbantayan kita ilarom han balaud, igintubyan ha pagkontrol hito, ngan naghinulat han pagtoo nga hirani na igpahayag.+
24 Salit an Balaud nagin parabantay* naton nga naggigiya ngadto ha Kristo,+ basi maipahayag kita nga matadong pinaagi han pagtoo.+
25 Kondi yana nga inabot na an pagtoo,+ diri na kita ilarom han usa nga parabantay.*+
26 Ha pagkamatuod, kamo ngatanan mga anak han Dios+ pinaagi han iyo pagtoo kan Kristo Jesus.+
27 Kay kamo ngatanan nga ginbawtismohan ngan yana kahiusa na han Kristo nagsusubad han Kristo.*+
28 Waray Judio ngan waray liwat Griego,+ waray uripon ngan waray liwat may kagawasan nga tawo,+ waray lalaki ngan waray liwat babaye,+ kay kamo ngatanan uusa la nga kahiusa ni Kristo Jesus.+
29 Dugang pa, kon kamo kanan Kristo, tulin* gud kamo ni Abraham,+ mga manurunod+ may kalabotan ha usa nga saad.+
Mga footnote
^ Lit., “hibaroan tikang.”
^ Lit., “magtikang ha espiritu.”
^ Lit., “kukompletuhon ha unod?”
^ Lit., “binhi.”
^ Lit., “mga binhi.”
^ Lit., “binhi.”
^ Lit., “binhi.”
^ O “paragtutdo.”
^ O “paragtutdo.”
^ Lit., “nagsusul-ot han Kristo.”
^ Lit., “binhi.”
