Hebreo 1:1-14
1 Hadto, an Dios nakiistorya ha aton kaapoy-apoyan pinaagi han mga propeta ha damu nga higayon ngan ha damu nga paagi.
2 Yana, ha ikatarapos hini nga mga adlaw, nakikiistorya hiya ha aton pinaagi han iya Anak, nga iya ginpili sugad nga manurunod han ngatanan nga butang, ngan pinaagi ha iya ginhimo Niya an mga butang ha langit ngan ha tuna.*
3 Perpekto nga iginpakita niya an himaya han Dios* ngan kapariho gud hiya han Iya dagway, ngan hiya an nagsusustinir han ngatanan nga butang pinaagi han iya gamhanan nga pulong; ngan katapos kita niya limpyohan han aton mga sala, liningkod hiya ha too han Harangdon ha kahitas-an.
4 Salit nagin mas labaw hiya ha mga anghel, kay nakapanunod hiya hin ngaran nga mas ekselente kay han ira ngaran.
5 Pananglitan, hin-o gud ha mga anghel an ginsidngan han Dios: “Ikaw an akon anak; ako, yana nga adlaw, ako nagin imo amay”? Ngan nagsiring liwat: “Ako mismo magigin iya amay, ngan hiya magigin akon anak”?
6 Pero han iya ginpakanhi utro ha kalibotan an iya Suhag, hiya nagsiring: “Ngan an ngatanan nga anghel han Dios mayukbo ha iya.”
7 Nagsiring liwat hiya mahitungod ha mga anghel: “Iya ginhihimo nga mga espiritu an iya mga anghel, ngan iya ginhihimo nga naglalaga nga kalayo an iya mga ministro.”*
8 Pero mahitungod ha Anak hiya nagsiring: “An Dios amo an imo trono ha kadayonan, ngan an setro han imo Ginhadian amo an setro han katadongan.
9 Nahigugma ka ha katadongan, ngan nasisina ka ha pagkamatinalapason. Tungod hito an Dios, an imo Dios, nagdihog ha imo hin lana ngan naghatag ha imo hin mas daku nga kalipay kay han imo mga kaupod.”
10 Ngan: “Ha tinikangan, O Ginoo, imo ginlatag an mga pundasyon han tuna mismo, ngan an kalangitan amo an mga hinimo han imo mga kamot.
11 Mawawara ito ngatanan, pero ikaw magpapabilin ha kadayonan; ngan pariho hin panapton ito ngatanan madadaan,
12 ngan imo lulukuton ito sugad hin kurigmos, sugad hin pantungbaw nga panapton; ngan maliliwanan ito, pero ikaw amo la gihapon, ngan diri gud matatapos an imo katuigan.”
13 Pero hin-o gud ha mga anghel an ginsidngan han Dios: “Lingkod ha akon too, tubtob nga ibutang ko an imo mga kaaway sugad nga tungtongan han imo mga tiil”?
14 Diri ba hira ngatanan mga espiritu para ha sagrado nga pag-alagad, nga ginsugo basi magserbi ha mga makarawat han katalwasan?
Mga footnote
^ O “pagkaorganisa han mga butang.” Kitaa an “Sistema” ha Glossary.
^ Ha literal, “iya.”
^ O “mga nagsiserbi ha publiko.”
