Juan 21:1-25
21 Katapos, nagpakita utro hi Jesus ha mga disipulo ha dagat han Tiberias. Nagpakita hiya ha sugad hini nga paagi.
2 Magkaurupod nga nakadto hira Simon Pedro, Tomas nga gintatawag nga An Kambal, Natanael nga taga-Cana ha Galilea, an mga anak ni Sebedeo, ngan an duha pa han mga disipulo.
3 Nagsiring ha ira hi Simon Pedro: “Mangingisda ako.” Binaton hira: “Maupod kami ha imo.” Salit linakat hira ngan sinakay ha baluto, pero hito nga gab-i waray hira nadakop.
4 Kondi han tikaaga na, tinindog hi Jesus ha baybayon, pero an mga disipulo waray pakakilala nga hiya hi Jesus.
5 Katapos nagsiring hi Jesus ha ira: “Mga anak, may pagkaon ba kamo?” Binaton hira: “Waray!”
6 Nagsiring hiya: “Itunod an pukot ha too nga dapit han baluto ngan makakadakop kamo.” Igintunod nira ito, pero waray na hira pakakaalsa kay damu gud an isda.
7 Salit an disipulo nga hinigugma ni Jesus nagsiring kan Pedro: “An Ginoo ito!” Pakabati ni Simon Pedro nga ito an Ginoo, nagsul-ot hiya hin pantungbaw nga panapton kay pan-ilarom la an iya sul-ot, ngan linukso hiya ha dagat.
8 An iba nga disipulo nga nahibilin ha gutiay nga baluto sinunod ha iya nga gindadanas an pukot nga puno hin isda, kay mga 100 ka metros la an ira kahirayo ha baybayon.
9 Paghaw-as nira ha baybayon, nakita nira nga may isda nga iginsusugba ha baga ngan may tinapay.
10 Nagsiring ha ira hi Jesus: “Pagdara ngadi hin mga isda nga iyo pa la nadakop.”
11 Salit hi Simon Pedro sinakay ha baluto ngan gindanas an pukot ngadto ha baybayon. Puno ito hin 153 nga dagku nga isda. Pero bisan kon damu gud ito, waray kagisi an pukot.
12 Gintawag hira ni Jesus: “Kadi, pamahaw na kamo.” Waray bisan usa han mga disipulo an nagpakiana kon hin-o hiya, kay maaram hira nga ito an Ginoo.
13 Dinaop hi Jesus ngan ginkuha an tinapay, iginhatag ito ha ira pati an isda.
14 Ini an ikatulo nga pagpakita ni Jesus ha iya mga disipulo katapos hiya banhawon.
15 Pakapamahaw nira, nagpakiana hi Jesus kan Simon Pedro: “Simon nga anak ni Juan, hinigugma mo ba ako labaw pa hini?” Binaton hiya: “Oo Ginoo, maaram ka nga hinigugma ko ikaw.” Nagsiring hi Jesus: “Pakaona an akon nati nga mga karnero.”
16 Ha ikaduha nga higayon, nagpakiana hiya kan Pedro: “Simon nga anak ni Juan, hinigugma mo ba ako?” Binaton hiya: “Oo Ginoo, maaram ka nga hinigugma ko ikaw.” Nagsiring hi Jesus: “Atamana an akon gudtiay nga karnero.”
17 Ha ikatulo nga higayon, nagpakiana hiya: “Simon nga anak ni Juan, hinigugma mo ba ako?” Nasubo hi Pedro nga ha ikatulo nga higayon iginpakiana ini ni Jesus: “Hinigugma mo ba ako?” Salit binaton hiya: “Ginoo, maaram ka han ngatanan; maaram ka nga hinigugma ko ikaw.” Ginsidngan hiya ni Jesus: “Pakaona an akon gudtiay nga karnero.
18 Ha pagkamatuod susumatan ko ikaw, Han burobata ka pa, nakakalugaring ka pagbado ngan napakadto ka kon diin mo karuyag. Pero kon lagas ka na, uunaton mo an imo mga kamot ngan iba an magbabado ha imo ngan magdadara ha imo ngadto ha diri mo karuyag.”
19 Ginsiring niya ini basi ipasabot kon ha ano nga klase hin kamatayon mahihimaya ni Pedro an Dios. Katapos niya magyakan hini, ginsidngan niya hi Pedro: “Padayon nga sunod ha akon.”
20 Liningi hi Pedro ngan nakita niya nga nagsisinunod an disipulo nga hinigugma ni Jesus, an sinandig ha dughan Niya han naninihapon hira ngan nagpakiana: “Ginoo, hin-o ito nga magtatraydor ha imo?”
21 Salit han nakita ni Pedro ito nga disipulo, nagpakiana hiya kan Jesus: “Ginoo, ano an bubuhaton hini nga tawo?”
22 Binaton hi Jesus: “Kon karuyag ko nga magpadayon hiya tubtob ha akon pagkanhi, kay ano nga mababaraka ka hito? Padayon nga sunod ha akon.”
23 Salit nakaabot ha kabugtoan an sumat nga ito nga disipulo diri mamamatay. Pero diri ito an ginsiring ni Jesus, lugod nagsiring hiya: “Kon karuyag ko nga magpadayon hiya tubtob ha akon pagkanhi, kay ano nga mababaraka ka hito?”
24 Ito nga disipulo an nagpapamatuod ngan nagsurat hini, ngan maaram kita nga totoo an iya iginsusumat.
25 Ha pagkamatuod, damu pa an ginbuhat ni Jesus, nga kon isusurat an bug-os nga detalye, ha akon paghunahuna diri maigo ha kalibotan an mga linukot nga ginsuratan.
