•  An dapat mo mahibaroan

•  An puydi mo buhaton

•  An ginsisiring han iba nga batan-on

•   An ngatanan nga klase hin relasyon nagkakaproblema. Tungod kay diri kita perpekto, an imo maopay nga sangkay—bisan adton imo best friend—bangin may buhaton o iyakan nga nakasakit ha imo. Syempre, diri ka liwat perpekto. Bangin ngani may mahinumdoman ka nga panahon nga nakasakit ka liwat ha iba.—Santiago 3:2.

•   Ha Internet, mas masayon ka masakitan tungod ha imo nakikita. Pananglitan, hi David nga usa nga tin-edyer nagsiring: “Kon online ka ngan nakita mo an mga piktyur han imo sangkay nga aada ha gathering, bangin mahipausa ka kon kay ano nga waray ka imbitara. Posible abaton mo nga gintraydoran ka ngan masubo.”

•   Puydi mo maatubang an problema.

 Usisaha an imo kalugaringon. An Biblia nasiring: “Ayaw pagdagmit ha pagkasina, kay an kasina amo an tigaman han usa nga lurong.”—Eclesiastes 7:9, footnote.

 “Usahay, nahuhunahuna mo nga diri man ngay-an sugad kaseryoso an butang nga nakapasakit ha imo.”—Alyssa.

 Hunahunaa ini: May tendensya ka ba nga magin sobra ka sensitibo? Puydi mo ba palabyon an kaluyahan han iba?—Eclesiastes 7:21, 22.

 Hunahunaa an mga benepisyo han pagpasaylo. An Biblia nasiring: “Nakakapatahom . . . an pagpalabay hin sayop.”—Proberbios 19:11.

 “Bisan kon may-ada ka hinungdan nga magreklamo, mas maopay nga magpasaylo. Karuyag sidngon, diri mo na ipapahinumdom pirme ha imo sangkay an sala nga iya nahimo ngan diri na niya kinahanglan nga pauroutro nga mangaro hin pasaylo. Kon nagpasaylo ka na, kalimti na ito.”—Mallory.

 Hunahunaa ini: Sugad gud ba kaseryoso an iya nahimo? Puydi mo ba hiya pasayloon basi magkaada kamurayawan?—Colosas 3:13.

 Hunahunaa an imo sangkay. An Biblia nasiring: ‘Panginanoa diri la an iyo kalugaringon nga kaopayan, kondi pati liwat an kaopayan han iba.’—Filipos 2:4.

 “Kon hinigugma ngan ginrirespeto mo an imo sangkay, karuyag mo sulbaron an iyo mga problema kay importante para ha imo an iyo pagkamagsangkay. Nangalimbasog ka nga tipigan ito ngan diri mo karuyag nga madaot ito.”—Nicole.

 Hunahunaa ini: Posible ba nga may maopay hiya nga rason kon kay ano nga nahimo niya ito?—Filipos 2:3.

 An punto: Kon maaram ka han hihimoon kon may nakasakit ha imo, daku an maibubulig hito ha imo kon magin adulto ka na. Tikangi na yana an paghibaro hito.