An Siyahan nga Libro han mga Hadi 6:1-38
6 Ha ika-480 ka tuig tikang han paggawas han mga Israelita* ha tuna han Ehipto,+ ha ikaupat ka tuig tikang han nagin hadi hi Solomon ha Israel, ha bulan han Ziv*+ (karuyag sidngon, an ikaduha nga bulan), nagtikang hiya pagtukod han balay ni Jehova.*+
2 An balay nga gintukod ni Solomon para kan Jehova 60 ka siko* an kahilaba, 20 ka siko an kahilapad, ngan 30 ka siko an kahitaas.+
3 An beranda+ ha prente han templo* 20 ka siko an kahilaba,* pariho han kahilapad han balay.* An sukol hito tikang ha prente han balay napulo ka siko.
4 Ginhimoan niya an balay hin mga bintana nga an mga hamba nagtitikahaligot.*+
5 Dugang pa, ginsuy-aban niya an bungbong han balay; ginhimo ito ha mga bungbong ha palibot han balay, han templo* ngan han gisusuluri nga kwarto,+ ngan naghimo hiya hin mga kwarto ha ligid ha bug-os nga palibot.+
6 An siyahan nga andana han mga kwarto ha ligid lima ka siko an kahilapad, an ikaduha nga andana unom ka siko an kahilapad, ngan an ikatulo nga andana pito ka siko an kahilapad, kay ginhimoan niya an bug-os nga palibot han balay hin mga patongan,* basi waray mga buho an mga bungbong han balay.+
7 An balay gintukod gamit an mga bato nga gintabas na nga daan ha ginkuhaan hito,+ basi waray mabatian nga tunog han mga martilyo o mga atsa o bisan ano nga puthaw nga mga garamiton dida ha balay samtang gintutukod ito.
8 An aragian tipasulod ha ligid nga mga kwarto ha siyahan nga andana aada ha sur* nga bahin han balay,+ ngan may nalibot nga hagdan pakadto ha ikaduha nga andana, ngan tikang ha ikaduha nga andana pakadto ha ikatulo nga andana.
9 Nagpadayon hiya ha pagtukod han balay ngan gintapos ito,+ ngan nagbutang hiya hin mga sapayan nga kahoy nga sedro para ha atop han balay ngan gin-atopan ito hin nagrurumbay nga mga tabla nga sedro.+
10 Ginhimo niya an mga kwarto ha ligid ha bug-os nga palibot han balay,+ nga an kada tagsa lima ka siko an kahitaas, ngan igindugtong ito ha balay gamit an mga kahoy nga sedro.
11 Hito liwat nga panahon, hi Jehova nagpadara hin mensahe kan Solomon:
12 “May kalabotan hini nga balay nga imo gintutukod, kon magkinabuhi ka uyon ha mga surundon nga akon ginhimo ngan sundon mo an akon mga paghukom ngan sugton mo an ngatanan nga akon sugo pinaagi ha pagkinabuhi uyon hito,+ akon liwat tutumanon ha imo an akon iginsaad ha imo tatay nga hi David,+
13 ngan maukoy ako ha butnga han mga Israelita,+ ngan diri ko papabay-an an Israel nga akon katawohan.”+
14 Hi Solomon nagpadayon ha pagtukod han balay basi mahuman ito.
15 Ginhimo niya an mga bungbong ha sulod han balay gamit an mga tabla nga sedro. Ginhaklapan niya hin kahoy an mga bungbong ha sulod, tikang ha salóg tubtob ha mga pagbo han alkuba, ngan iya ginbawbawan hin kahoy nga abeto an salóg han balay.+
16 Ngan naghimo hiya hin dibisyon nga 20 ka siko ha luyo nga bahin han balay gamit an mga tabla nga sedro, tikang ha salóg tubtob ha mga sapayan, ngan ginhimo niya ha sulod hito* an gisusuluri nga kwarto,+ an Pinakabaraan.+
17 Ngan an templo*+—an bahin han balay ha prente hito—40 ka siko.
18 An kahoy nga sedro ha sulod han balay gin-ukitan hin mga prutas nga pariho hin pakwan+ ngan hin mga bukad nga nabuklad.+ Ito ngatanan kahoy nga sedro; waray nakikita nga bato.
19 Ngan iya gin-andam an gisusuluri nga kwarto+ ha sulod han balay basi butangan han arka han kasabotan ni Jehova.+
20 An gisusuluri nga kwarto 20 ka siko an kahilaba, 20 ka siko an kahilapad, ngan 20 ka siko an kahitaas;+ ngan iya ito ginhaklapan hin puro nga bulawan; an halaran iya ginhaklapan+ hin kahoy nga sedro.
21 Ginhaklapan ni Solomon an sulod han balay hin puro nga bulawan,+ ngan ginkutayan niya hin bulawan nga mga kadena an prente han gisusuluri nga kwarto,+ nga ginhaklapan hin bulawan.
22 Ginhaklapan niya hin bulawan an bug-os nga balay tubtob nga nahuman ito; ginhaklapan liwat niya hin bulawan an bug-os nga halaran+ hirani ha gisusuluri nga kwarto.
23 Ha gisusuluri nga kwarto naghimo hiya hin duha nga kerubin+ tikang ha kahoy nga palotsina,* nga an kada tagsa napulo ka siko an kahitaas.+
24 An sukol han usa nga pako han kerubin lima ka siko, ngan an luyo nga pako lima ka siko. Tikang ha kataposan han usa nga pako tubtob ha kataposan han luyo nga pako napulo ka siko.
25 An ikaduha nga kerubin napulo ka siko liwat. Pariho an kadaku ngan an kurti han duha nga kerubin.
26 An kahitaas han usa nga kerubin napulo ka siko, pariho han usa pa nga kerubin.
27 Katapos iginbutang niya an mga kerubin+ ha sakob han sulod nga kwarto.* Nakabuklad an mga pako han mga kerubin salit an pako han usa nga kerubin abot ha usa nga bungbong ngan an pako han usa pa nga kerubin abot ha luyo nga bungbong, ngan an mga pako abot ha kabutngaan han balay, amo nga nagtatapo an mga pako.
28 Ngan iya ginhaklapan hin bulawan an mga kerubin.
29 Ngan ha ngatanan nga bungbong han balay ha bug-os nga palibot ha sulod ngan gawas nga mga kwarto,* nag-ukit hiya hin mga kerubin,+ mga kahoy nga palma,+ ngan mga bukad nga nabuklad.+
30 Ginhaklapan niya hin bulawan an salóg han balay ha sulod ngan gawas nga mga kwarto.
31 Ngan para ha aragian tipasulod ha gisusuluri nga kwarto naghimo hiya hin mga purtahan nga palotsina, mga harigi ha ligid, ngan mga hamba, sugad nga ikalima nga bahin.*
32 An duha nga purtahan hinimo ha palotsina, ngan iya ito gin-ukitan hin mga kerubin, mga kahoy nga palma, ngan mga bukad nga nabuklad, ngan ginhaklapan niya ito hin bulawan; ngan an bulawan iya ginpilpig ngada ha bawbaw han mga kerubin ngan mga kahoy nga palma.
33 Para ha aragian tipasulod ha templo,* sugad hito niya ginhimo an mga hamba nga palotsina, nga parte han ikaupat nga bahin.*
34 Ngan naghimo hiya hin duha nga purtahan nga kahoy nga abeto. An usa nga purtahan may duha nga sada nga nabibirik-birik, ngan an usa pa nga purtahan may duha nga sada nga nabibirik-birik.+
35 Nag-ukit hiya hin mga kerubin, mga kahoy nga palma, ngan mga bukad nga nabuklad, ngan ginhaklapan hin manipis nga pligo han bulawan an mga inukit.
36 Ginhimo niya an sulod nga bungsaran+ nga may tulo ka rumbay nga tinabas nga bato ngan usa ka rumbay nga mga sapayan nga sedro.+
37 Ha ikaupat ka tuig, ha bulan han Ziv,* iginpahamutang an pundasyon han balay ni Jehova;+
38 ngan ha ika-11 ka tuig, ha bulan han Bul* (karuyag sidngon, an ikawalo nga bulan), nahuman an balay uyon ha ngatanan nga mga detalye hito ngan sumala ha plano hito.+ Salit inabot hin pito ka tuig an iya pagtukod hito.
Mga footnote
^ Lit., “mga anak ni Israel.”
^ Lit., “templo han balay.”
^ O “kahilapad.”
^ O “20 ka siko an sukol uyon ha kahilapad han balay.”
^ O “nagtitikaguti (nagtitikakipot) nga mga bintana.”
^ An Baraan an gintutudlok dinhi.
^ O “mga gaha.”
^ Lit., “too.”
^ Karuyag sidngon, ha sulod han balay.
^ Karuyag sidngon, an Baraan, nga aada ha prente han Pinakabaraan.
^ Lit., “kahoy nga lana,” posible nga an palotsina ha Aleppo.
^ Karuyag sidngon, an Pinakabaraan.
^ Lit., “ha sulod ngan ha gawas.”
^ Bangin nagtutudlok ha paghimo han hamba han purtahan o ha kadakuon han mga purtahan.
^ An Baraan an gintutudlok dinhi.
^ Bangin nagtutudlok ha paghimo han hamba han purtahan o ha kadakuon han mga purtahan.
