2 Corinto 10:1-18
10 Ako, hi Pablo, nakikimalooy ha iyo pinaagi han pagkamalumo ngan pagkabuotan han Kristo, bisan kon ha iyo pagkita ubos ako kon kaatubang niyo pero prangka ako kon diri niyo kaatubang.
2 Naglalaom ako nga kon aada ako ha iyo, diri ako magin prangka ngan magsaway ha iba nga naghuhunahuna nga nagkikinabuhi kami ha kalibotanon* nga paagi.
3 Kay bisan kon nagkikinabuhi kami ha kalibotan, diri kami nakikig-away ha kalibotanon nga paagi.
4 Kay an amon mga armas ha pakig-away diri tikang ha kalibotan, kondi gamhanan ini nga mga armas nga hatag han Dios basi itumba an mga butang nga nakagamot hin marig-on.
5 Gintutumba namon an mga pangatadongan ngan an tagsa nga hitaas nga butang nga gintindog kontra ha kahibaro han Dios, ngan ginbibihag namon an tagsa nga hunahuna basi magin masinugtanon ito ha Kristo;
6 ngan andam kami pagsirot ha bisan hin-o nga diri-masinugtanon, katapos niyo mapamatud-an an iyo bug-os nga pagkamasinugtanon.
7 Ginhuhukman niyo an mga butang uyon ha iyo nakikita. Kon an bisan hin-o nasarig nga kan Kristo hiya, pamalandungon niya ini nga kamatuoran: kon kan Kristo hiya, kami liwat.
8 Kay bisan kon medyo magsobra an akon paghambog mahitungod han awtoridad nga iginhatag ha amon han Ginoo basi parig-unon kamo ngan diri paluyahon, diri ako maaalohan.
9 Ginsisiring ko ini kay diri ko karuyag maghatag hin impresyon nga ginhahadlok ko kamo pinaagi han akon mga surat.
10 Kay nasiring hira: “An iya mga surat suloran ngan mapwersa, kondi an iya presensya maluya ngan an iya ginyayakan waray pulos.”
11 Sadang hunahunaon hito nga tawo nga an amon ginsisiring ha amon mga surat kon waray kami dida, ito liwat an amon isisiring kon aada kami.
12 Kay diri kami nangangahas nga igpariho an amon kalugaringon ha iba o itanding an amon kalugaringon ha iba nga nagdadayaw ha ira kalugaringon. Kondi kon ira ginhuhukman an ira kalugaringon uyon ha ira mga suruklan ngan igintatanding an ira kalugaringon ha ira kalugaringon, waray hira pagsabot.
13 Ighahambog namon, diri an aadto ha gawas han mga tubtoban han igintoka ha amon, kondi an aada la ha sulod han teritoryo nga igintoka ha amon han Dios, upod na kamo hito.
14 Ha pagkamatuod, waray kami lumahos ha igintoka ha amon han kinada kami ha iyo, nga sugad hin diri kamo upod ha igintoka ha amon, kay kami an siyahan nga nagpahayag ha iyo han maopay nga sumat mahitungod han Kristo.
15 Diri namon iginhahambog an mga nabubuhat han iba nga aadto ha gawas han mga tubtoban han igintoka ha amon, pero naglalaom kami nga samtang nagtutubo an iyo pagtoo, mas apresyaron niyo an amon mga nahihimo ha amon teritoryo. Salit labaw pa hito an amon bubuhaton
16 ha pagpahayag han maopay nga sumat ha iba nga mga nasud diri la ha iyo, basi diri namon ighambog an ginbuhat na han iba ha ira teritoryo.
17 “Kondi an naghahambog, ighambog niya hi Jehova.”
18 Kay an gin-uuyonan diri an nagrirekomendar han iya kalugaringon, kondi an tawo nga iginrirekomendar ni Jehova.
Mga footnote
^ Ha literal, “unudnon.”
