Oo, kay karuyag han Dios nga an iya katawohan magkatirok para ha pagsingba. An Biblia nasiring: “Tagdon naton an usa kag usa basi mag-aghat ha pagpakita hin gugma ngan mag-opay nga mga buhat, nga diri ginpapabay-an an aton pagkatirok.”—Hebreo 10:24, 25.

Iginpakita ni Jesus nga an iya mga sumurunod magpuporma hin organisado nga grupo han nagsiring hiya ha ira: “Pinaagi hini an ngatanan mahibabaro nga mga disipulo ko kamo—kon nahigugma kamo ha usa kag usa.” (Juan 13:35) Sugad nga usa han nangunguna nga paagi ha pagpakita hini nga gugma, an mga disipulo han Kristo makikig-upod ha ira mga igkasi-tumuroo. Oorganisaron hira sugad nga mga kongregasyon nga regular nga nagkakatirok para ha pagsingba. (1 Corinto 16:19) Hira ngatanan magigin bahin han bug-os-kalibotan nga pagminagburugto.—1 Pedro 2:17.

Labaw pa an ginkikinahanglan kay ha pagin bahin la hin usa nga relihiyon

Bisan kon iginpapakita han Biblia nga kinahanglan magkatirok an mga tawo basi singbahon an Dios, diri ito nagtututdo nga mapapalipay han usa an Dios pinaagi la ha pagin membro hin relihiyon. Basi uyonan han Dios, an relihiyon han usa nga tawo kinahanglan makaapekto ha iya adlaw-adlaw nga pagkinabuhi. Pananglitan, an Biblia nasiring: “An relihiyon nga limpyo ngan waray hugaw ha pagkita han aton Dios ngan Amay amo ini: an pagmangno ha mga ilo ngan mga balo nga babaye ha ira kasakitan, ngan an pagtipig ha kalugaringon nga waray buring tikang ha kalibotan.”—Santiago 1:27, footnote.