An Siyahan nga Surat ha mga Taga-Corinto 12:1-31
12 Yana, mga kabugtoan, diri ko karuyag nga waray kamo hinbabaroan mahitungod han espirituwal nga mga regalo.+
2 Maaram kamo nga han katawohan han mga nasud* pa kamo, naimpluwensyahan ngan naisimang kamo ngadto ha diri nakakayakan nga mga idolo,+ ngan nasunod kamo bisan ngain kamo nira dad-on.
3 Yana karuyag ko hibaroan niyo nga waray nagyayakan pinaagi han espiritu han Dios an nasiring: “Ginpanhimaraot hi Jesus!” ngan waray makakasiring: “Hi Jesus an Ginoo!” kon diri pinaagi han baraan nga espiritu.+
4 Yana may-ada iba-iba nga mga regalo, pero may-ada usa la nga espiritu;+
5 ngan may-ada iba-iba nga mga ministeryo,*+ pero usa la an Ginoo;
6 ngan may-ada iba-iba nga mga buruhaton, pero usa la nga Dios an nagpapahinabo nga mabuhat ito ngatanan ha ngatanan.+
7 Pero nakikita gud ha kada tagsa an bulig han espiritu para ha mapulsanon nga katuyoan.+
8 Kay ha usa, iginhatag an regalo nga pagyakan* han kinaadman pinaagi han espiritu, ha usa an pagyakan han kahibaro uyon ha amo gihapon nga espiritu,
9 ha usa an pagtoo+ pinaagi han amo gihapon nga espiritu, ha usa an mga regalo ha pagtambal+ pinaagi hito nga usa nga espiritu,
10 ngan ha usa an pagpakita hin gamhanan nga mga buhat,+ ha usa an pagtagna, ha usa an husto nga pagturotimbang han giniyahan nga mga kapahayagan,+ ha usa an pagyakan hin iba-iba nga mga pinulongan,*+ ngan ha usa an pag-interpretar han mga pinulongan.+
11 Pero ini ngatanan nga buruhaton ginbubuhat han amo gihapon nga espiritu, iginhahatag ini ha kada tagsa uyon ha kaburut-on hito.
12 Kay sugad la nga an lawas uusa pero damu an parte, ngan an ngatanan nga parte hito nga lawas, bisan kon damu, uusa la nga lawas,+ sugad man an Kristo.
13 Kay pinaagi han usa nga espiritu ginbawtismohan kita ngatanan basi magin usa nga lawas, mga Judio man o mga Griego, mga uripon man o may kagawasan, ngan kita ngatanan ginpainom han usa nga espiritu.
14 Ha pagkamatuod, diri la usa an parte han lawas kondi damu.+
15 Kon an tiil* magsiring, “Tungod kay diri ako kamot, diri ako parte han lawas,” diri ini hinungdan nga diri ito magin parte han lawas.
16 Ngan kon an talinga magsiring, “Tungod kay diri ako mata, diri ako parte han lawas,” diri ini hinungdan nga diri ito magin parte han lawas.
17 Kon an bug-os nga lawas mata, diin man an sentido ha pagpamati? Kon an bug-os nga lawas para ha pagpamati, diin man an sentido ha paghamot?
18 Lugod, an tagsa nga mga parte han lawas iginpahamutang han Dios uyon ha iya karuyag.
19 Kon an ngatanan nga parte parapriho la, magigin lawas ba ito?
20 Lugod, damu an parte, kondi usa la nga lawas.
21 An mata diri makakasiring ha kamot, “Diri ko ikaw kinahanglan,” o an ulo diri liwat makakasiring ha mga tiil, “Diri ko kamo kinahanglan.”
22 Ha kabaliktaran, kinahanglanon an mga parte han lawas nga baga hin maluya,
23 ngan an mga parte han lawas nga ginhuhunahuna naton nga diri sugad kadungganon mas ginpapasidunggan naton,+ salit an aton mga parte nga diri sugad katahom mas gintatagan hin dignidad,
24 pero an aton magtahom nga mga parte diri nanginginahanglan hin bisan ano. Kondi han ginhimo han Dios an lawas, mas gintagan niya hin dungog an parte nga kulang hin dungog,
25 basi waray pagkabahin-bahin ha lawas, lugod an mga parte hito sadang magtagad ha usa kag usa.+
26 Kon an usa nga parte nag-aantos, an ngatanan nga iba pa nga parte nag-aantos upod hito;+ o kon an usa nga parte ginpapasidunggan, an ngatanan nga iba pa nga parte nagrarayhak upod hito.+
27 Yana kamo an lawas han Kristo,+ ngan an tagsa ha iyo parte hito.+
28 Ngan gintagan han Dios hin toka an kada tagsa dida ha kongregasyon: siyahan, mga apostol;+ ikaduha, mga propeta;+ ikatulo, mga magturutdo;+ katapos, gamhanan nga mga buhat;+ katapos, mga regalo ha pagtambal;+ pagbulig ha iba; mga abilidad ha pagpanguna;+ pagyakan hin iba-iba nga mga pinulongan.+
29 Diri ngatanan apostol, diri ba? Diri ngatanan propeta, diri ba? Diri ngatanan magturutdo, diri ba? Diri ngatanan naghihimo hin gamhanan nga mga buhat, diri ba?
30 Diri ngatanan may mga regalo ha pagtambal, diri ba? Diri ngatanan nagyayakan hin iba-iba nga mga pinulongan, diri ba?+ Diri ngatanan parainterpretar,* diri ba?+
31 Pero padayon nga pangalimbasugi* an mas mag-opay nga mga regalo.+ Ngan ipapakita ko ha iyo an pinakamaopay nga paagi.+
Mga footnote
^ Karuyag sidngon, mga diri tumuroo.
^ O “an mensahe.”
^ O “mga yinaknan.”
^ Ha iba nga lugar, “siki.”
^ O “mga parahubad.”
^ O “padayon nga pamilnga nga may kadasig.”
