Damu nga kalsada, tulay, ngan power station ha pipira nga lugar han Ukraine an nabungkag o daku gud an ruba tungod han agsob nga pambomba. Bisan pa hito, an aton kabugtoan waray umundang pag-atender ha mga katirok ha kongregasyon ngan pakigbahin ha iba pa nga teokratiko nga mga buruhaton bisan kon agsob mawad-an hin koryente.

Hira Anastasia ngan Debora, nga mga payunir ha Kyiv, nagsiring nga kada adlaw mga 12 ka oras nga waray hira koryente. Gintsa-charge nira an ira mga gadyet kon may-ada koryente ngan nagamit hira hin cellular data basi tumambong ha mga katirok. Kaurogan na nga nawawara an koneksyon han Internet kon tapos na an katirok.

An usa pa nga problema kon waray koryente amo an mahagkot nga panahon. May mga kabugtoan nga usahay nagamit hin generator basi magkaada koryente ngan gumana an ira mga heater. An pipira nakadto ha ira mga paryente nga may mga heater. An iba naman gin-iilob na la an hagkot. Maopay na la kay damu nga kabugtoan an may mga balay o apartment nga may mga heater nga ginagamitan hin gas, salit nagana an ira mga heater bisan kon waray koryente.

Hi Iryna, nga payunir ha Ivano-Frankivsk, nagpabilin nga positibo an disposisyon. “Nagdesisyon ako nga diri paghinunahunaon an mga butang nga diri ko kontrolado,” siring niya. “Salit nagpokus ako ha kon ano la an akon mahihimo ha usa ka oras. Ginhuhunahuna ko kon ano an puydi ko buhaton kon waray koryente ngan ginsisiguro nga naka-download an akon ginkikinahanglan nga mga publikasyon.”

Bisan kon an aton kabugtoan ha Ukraine naatubang hin damu nga problema, busy hira ha pag-alagad kan Jehova. Nasarig kita nga padayon nga bibendisyonan niya an ira mga pangalimbasog ha “pagbuhat han maopay.”—Galacia 6:9.

Tubtob han Disyembre 6, 2022, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa tungod kay makuri an komunikasyon ha ngatanan nga rehiyon han nasud.

• 47 nga magwarali an namatay

• 97 nga magwarali an nasamaran

• 11,537 nga mawarali an nag-ebakwit ha pagkayana

• 590 nga balay an nabungkag

• 645 nga balay an daku an ruba

• 1,722 nga balay an gutiay la an ruba

• 7 nga Kingdom Hall an nabungkag

• 19 nga Kingdom Hall an daku an ruba

• 68 nga Kingdom Hall an gutiay la an ruba

• 27 nga Disaster Relief Committee (DRC) an nanginginano ha kabugtoan ha Ukraine

• 54,212 nga indibiduwal an direkta nga ginbuligan han mga DRC basi makabiling hin mas talwas nga urukyan

• 26,811 nga magwarali an pinalagiw ha iba nga mga nasud ngan ginbubuligan han kabugtoan