Natural la nga magpakiana kita kon kay ano nga an mga tawo namamatay, labi na kon namatayan kita hin hinigugma. An Biblia nasiring: “An sugod nga nagriresulta hin kamatayon amo an sala.”​—1 Corinto 15:56.

Kay ano nga an ngatanan nga tawo nakakasala ngan namamatay?

 An siyahan nga mga tawo, hira Adan ngan Eva, namatay kay nakasala hira ha Dios. (Genesis 3:17-19) Kamatayon an nagin resulta han ira pagrebelde han Dios, kay hiya an “gintitikangan han kinabuhi.”​—Salmo 36:9; Genesis 2:17.

 Naipasa ni Adan an mga epekto han sala ha ngatanan niya nga katulinan. An Biblia nasiring: “Pinaagi han usa nga tawo an sala sinulod ha kalibotan ngan an kamatayon pinaagi han sala, tungod hito an kamatayon dinangat ha ngatanan nga tawo kay hira ngatanan nakasala.” (Roma 5:12) An ngatanan nga tawo namamatay kay hira ngatanan nakakasala.​—Roma 3:23.

Kon paonan-o wawad-on an kamatayon

 An Dios nagsasaad nga “iya lalamuyon an kamatayon ha kadayonan.” (Isaias 25:8) Basi mawara an kamatayon, kinahanglan wad-on niya an hinungdan hito, nga amo an sala. Bubuhaton ito han Dios pinaagi kan Jesu-Kristo, nga “nagkukuha han sala han kalibotan.”​—Juan 1:29; 1 Juan 1:7.