2 Corinto 9:1-15
9 Mahitungod han pagbulig ha mga baraan, diri na kinahanglan nga magsurat pa ako ha iyo,
2 kay maaram ako han iyo pagin disidido nga akon iginhahambog ha mga taga-Macedonia, kay nagsiring ako nga an Acaya usa ka tuig na nga andam, ngan an iyo pagin aktibo* nakaaghat ha kadam-an ha ira.
3 Pero ginpapakada ko ha iyo an kabugtoan, basi an amon paghambog mahitungod ha iyo diri magin waray pulos, kondi basi magin andam gud kamo, sugad la han akon ginsiring.
4 Kay kon diri, kon kumada ako upod an mga taga-Macedonia ngan makita nira nga diri kamo andam, diri la kamo an maaalohan, kondi pati kami, tungod han amon pagsarig ha iyo.
5 Salit naghunahuna ako nga kinahanglan aghaton an kabugtoan nga mag-una pagkada ha iyo ngan iandam nga daan an iyo iginsaad nga damu nga regalo, basi andam na ito sugad nga kinaburut-on nga regalo niyo ngan diri sugad hin ginpirit kamo.
6 Pero mahitungod hini, hiya nga nagsasabwag hin gutiay mag-aani liwat hin gutiay; ngan hiya nga nagsasabwag hin damu mag-aani liwat hin damu.
7 An kada tagsa maghatag uyon ha karuyag han iya kasingkasing, nga diri nagrireklamo o napipiritan, kay an Dios nahigugma ha malipayon nga nahatag.
8 Labot pa, mahihimo han Dios nga mahura kamo han iya diri-matupngan nga pagkabuotan basi pirme kamo masangkapan han ngatanan nga ginkikinahanglan, ngan mahura liwat kamo para ha tagsa nga maopay nga buhat.
9 (Sugad han nahisurat: “Damu an iya iginhahatag, nahatag hiya ha mga pobre, ngan an iya katadongan nagpapadayon ha waray kataposan.”
10 Hiya nga hura nga naghahatag hin binhi ha magsarabwag ngan hin tinapay basi may makaon maghahatag ha iyo hin binhi, ngan padadamuon niya ito basi may mahisabwag kamo, ngan padadamuon an mga bunga han iyo pagkamatadong.)
11 An Dios hura nga nagbibendisyon ha iyo basi magin mahinatagon kamo ha ngatanan nga paagi, ngan tungod hito napapagios an mga tawo nga magpasalamat ha Dios;
12 tungod kay ini nga pagbulig sugad nga serbisyo publiko diri la kay paghatag hin maopay han panginahanglan han mga baraan kondi basi magin hura liwat ha damu nga pagpasalamat ha Dios.
13 Gindadayaw nira an Dios tungod kay an iyo iginhahatag nga bulig nagpapamatuod nga mapinasakupon kamo ha iyo iginpapasamwak ha publiko nga maopay nga sumat mahitungod han Kristo, ngan tungod han iyo kinaburut-on nga kontribusyon para ha ira ngan ha ngatanan;
14 ngan pinaagi han pangamuyo para ha iyo iginpapakita nira an pagpalangga ha iyo tungod han diri-matupngan nga pagkabuotan han Dios ha iyo.
15 Pasalamatan naton an Dios tungod han iya maopay gud nga regalo nga waray bayad.
Mga footnote
^ O “debotado; madasigon.”
