Eclesiastes 11:1-10
11 Ilabog an imo tinapay ha katubigan,+ kay katapos han damu ka adlaw maaagian mo ito utro.+
2 Paghatag hin bahín ha pito o bisan ha walo nga tawo,+ kay diri ka maaram kon ano nga kadaot* an mahitatabo ha tuna.
3 Kon an mga dampog puno na hin tubig, mauran ha tuna; ngan kon an usa nga kahoy natutumba tipa-sur o tipa-norte, ha dapit diin ito natumba didto ito mahimumutang.
4 An tawo nga nagkikinita ha hangin diri magsasabwag hin binhi, ngan an tawo nga nagkikinita ha mga dampog diri mag-aani.+
5 Sugad la nga diri ka maaram kon paonan-o an espiritu nagios ha mga tul-an han bata ha tiyan* han burod nga babaye,+ diri ka liwat maaram han buhat han tinuod nga Dios, nga nagbubuhat han ngatanan nga butang.+
6 Igsabwag an imo binhi ha aga ngan ayaw papahuwaya an imo kamot tubtob ha gab-i;+ kay diri ka maaram kon hain hito an matubo, ini ba o adto, o bangin tumubo ito nga duha.
7 An kalamrag makaruruyag, ngan makakaopay ha mga mata an pagkita ha adlaw.*
8 Kay kon an usa nga tawo mabuhi hin damu ka tuig, papaglipaya hiya hito ngatanan.+ Pero angay niya hinumdoman nga bangin damu an mga adlaw han kasisidman; waray pulos an ngatanan nga tiabot.+
9 Paglipay, batan-on, samtang bata ka pa, ngan lipaya an imo kasingkasing ha mga adlaw han imo pagkabatan-on. Buhata an mga hingyap han imo kasingkasing ngan pakadto kon diin ka dad-on han imo mga mata; kondi hibaroi nga huhukman ka han* tinuod nga Dios tungod hini ngatanan.+
10 Salit kuhaa ha imo kasingkasing an mga butang nga nakakahatag hin problema, ngan kuhaa ha imo lawas* an nakakadaot nga mga butang, kay an pagkabatan-on ngan an kabaskog temporaryo la.*+
Mga footnote
^ O “kakurian.”
^ Lit., “mga tul-an ha tagoangkan.”
^ Ha iba nga lugar, “sudang.”
^ O “nga magkakaada ka baratunon ha.”
^ Lit., “unod.”
^ O “waray pulos.”
