Filipos 4:1-23
4 Salit mga kabugtoan nga hinigugma ko ngan ginhahandom gud, nga akon kalipay ngan korona, tindog kamo hin marig-on dapig ha Ginoo ha sugad hini nga paagi, mga hinigugma ko.
2 Akon ginsasagdonan hira Euodia ngan Sintike nga magkahiusa ha hunahuna ha pag-alagad ha Ginoo.
3 Oo, ginhahangyo ko liwat ikaw, sugad nga totoo nga igkasi-magburuhat,* nga padayon nga buligan ini nga kababayin-an nga nangalimbasog kaupod ko para ha maopay nga sumat, pati hi Clemente ngan an iba pa nga akon igkasi-magburuhat nga an mga ngaran nakasurat ha libro han kinabuhi.
4 Magmalipayon kamo pirme ha Ginoo. Uutruhon ko, Magmalipayon kamo!
5 Ipakita ha ngatanan nga tawo an iyo pagkamakatadunganon. An Ginoo hirani na.
6 Ayaw kamo kabaraka ha bisan ano, kondi ha ngatanan nga butang pinaagi han pag-ampo ngan pangamuyo nga may pagpasalamat, ipahibaro niyo ha Dios an iyo mga hangyo;
7 ngan an kamurayawan han Dios nga labaw ha ngatanan nga pagsabot magbabantay han iyo kasingkasing ngan han iyo panhunahuna pinaagi kan Kristo Jesus.
8 Ha kataposan, mga kabugtoan, bisan ano nga totoo, bisan ano nga sadang tagdon hin seryoso, bisan ano nga matadong, bisan ano nga putli, bisan ano nga makapaaghat han gugma, bisan ano nga dungganon, bisan ano nga maopay, ngan bisan ano nga darayawon, padayon nga tagda* niyo ito nga mga butang.
9 An mga butang nga iyo hinbaroan, ginkarawat, hinbatian, ngan hinkit-an ha akon, buhata niyo; ngan an Dios han kamurayawan maupod ha iyo.
10 Sugad nga kahiusa han Ginoo, nalilipay gud ako nga nahibalik na yana an iyo pagtagad ha akon. Bisan kon ginhinunahuna niyo ako, waray kamo magkaada oportunidad nga ipakita ito.
11 Ginyayakan ko ini, diri tungod kay nanginginahanglan ako, kay hinbaroan ko an pagin kontento anoman an akon kahimtang.
12 Maaram ako kon paonan-o magkinabuhi nga kulang han panginahanglan ngan kon paonan-o magkinabuhi nga hura. Hinbaroan ko an sekreto han pagin kontento ha ngatanan nga butang ngan kahimtang, busog man o gutom, abunda man o diri.
13 Kay ha ngatanan nga butang may kusog ako pinaagi ha iya nga naghahatag ha akon hin gahum.
14 Bisan pa hito, maopay gud an iyo ginbuhat nga ginbuligan niyo ako ha akon kasakitan.
15 Ha pagkamatuod, kamo nga mga taga-Filipos maaram liwat nga han hinbaroan niyo an maopay nga sumat, pagbaya ko ha Macedonia, waray iba nga kongregasyon nga binulig ha akon o kinarawat han akon bulig, labot la ha iyo,
16 kay bisan han nakadto ako ha Tesalonica makaduha kamo pagpadara hin bulig para ha akon panginahanglan.
17 Diri nga interesado ako ha regalo, lugod interesado ako ha bunga nga naghahatag ha iyo hin dugang nga ganansya.
18 Kondi may-ada ako han ngatanan nga akon ginkikinahanglan ngan sobra pa ngani. Puno na ako, yana nga nakarawat ko kan Epafrodito an iyo iginpadara nga mahamot, makaruruyag nga halad, ngan makalilipay ha Dios.
19 Sugad nga balos, an akon Dios nga hura hin karikohan maghahatag ha iyo han ngatanan nga iyo panginahanglan pinaagi kan Kristo Jesus.
20 Paghimayaon unta ha kadayonan an aton Dios ngan Amay. Amen.
21 Ipaabot an akon pangumusta ha tagsa nga baraan nga kahiusa ni Kristo Jesus. An kabugtoan nga kaupod ko nangungumusta ha iyo.
22 An ngatanan nga baraan, labi na gud an mga sulod-balay han Cesar,* nangungumusta ha iyo.
23 Makarawat unta niyo an diri-matupngan nga pagkabuotan han Ginoo nga hi Jesu-Kristo samtang nagpapakita kamo hin maopay nga disposisyon.
Mga footnote
^ O “igkasi-magparas-an han yugo.”
^ O “hunahunaa; pamalandonga.”
^ O “Emperador han Roma.”
