Juan 15:1-27
15 “Ako an totoo nga puno han ubas, ngan an akon Amay an parauma.
2 An tagsa ko nga sanga nga diri namumunga iya gin-uutod, ngan an tagsa nga sanga nga namumunga iya ginpapangutdan* basi mamunga hin mas damu.
3 Limpyo na kamo tungod han pulong nga akon ginyakan ha iyo.
4 Magpabilin kamo nga kahiusa ko, ngan ako magpapabilin nga kahiusa niyo. An sanga diri mamumunga kon diri ito magpabilin ha puno han ubas. Ha pariho nga paagi, diri kamo mamumunga kon diri kamo magpabilin nga kahiusa ko.
5 Ako an puno han ubas, kamo an mga sanga. An nagpapabilin nga kahiusa ko, ngan ako kahiusa niya, nagbubunga hin damu; kay waray kamo mahihimo kon bulag kamo ha akon.
6 Bisan hin-o nga diri nagpapabilin nga kahiusa ko iginlalabog sugad hin sanga ngan nauuga. Gintitirok han mga tawo ito nga mga sanga, iginlalabog ha kalayo ngan nasusunog.
7 Kon magpabilin kamo nga kahiusa ko ngan kon tipigan niyo an akon mga pulong, aroa an anoman nga karuyag niyo ngan ihahatag ito ha iyo.
8 An akon Amay napapasidunggan kon padayon nga namumunga kamo hin damu ngan ipinapakita niyo nga akon kamo mga disipulo.
9 Ginhihigugma ko kamo sugad han paghigugma ha akon han Amay. Magpabilin kamo ha akon gugma.
10 Kon gintutuman niyo an akon mga sugo, magpapabilin kamo ha akon gugma, sugad la nga gintutuman ko an mga sugo han Amay ngan nagpapabilin ha iya gugma.
11 “Ginsisiring ko ini ha iyo basi bug-os nga abaton niyo an kalipay nga akon inaabat.
12 Ini an akon sugo, nga maghigugmaay kamo sugad han paghigugma ko ha iyo.
13 Waray na malabaw ha gugma han usa nga naghahatag han iya kalag* para ha iya kasangkayan.
14 Kasangkayan ko kamo kon ginbubuhat niyo an iginsusugo ko ha iyo.
15 Diri ko na kamo gintatawag nga mga uripon, kay an uripon diri maaram han ginbubuhat han iya agaron. Kondi gintatawag ko kamo nga kasangkayan, kay an ngatanan nga hinbatian ko ha akon Amay iginpapahibaro ko ha iyo.
16 Diri kamo an nagpili ha akon, pero ginpili ko kamo ngan ginsugo nga padayon nga mamunga hin mga bunga nga magpapabilin, basi bisan ano an iyo aroon ha Amay ha akon ngaran, ihahatag niya ito ha iyo.
17 “Iginsusugo ko ini ha iyo basi maghigugmaay kamo.
18 Kon nasisina ha iyo an kalibotan, maaram kamo nga nasina ito ha akon antes masina ha iyo.
19 Kon kanan kalibotan kamo, hinigugma unta kamo han kalibotan kay panag-iya kamo hito. Pero tungod kay ginpili ko kamo tikang ha kalibotan, diri na kamo kanan kalibotan, salit nasisina ito ha iyo.
20 Hinumdumi an ginsiring ko ha iyo, An uripon diri labaw ha iya agaron. Kon gintimaraot ako nira, pagtitimarauton liwat kamo nira; kon gintuman nira an akon pulong, tutumanon liwat nira an iyo pulong.
21 Kondi bubuhaton nira ha iyo ini ngatanan tungod han akon ngaran, kay diri hira nakilala ha nagsugo ha akon.
22 Kon waray ako kumanhi ngan magyakan ha ira, waray unta hira sala; pero yana diri hira makakanigar han ira sala.
23 An nangangalas ha akon, nangangalas liwat ha akon Amay.
24 Kon waray ko buhata an mga milagro nga waray gud iba nga nakahimo, waray unta hira sala; pero yana nga nakita nira an akon mga milagro, nangangalas hira ha akon ngan ha akon Amay.
25 Pero nahitabo ini basi matuman an pulong nga nahisurat ha ira Balaud, ‘Nangalas hira ha akon nga waray hinungdan.’
26 Kon ipadara ko ha iyo tikang ha Amay an parabulig, an espiritu han kamatuoran, maabot ito tikang ha Amay ngan magpapamatuod mahitungod ha akon,
27 ngan magpapamatuod liwat kamo, kay kaupod ko kamo tikang han akon pagtikang ha ministeryo.
