1 Corinto 16:1-24
16 Mahitungod han pangulekta para ha mga baraan, mahimo niyo sundon an akon mga instruksyon ha mga kongregasyon ha Galacia.
2 Ha primero nga adlaw han kada semana maglaín an tagsa ha iyo uyon ha iyo maaakos, basi waray na pangulekta pag-abot ko.
3 Pero pagkada ko, an matataporan nga kalalakin-an nga iyo gin-unabi ha iyo mga surat susugoon ko nga dad-on ngadto ha Jerusalem an iyo kinaburut-on nga regalo.
4 Pero kon mas maopay nga kumadto liwat ako, ig-uupod ko hira ngadto.
5 Makada ako ha iyo kon tikang na ako ha Macedonia, kay maagi ako ha Macedonia;
6 ngan bangin mag-ihaiha ako o magpalabay pa ngani han kathagkot dida ha iyo, basi updan ako niyo hin pipira ka distansya pagtikadto ko ha akon kakadtoan.
7 Kay diri ko karuyag makigkita ha iyo yana hin madaliay la, kay karuyag ko mag-ihaiha dida ha iyo kon itutugot ni Jehova.
8 Pero magpapabilin ako didi ha Efeso tubtob ha piyesta han Pentekostes;
9 kay gin-abrihan ha akon an daku nga purtahan ngadto ha buruhaton, pero damu an nakontra.
10 Kondi kon umabot hi Timoteo, siguroha niyo nga waray hiya kahadlokan samtang kaupod niyo, kay nagbubuhat hiya han buruhaton ni Jehova pariho ha akon.
11 Salit waray bisan hin-o nga magminos ha iya. Mamurayawon nga updi niyo hiya hin pipira ka distansya basi makakadi hiya ha akon, kay ginhuhulat ko hiya sugad man han kabugtoan.
12 Mahitungod kan Apolos nga aton bugto, ginhinangyo ko gud hiya nga kumada ha iyo upod han kabugtoan, pero waray pa hiya plano nga kumada yana; makada hiya kon may higayon na hiya.
13 Padayon kamo nga magmata, magmarig-on ha pagtoo, magmaisugon sugad hin kalalakin-an, ngan magmakusog.
14 Buhata nga may gugma an ngatanan niyo nga buruhaton.
15 Ginsasagdonan ko kamo mga kabugtoan: Maaram kamo nga an mga sulod-balay ni Estefanas amo an una nga mga bunga ha Acaya ngan debotado nga nagserbi hira ha mga baraan.
16 Hinaot padayon nga magpasakop liwat kamo ha sugad nga mga tawo ngan ha ngatanan nga nakooperar ngan maduruto nga nagbubuhat.
17 Pero bisan kon waray kamo didi, nalilipay ako ha presensya nira Estefanas, Fortunato, ngan Acaico.
18 Kay napaparig-on nira ako pati kamo. Salit apresyara niyo an sugad nga kalalakin-an.
19 Nangungumusta ha iyo an mga kongregasyon ha Asia. Hira Aquila ngan Prisca sugad man an kongregasyon nga nagkakatirok ha ira balay kinasingkasing nga nangungumusta ha iyo sugad nga mga sumurunod han Ginoo.
20 Ginkukumusta kamo han ngatanan nga kabugtoan. Pagkumustahay kamo pinaagi han minagburugto nga harok.
21 Ako, hi Pablo, ako mismo an nagsusurat hini nga pangumusta.
22 Kon may bisan hin-o nga waray gugma ha Ginoo, angay hiya hukman. O amon Ginoo, kumadi ka!
23 Makarawat unta niyo an diri-matupngan nga pagkabuotan han Ginoo nga hi Jesus.
24 An akon gugma makarawat unta niyo ngatanan nga kahiusa ni Kristo Jesus.
