1 Tesalonica 4:1-18
4 Ha kataposan, mga kabugtoan, sugad han iyo nakarawat nga instruksyon tikang ha amon kon paonan-o kamo sadang magkinabuhi basi lipayon an Dios (ha pagkamatuod ginbubuhat na niyo ito), naghahangyo ngan nakikimalooy kami ha iyo ha ngaran han Ginoo nga hi Jesus nga padayon nga buhaton niyo ito hin labaw pa.
2 Kay maaram kamo han mga instruksyon* nga iginhatag namon ha iyo tikang ha Ginoo nga hi Jesus.
3 Kaburut-on han Dios nga magin baraan kamo ngan maglikay ha imoralidad.*
4 An tagsa ha iyo sadang mahibaro pagkontrol han iya lawas* ha baraan ngan dungganon nga paagi,
5 diri ha hakugnon nga mga hingyap ha pakighilawas pariho han mga nasud nga diri nakilala ha Dios.
6 Waray bisan hin-o nga sadang magdaot ngan maghilabot ha mga katungod han iya bugto mahitungod hini, kay sisirotan ni Jehova an mga nagbubuhat hini ngatanan nga sala, sugad han amon iginsumat nga daan ha iyo ngan ginpamatud-an liwat namon hin maopay ha iyo.
7 Kay gintawag kita han Dios, diri basi magkinabuhi ha kahugawan, kondi ha pagkabaraan.
8 Salit an tawo nga nagbabalewaray nagpapakita hin pagbalewaray, diri ha tawo, kondi ha Dios nga nahatag ha iyo han iya baraan nga espiritu.
9 Pero mahitungod han minagburugto nga gugma, diri na kinahanglan nga magsurat pa kami ha iyo, kay gintutdoan na kamo han Dios nga maghigugmaay.
10 Ha pagkamatuod, ginbubuhat na niyo ito ha ngatanan nga kabugtoan ha bug-os nga Macedonia. Pero gin-aaghat namon kamo, mga kabugtoan, nga padayon nga buhaton niyo ito hin labaw pa.
11 Talinguhaa gud niyo nga magkinabuhi hin murayaw ngan diri magpinanlabot ha buruhaton han iba, ngan magtrabaho kamo pinaagi han iyo mga kamot, sugad la han amon igintutdo ha iyo;
12 basi makita han mga tawo ha gawas nga nagawi kamo hin desente ngan diri nagkikinahanglan hin bisan ano.
13 Dugang pa, mga kabugtoan, diri namon karuyag nga magin ignorante kamo mahitungod han mga nangangaturog ha kamatayon, basi diri kamo masubo sugad han iba nga waray paglaom.
14 Kon natoo kita nga hi Jesus namatay ngan ginbanhaw, natoo liwat kita nga an mga nangaturog ha kamatayon nga maunungon kan Jesus babanhawon han Dios basi makaupod ni Jesus.
15 Ini an amon iginsusumat ha iyo uyon ha pulong ni Jehova, nga kita nga buhi ha presensya han Ginoo diri gud mahiuuna ha mga nangaturog ha kamatayon,
16 kay an Ginoo mismo malusad tikang ha langit, ngan mababatian an iya pagsugo, an iya tingog sugad nga arkanghel, ngan an tunog han trumpeta han Dios; ngan an mga namatay nga kahiusa han Kristo amo an una nga babanhawon.
17 Katapos, kita nga mga buhi pa nga nanhibilin dadad-on ha mga dampog upod nira basi tapoon ha kahanginan an Ginoo; ngan katapos hito pirme na kita magigin kaupod han Ginoo.
18 Salit padayon nga liawa niyo an usa kag usa pinaagi hini nga mga pulong.
