Pahayag 21:1-27
21 Katapos, nakakita ako hin bag-o nga langit ngan bag-o nga tuna; kay an daan nga langit ngan an daan nga tuna naglabay na, ngan an dagat waray na.
2 Nakita ko an baraan nga syudad, an Bag-o nga Jerusalem, nga nalusad tikang ha langit tikang ha Dios, ngan andam na sugad nga karaslon nga babaye para ha iya magigin bana.
3 Ngan nakabati ako hin daku nga tingog tikang ha trono nga nasiring: “Kitaa! An tolda han Dios aada ha katawohan, ngan maukoy hiya kaupod nira, ngan hira magigin iya katawohan. Ngan an Dios mismo makakaupod nira.
4 Papahiron niya an mga luha ha ira mga mata, ngan mawawara na an kamatayon, pati an kabido, pagtangis, ngan kasakit. An daan nga mga butang naglabay na.”
5 Ngan an Dios nga nalingkod ha trono nagsiring: “Kitaa! Ginhihimo ko nga bag-o an ngatanan nga butang.” Nagsiring liwat hiya: “Isurat ini, kay ini nga mga pulong masasarigan ngan totoo.”
6 Katapos, nagsiring hiya ha akon: “Natuman na ito! Ako an Alpha ngan an Omega,* an tinikangan ngan an kataposan. An bisan hin-o nga nauuhaw paiinumon ko tikang ha burabod han tubig han kinabuhi nga waray bayad.
7 An bisan hin-o nga magdadaog ha pakig-away makakapanunod hini nga mga butang, ngan ako magigin iya Dios ngan hiya magigin akon anak.
8 Pero an mga talawan, an mga waray pagtoo, an mga mangil-ad tungod han ira kahugaw, an mga parapamatay, an mga imoral,* an mga nagbubuhat hin espiritismo, an mga parasingba ha dios-dios, ngan an ngatanan nga buwaon, mahingangadto ha linaw nga nagdidilaab ha kalayo ngan asupre. Nangangahulogan ini han ikaduha nga kamatayon.”
9 Inabot an usa han pito nga anghel nga may pito nga yahong nga puno han pito nga kataposan nga peste, ngan nagsiring hiya ha akon: “Kadi, ngan ipapakita ko ha imo an karaslon nga babaye, an magigin asawa han Kordero.”
10 Salit pinaagi han gahum han espiritu gindara ako han anghel ngadto ha daku ngan hitaas gud nga bukid, ngan iya iginpakita ha akon an baraan nga syudad han Jerusalem nga nalusad tikang ha langit tikang ha Dios
11 ngan may himaya han Dios. Nagraranggat ito pariho hin marahalon gud nga bato, sugad han haspe nga bato nga nag-iinggat sugad katin-aw han kristal.
12 Daku ngan hitaas gud an pader hito nga may 12 nga ganghaan, ngan may 12 nga anghel ha mga ganghaan. Nakaukit ha mga ganghaan an mga ngaran han 12 nga tribo han mga anak ni Israel.
13 Ha este may tulo nga ganghaan, ha norte may tulo nga ganghaan, ha sur may tulo nga ganghaan, ngan ha weste may tulo nga ganghaan.
14 An pader han syudad may 12 nga bato nga pundasyon nga may 12 nga ngaran han 12 nga apostol han Kordero.
15 An usa nga nakikiistorya ha akon may ginkakaptan nga bulawan nga tangbo nga isurukol, basi suklon an syudad ngan an mga ganghaan ngan an pader hito.
16 Kwadrado an syudad ngan magkapariho an kahilaba ngan kahilapad hito. Han ginsukol niya an syudad gamit an tangbo, 12,000 ka stadia* ito; parapriho an kahilaba, kahaluag, ngan kahitaas hito.
17 Ginsukol liwat niya an pader hito, 144 ka siko,* sumala ha suruklan han tawo nga pariho liwat ha suruklan han anghel.
18 An pader hito haspe, ngan an syudad puro nga bulawan pariho han matin-aw nga salaming.
19 An mga pundasyon han pader han syudad gin-adornohan hin ngatanan nga klase han marahalon nga bato:* an una nga pundasyon haspe, an ikaduha sapiro, an ikatulo kalsedonia, an ikaupat esmeralda,
20 an ikalima sardonika, an ikaunom sardio, an ikapito krisolito, an ikawalo berilo, an ikasiyam topas, an ikanapulo krisopraso, an ikaonse hasinto, ngan an ikadose amatista.
21 Dugang pa, an 12 nga ganghaan 12 nga perlas, kay an tagsa nga ganghaan perlas. Ngan an haluag nga kalye han syudad puro nga bulawan, pariho hin masilhag nga salaming.
22 Waray ako nakita nga templo didto, kay hi Jehova nga Dios nga Makagarahum-ha-ngatanan ngan an Kordero amo an templo hito.
23 Ngan an syudad diri na nagkikinahanglan hin lamrag han adlaw o han bulan, kay an himaya han Dios an nakakalamrag hito, ngan an Kordero an lampara hito.
24 An mga nasud maglalakat pinaagi han lamrag hito, ngan an mga hadi ha tuna magdadara ngadto ha sulod hito han ira himaya.
25 Ngan an mga ganghaan hito diri gud sasadhan ha adlaw, kay waray didto kagab-ihon.
26 Ira dadad-on ngadto ha sulod hito an himaya ngan dungog han mga nasud.
27 Pero diri gud makakasulod hito an bisan ano nga mahugaw ngan an bisan hin-o nga nagbubuhat hin mangil-ad ngan hin malimbong. An makakasulod la amo an mga nakasurat ha kanan Kordero linukot nga basahon han kinabuhi.
Mga footnote
^ Kitaa an footnote ha Pah 1:8.
^ Kitaa an footnote ha 1Co 5:9.
^ An usa ka stadion mga 600 piye (mga 190 m).
^ Mga 210 piye (64 m).
^ Kitaa an “Marahalon nga mga bato” ha Glossary.
