2 Timoteo 1:1-18
1 Tikang kan Pablo, nga apostol ni Kristo Jesus pinaagi han kaburut-on han Dios uyon ha saad nga kinabuhi pinaagi kan Kristo Jesus,
2 para kan Timoteo nga hinigugma ko nga anak:
Hinaot makarawat mo an diri-matupngan nga pagkabuotan, kalooy, ngan kamurayawan tikang ha Dios nga Amay ngan kan Kristo Jesus nga aton Ginoo.
3 Nagpapasalamat ako ha Dios, nga akon ginhahatagan hin sagrado nga pag-alagad nga may limpyo nga konsensya, sugad han ginbuhat han akon kaapoy-apoyan, nga diri ko gud ikaw nahingangalimtan ha akon mga pangamuyo ha adlaw ngan gab-i.
4 Kon nahinunumdoman ko an imo mga pagtangis, naghihingyap gud ako nga makita ka, basi mapuno ako hin kalipay.
5 Kay nahinunumdom ako han imo sinsero nga pagtoo, nga nakita siyahan ha imo apoy nga hi Loida ngan ha imo nanay nga hi Eunice, ngan sigurado ako nga sugad liwat hito an imo pagtoo.
6 Tungod hini ginpapahinumdoman ko ikaw nga padayon nga pasigahon sugad hin kalayo an regalo han Dios nga imo nakarawat pinaagi han pagtungbaw han akon mga kamot ha imo.
7 Kay an baraan nga espiritu nga ginhatag ha aton han Dios diri nagbubunga hin kahadlok, kondi hin gahum ngan gugma ngan maopay nga panhunahuna.
8 Salit ayaw ikaawod an pagpamatuod mahitungod ha aton Ginoo ngan ayaw liwat ako ikaawod nga usa nga priso tungod ha iya, lugod antosa an kasakitan tungod han maopay nga sumat pinaagi ha pagsarig ha gahum han Dios.
9 Gintalwas ngan gintawag kita niya basi magin mga baraan, diri tungod han aton mga buhat, kondi tungod han iya katuyoan ngan diri-matupngan nga pagkabuotan nga maiha na nga iginhatag ha aton pinaagi kan Kristo Jesus.
10 Pero yana iginpatin-aw gud ito pinaagi han pagpakita han aton Paratalwas nga hi Kristo Jesus, nga nagwara han kamatayon ngan naghatag hin kahayag mahitungod han kinabuhi ngan pagkadiri-nadudunot pinaagi han maopay nga sumat,
11 nga tungod hito ginpili ako nga magin parasangyaw, apostol, ngan magturutdo.
12 Ito an hinungdan nga nag-aantos liwat ako, pero diri ako naaawod, kay kilala ko an akon gintotoohan, ngan sigurado ako nga babantayan niya an akon igintapod ha iya tubtob ha itinanda nga adlaw.
13 Padayon nga sunda an surubdan* han maopay* nga mga pulong nga imo nabatian ha akon samtang iginpapakita mo an pagtoo ngan gugma sugad nga resulta han pagin kahiusa ni Kristo Jesus.
14 Bantayi an maopay nga igintapod ha imo pinaagi han baraan nga espiritu nga aadi ha aton.
15 Maaram ka nga damu nga tawo ha distrito han Asia an binaya ha akon, upod na hira Figelo ngan Hermogenes.
16 Hinaot kalooyan han Ginoo an panimalay ni Onesiforo, kay agsob ako niya parig-unon, ngan waray niya ikaawod an akon kapriso nga nakakadena.
17 Lugod, han nakadto hiya ha Roma, nangalimbasog gud hiya pagpinamiling ha akon ngan hin-agian niya ako.
18 Hinaot itugot han Ginoo nga makarawat niya an kalooy ni Jehova ha itinanda nga adlaw. Ngan maaram ka gud han ngatanan nga pag-alagad nga ginbuhat niya ha Efeso.
