Santiago 5:1-20
5 Pamati yana, kamo nga riko nga mga tawo, pagtangis ngan pagnguyngoy tungod han mga kasakitan nga tiabot ha iyo.
2 An iyo karikohan nadunot, ngan an iyo mga bado ginkutkot han mga insekto.
3 An iyo bulawan ngan silber gintaoy, ngan an taoy hito magigin pamatuod kontra ha iyo ngan uubuson hito an iyo unod. An iyo gintirok magigin sugad hin kalayo ha kataposan nga mga adlaw.
4 Kitaa! Padayon nga nagsisinggit an suhol nga waray niyo ihatag ha mga trabahador nga nag-ani ha iyo mga uma, ngan an mga singgit han mag-arani ha pangaro hin bulig nakaabot ha mga talinga ni Jehova nga magmarando han langitnon nga kasundalohan.
5 Nagkinabuhi kamo ha tuna ha kahimyang ngan pagpatakas ha kalugaringon. Ginpatambok niyo an iyo kasingkasing tubtob ha adlaw han pamatay.
6 Iyo ginhukman ngan ginpatay pa ngani an usa nga matadong. Diri ba nakontra hiya ha iyo?
7 Salit mga kabugtoan, magpailob kamo tubtob ha presensya* han Ginoo. Kitaa! An parag-uma padayon nga naghuhulat han presyoso nga bunga han tuna, nagpapailob tungod hito tubtob nga umabot an una nga uran ngan an urhi nga uran.
8 Magpailob liwat kamo; rig-ona an iyo kasingkasing, kay an presensya han Ginoo hirani na.
9 Mga kabugtoan, ayaw kamo panhayhay* kontra ha usa kag usa, basi diri kamo paghukman. Kitaa! An Hukom natindog ha atubangan han purtahan.
10 Mga kabugtoan, himoa niyo nga susbaranan an pag-antos ha maraot ngan pagpailob han mga propeta, nga nagyayakan ha ngaran ni Jehova.
11 Kitaa! Iginpapahayag naton nga malipayon adton nagpapailob. Hinbatian niyo an mahitungod han pagpailob ni Job ngan an bendisyon nga iginhatag ni Jehova, nga hi Jehova mapinalanggaon ngan maloloy-on.
12 Labaw ha ngatanan, mga kabugtoan ko, ayaw na kamo panumpa pinaagi han langit o pinaagi han tuna o pinaagi han bisan ano nga panumpa. Lugod, an iyo Oo sadang magin Oo, ngan an iyo Diri, Diri, basi diri kamo paghukman.
13 May nag-aantos ba ha iyo hin kakurian? Padayon hiya nga mag-ampo. May malipayon ba ha iyo? Magkanta hiya hin mga salmo.
14 May-ada ba ha iyo may sakit? Tawagon niya an mga tigurang han kongregasyon, ngan paampoon hira para ha iya, ngan hirogan nira hiya hin lana ha ngaran ni Jehova.
15 Ngan an pag-ampo nga may pagtoo makakaopay ha may sakit,* ngan bubuligan hiya ni Jehova nga mag-opay. Sugad man, kon nakasala hiya, papasayloon hiya.
16 Salit bug-os nga igsumat niyo ha usa kag usa an iyo mga sala ngan ig-ampo an usa kag usa basi kamo mag-opay. An pangamuyo han matadong nga tawo may gahum ngan epektibo.
17 Hi Elias usa nga tawo nga may mga pagbati nga pariho ha aton, ngan sinsero nga nag-ampo hiya nga diri umuran; salit waray umuran hito nga tuna ha sulod hin tulo ka tuig ngan unom ka bulan.
18 Katapos nag-ampo utro hiya, ngan an langit naghatag hin uran ngan an tuna naghatag hin bunga.
19 Mga kabugtoan ko, kon may bisan hin-o ha iyo nga nahisisimang tikang ha kamatuoran ngan may nabulig ha iya nga makabalik,
20 sadang niyo hibaroan nga an bisan hin-o nga nabulig ha usa nga makasasala nga bayaan an iya sayop nga buhat magtatalwas han iya* kalag tikang ha kamatayon ngan magtatabon han damu nga sala.
Mga footnote
^ Kitaa an Apendise 5.
^ O “pagngurutob; pagharoy; pagreklamo.”
^ Ha literal, “ha ginkakapoy.”
^ Karuyag sidngon, an makasasala.
