1 Corinto 7:1-40
7 Mahitungod han mga butang nga iyo iginsurat, maopay nga an lalaki diri maglabot* hin babaye;
2 pero tungod kay kalyap an imoralidad, maopay nga an tagsa nga lalaki magkaada asawa, sugad man maopay nga an tagsa nga babaye magkaada bana.
3 Ihatag han bana an panginahanglan han iya asawa, ngan ihatag liwat han asawa an panginahanglan han iya bana.
4 An asawa waray awtoridad ha iya kalugaringon nga lawas, lugod an iya bana. Sugad man liwat, an bana waray awtoridad ha iya kalugaringon nga lawas, lugod an iya asawa.
5 Ayaw niyo pugngi an usa kag usa, labot la kon nagsabot kamo nga diri anay buhaton ito ha pipira ka panahon, basi magkaada kamo panahon ha pag-ampo, katapos mahimo na liwat niyo buhaton ito, basi diri kamo masulay ni Satanas tungod han iyo kawaray pagpugong ha kalugaringon.
6 Mahimo niyo buhaton an akon ginsiring, pero diri ini balaud.
7 Hingyap ko nga unta pariho ha akon an ngatanan nga tawo. Kondi an kada tagsa may kalugaringon nga regalo tikang ha Dios, an usa sugad hini, ngan an iba sugad hito.
8 Ginsisidngan ko an mga waray asawa ngan mga balo nga babaye, mas maopay nga magpabilin hira nga waray asawa pariho ha akon.
9 Pero kon waray hira pagpugong ha kalugaringon, mag-asawa na la hira, kay mas maopay pa nga mag-asawa kay ha masunog tungod han malaw-ay nga hingyap.
10 Naghahatag ako hin mga instruksyon ha mga inasaw-an, pero diri ini tikang ha akon kondi tikang ha Ginoo, nga diri bulagan han asawa an iya bana.
11 Pero kon bumulag hiya, magpabilin hiya nga waray asawa, o kon diri man, makighiuli hiya ha iya bana. Ngan diri bayaan han bana an iya asawa.
12 Kondi nasiring ako ha iba, oo ako, diri an Ginoo: Kon may bugto nga lalaki nga an asawa diri-tumuroo ngan naruruyag magpadayon pakig-upod ha iya, diri niya bayaan an iya asawa.
13 Ngan kon may babaye nga diri-tumuroo an bana ngan naruruyag magpadayon pakig-upod ha iya, diri niya bayaan an iya bana.
14 Kay an diri-tumuroo nga bana ginbabaraan tungod han iya relasyon ha iya asawa, ngan an diri-tumuroo nga asawa ginbabaraan tungod han iya relasyon ha iya tumuroo nga bana. Kay kon diri, an iyo mga anak magigin diri limpyo, pero yana mga baraan na hira.
15 Pero kon magdesisyon pagbulag an diri-tumuroo, pabay-i hiya nga bumulag. Ha sugad nga mga kahimtang diri obligado an tumuroo nga bana o asawa nga makig-upod ha iya. Pero gintagan kamo han Dios hin kamurayawan.
16 Kay sugad nga asawa, bangin man la matalwas mo an imo bana. O sugad nga bana, bangin man la matalwas mo an imo asawa.
17 Kondi, sugad nga hi Jehova an naghahatag hin bahín ha kada tagsa, magpabilin an kada tagsa ha kahimtang nga igintutugot han Dios. Salit iginhahatag ko ini nga instruksyon ha ngatanan nga kongregasyon.
18 May tawo ba nga turi na han gintawag hiya? Magpadayon hiya nga turi. May tawo ba nga diri pa turi han gintawag hiya? Magpadayon hiya nga diri-turi.
19 An importante amo an pagtuman han mga sugo han Dios, diri an pagin turi o pagin diri-turi.
20 Anoman an kahimtang han kada tagsa han gintawag hiya, magpabilin hiya nga sugad hito.
21 Uripon ka ba han pagtawaga ha imo? Ayaw kabaraka hito. Pero kon mahimo ka magkaada kagawasan, salingabota an oportunidad.
22 Kay bisan hin-o nga disipulo han Ginoo nga uripon han pagtawaga, gintagan na hin kagawasan han Ginoo. Ngan an tawo nga may kagawasan han gintawag, uripon han Kristo.
23 Ginpalit na kamo. Ayaw na kamo pagpauripon ha mga tawo.
24 Mga kabugtoan, anoman an kahimtang han kada tagsa han gintawag hiya, magpabilin hiya nga sugad hito ha atubangan han Dios.
25 Mahitungod han mga birhen,* waray ako sugo tikang ha Ginoo, pero naghahatag ako hin opinyon sugad nga matinumanon tungod han kalooy ha akon han Ginoo.
26 Salit ha akon paghunahuna, maopay gud kon an usa nga tawo magpadayon nga sugad, uyon ha presente nga kahimtang.
27 May asawa ka ba? Ayaw pakigbulag ha iya. Waray ka na ba asawa? Ayaw na pagbiling hin maarasawa.
28 Pero bisan kon mag-asawa ka, diri ka nakakasala. Ngan kon an usa nga birhen mag-asawa, diri hiya nakakasala. Kondi an mga mag-aasawa magkakaada kasakitan ha ira kinabuhi.* Pero karuyag ko nga makalikay kamo hito.
29 Mga kabugtoan, susumatan ko kamo nga halipot na an nabibilin nga panahon. Tikang yana, an mga may asawa magin pariho han mga waray asawa,
30 ngan an mga nagtatangis magin pariho han mga diri nagtatangis, ngan an nagkakalipay magin pariho han diri nagkakalipay, ngan an mga namamalit magin pariho han mga diri tag-iya han ira pinamalit,
31 ngan an mga nagamit han kalibotan magin pariho han mga diri nagamit hito hin bug-os, kay nagbabag-o an mga panhitabo ha kalibotan.
32 Karuyag ko gud nga diri kamo magkinabaraka. An lalaki nga waray asawa nababaraka para ha mga butang han Ginoo, kon paonan-o niya mapapalipay an Ginoo.
33 Kondi an lalaki nga inasaw-an nababaraka para ha mga butang han kalibotan, kon paonan-o niya mapapalipay an iya asawa,
34 ngan nababahin an iya atensyon. Sugad man, an babaye nga waray bana, ngan an birhen, nababaraka para ha mga butang han Ginoo, basi magin baraan hiya ha iya lawas ngan ha iya espiritu. Pero an babaye nga inasaw-an nababaraka para ha mga butang han kalibotan, kon paonan-o niya mapapalipay an iya bana.
35 Kondi ginsisidngan ko kamo hini para ha iyo kaopayan, diri basi pugngan* kamo, pero basi aghaton kamo nga buhaton an maopay ngan basi waray makaulang han iyo padayon nga debosyon ha Ginoo.
36 Kon inaabat han usa nga birhen pa nga diri hiya makakapugong han iya seksuwal nga mga hingyap, kon lahos na hiya ha pagkabatan-on, ini an angay mahitabo: buhaton niya an iya karuyag; diri hiya nakakasala. Pabay-i nga mag-asawa hira.
37 Pero kon determinado an bisan hin-o ngan diri hiya naabat nga nanginginahanglan hiya hini, ngan kon kontrolado niya an iya kalugaringon ngan marig-on gud an iya desisyon nga diri mag-asawa,* maopay an iya ginhihimo.
38 Sugad man, maopay an nag-aasawa, pero mas maopay an diri nag-aasawa.
39 An asawa sugad hin nakagapos samtang buhi an iya bana. Pero kon an iya bana kumaturog ha kamatayon, puydi hiya mag-asawa han iya karuyag, pero ha sumurunod la han Ginoo.
40 Kondi ha akon opinyon, mas malipayon hiya kon diri hiya mag-asawa utro, ngan ha akon paghunahuna sigurado ako nga may espiritu liwat ako han Dios.
Mga footnote
^ Karuyag sidngon, makigsekso.
^ O “an mga waray pa mag-asawa.”
^ Ha literal, “kasakitan ha unod.”
^ O “higtan.”
^ O “magpadayon nga birhen.”
