An Ikaduha nga Libro ni Samuel 8:1-18
8 Ha urhi, ginpirde ni David an mga Filisteo+ ngan ginsakop hira,+ ngan ginkuha ni David an Meteg-ama tikang ha mga kamot han mga Filisteo.
2 Ginpirde niya an mga Moabita+ ngan ginpahigda hira nga nakarumbay ha tuna ngan ginsukol an rumbay pinaagi hin pisi. Nagsukol hiya hin duha ka pisi para ha mga paratayon ngan hin usa nga bug-os nga pisi para ha mga titipigan nga buhi.+ Ngan an mga Moabita nagin mga surugoon ni David ngan naghatag hira hin bayad.*+
3 Ginpirde ni David hi Hadadezer nga anak nga lalaki ni Rehob nga hadi han Zoba+ samtang nagbibiyahe hiya basi ipahiuli an iya awtoridad ha Salog Eufrates.+
4 Nakabihag hi David hin 1,700 nga parapangabayo ngan 20,000 nga nagbabaktas nga sundalo ni Hadadezer. Katapos, ginpamigtingan* ni David an haros ngatanan nga kabayo nga may karuwahe labot la han 100 nga kabayo.+
5 Han an mga Siryano ha Damasco+ kinadto basi buligan hi Hadi Hadadezer han Zoba, ginpamatay ni David an 22,000 nga Siryano.+
6 Katapos, nagtindog hi David hin mga kampo hin mga sundalo ha Damasco ha Sirya, ngan an mga Siryano nagin mga surugoon ni David ngan naghatag hira hin bayad. Gintagan ni Jehova hi David hin kadaogan* bisan diin hiya kumadto.+
7 Ginkuha liwat ni David an malidong nga bulawan nga mga taming tikang ha mga surugoon ni Hadadezer ngan gindara ito ha Jerusalem.+
8 Nagkuha hi Hadi David hin damu gud nga tumbaga* tikang ha Beta ngan Berotai, nga mga syudad ni Hadadezer.
9 Hinbaroan ni Hadi Toi han Hamat+ nga ginpirde ni David an ngatanan nga sundalo ni Hadadezer.+
10 Salit ginsugo ni Toi an iya anak nga lalaki nga hi Joram ngadto kan Hadi David basi kumustahon ngan pasidunggan hiya kay nakiggirra hiya kan Hadadezer ngan ginpirde niya hiya (kay hi Hadadezer agsob makiggirra kan Toi), ngan nagdara hi Joram hin mga gamit nga silber, bulawan, ngan tumbaga.
11 Ginbaraan ito ni Hadi David para kan Jehova, upod an ginbaraan niya nga mga silber ngan mga bulawan tikang ha ngatanan nga nasud nga iya ginsakop:+
12 tikang ha Sirya ngan Moab,+ tikang ha mga Ammonita, ha mga Filisteo,+ ha mga Amalekita,+ ngan tikang ha dinag-an ni Hadadezer+ nga anak ni Rehob nga hadi han Zoba.
13 Naghimo liwat hi David hin ngaran para ha iya kalugaringon han binalik hiya tikang ha pagpamatay hin 18,000 nga Edomita ha Walog han Asin.+
14 Nagtindog hiya ha Edom hin mga kampo hin mga sundalo. Ha bug-os nga Edom nagtindog hiya hin mga kampo, ngan an ngatanan nga Edomita nagin mga surugoon ni David.+ Gintagan ni Jehova hi David hin kadaogan* bisan diin hiya kumadto.+
15 Padayon nga naghadi hi David ha bug-os nga Israel,+ ngan hi David nagpapadapat hin hustisya ngan katadongan+ ha ngatanan niya nga katawohan.+
16 Hi Joab+ nga anak nga lalaki ni Zeruias an nangunguna ha kasundalohan, ngan hi Jehosafat+ nga anak nga lalaki ni Ahilud an pararekord.
17 Hi Zadok+ nga anak nga lalaki ni Ahitub ngan hi Ahimelec nga anak nga lalaki ni Abiatar an mga saserdote, ngan hi Seraias an sekretaryo.
18 Hi Benaias+ nga anak nga lalaki ni Jehoiada an nangunguna ha mga Kereteo ngan mga Peleteo.+ Ngan an mga anak nga lalaki ni David nagin nangunguna nga mga ministro.*
Mga footnote
^ Karuyag sidngon, iya ginpangutdan hin mga ugat ha bitiis.
^ O “katalwasan.”
^ Ha Ingles, copper.
^ O “katalwasan.”
^ Lit., “nagin mga saserdote.”
