An Ikaduha nga Libro han mga Cronicas 8:1-18
8 Ha kataposan han 20 ka tuig, nga durante hito gintukod ni Solomon an balay ni Jehova ngan an iya kalugaringon nga balay,*+
2 gintukod utro ni Solomon an mga syudad nga iginhatag ni Hiram+ kan Solomon ngan ginpaukoy didto an mga Israelita.*
3 Dugang pa, kinadto hi Solomon ha Hamat-zoba ngan ginsakop ito.
4 Katapos, iya gintukod* an Tadmor ha kamingawan ngan an ngatanan nga syudad nga bodega+ nga iya gintukod ha Hamat.+
5 Gintukod liwat niya an Igbaw nga Bet-horon+ ngan an Ubos nga Bet-horon,+ mga syudad nga ginparig-on pinaagi hin mga pader, mga ganghaan, ngan mga trangka,
6 ngan an Baalat+ pati an ngatanan nga syudad nga bodega ni Solomon, an ngatanan nga syudad para han mga karuwahe,+ an mga syudad para han mga parapangabayo, ngan an anoman nga karuyag ni Solomon nga tukuron ha Jerusalem, ha Lebanon, ngan ha ngatanan nga tuna nga sakop niya.
7 Mahitungod han ngatanan nga katawohan nga nanhibilin tikang ha mga Hiteo, ha mga Amorita, ha mga Perizita, ha mga Hivita, ngan ha mga Jebusita,+ nga diri bahin han Israel,+
8 an ira katulinan nga nanhibilin ha tuna—an mga tawo nga waray pooha han mga Israelita+—gin-obligar ni Solomon nga magtrabaho para ha iya tubtob hini nga adlaw.+
9 Pero waray himoa ni Solomon nga mga uripon para ha iya buruhaton an bisan hin-o han mga Israelita,+ kay hira an iya mga girriro, an mga lider han iya mga opisyal, ngan an mga lider han iya mga parapadalagan hin karuwahe ngan mga parapangabayo.+
10 May 250 nga lider han mga administrador hi Hadi Solomon, an mga kapatas nga nagdumara han mga tawo.+
11 Gindara liwat ni Solomon an anak nga babaye han Paraon+ tikang ha Syudad ni David ngadto ha balay nga iya gintukod para ha iya,+ kay hiya nagsiring: “Bisan kon akon hiya asawa, diri hiya angay umukoy ha balay ni Hadi David han Israel, kay baraan an mga lugar nga ginbutangan han Arka ni Jehova.”+
12 Katapos, naghalad hi Solomon hin mga halad nga sinunog+ para kan Jehova ha halaran+ ni Jehova nga iya gintukod ha prente han beranda.+
13 Ginsunod niya an buruhaton kada adlaw ngan naghalad hin mga halad uyon ha sugo ni Moises para ha mga Sabbath,+ ha mga dulom,+ ngan ha itinanda nga mga piyesta tulo ka beses ha usa ka tuig+—ha Piyesta han Tinapay nga Waray Libadura,+ ha Piyesta han mga Semana,+ ngan ha Piyesta han mga Payag.*+
14 Dugang pa, iya gintuinan an mga grupo han mga saserdote+ para ha ira mga buruhaton uyon ha surundon nga iginhatag han iya tatay nga hi David, ngan an mga Levita para ha ira mga pwesto, ha pagdayaw+ ngan pag-alagad ha presensya han mga saserdote uyon ha buruhaton kada adlaw, ngan an mga parabantay han ganghaan ha ira mga grupo para ha iba-iba nga mga ganghaan,+ kay ito an iginsugo ni David, an surugoon han tinuod nga Dios.
15 Ngan waray hira sumimang ha sugo han hadi para ha mga saserdote ngan ha mga Levita may kalabotan ha bisan ano nga butang o may kalabotan ha mga bodega.
16 Salit an ngatanan nga buruhaton ni Solomon organisado hin maopay,* tikang ha adlaw nga iginlatag an pundasyon han balay ni Jehova+ tubtob nga nahuman ito. Salit natapos an balay ni Jehova.+
17 Hito nga panahon hi Solomon kinadto ha Ezion-geber+ ngan ha Elot+ ha baybayon ha tuna han Edom.+
18 Hi Hiram+ nagpadara ha iya hin mga barko ngan eksperyensyado nga mga marinero pinaagi han iya mga surugoon. Kinadto hira ha Ofir+ kaupod han mga surugoon ni Solomon ngan kinuha tikang didto hin 450 ka talanton* nga bulawan+ ngan gindara ito kan Hadi Solomon.+
Mga footnote
^ O “palasyo.”
^ Lit., “mga anak nga lalaki ni Israel.”
^ O “gintukod utro.”
^ O “Temporaryo nga mga Sirongan.”
^ O “mahapsay; natapos.”
