Aunaa, aunaa naꞌapainim nii imiꞌi baara mainhaabatkau, aunaꞌu nii ykaꞌawaudkau uu bauran imiꞌi baara tumkau ywadayn nii. Tuminkery Paradan tuminhapkidian, Tuminkery tumini imiꞌi baara pidiannau maxaapkiz nii.

•   “Taakary nii kaimenainhau pidiannau at imiꞌi baara in idiway nii naꞌik karikeunanyꞌu nii inmaxaapan ybaaraꞌa.” — Psalm (Salmo) 37:29.

•   “[Tuminkery] sakadan dun patuman imiꞌi baara, ytum kaimenaimen, aunaa naꞌapainim nii imiꞌi baara suꞌutkau pawiiz ik.” — Psalm (Salmo) 104:5.

•   “Karikeunanyꞌu nii imiꞌi baara naꞌan.” — Ecclesiastes (Eclesiastes) 1:4.

•   “Tumaꞌuraz imiꞌi baara, ytumanyz kaimenaimen, . . . Aunaa ytumanyz madiweitpaka, mazan ytuman imiꞌi baara pidian maxaap kiz niꞌu.” — Isaiah (Isaías) 45:18.

 Aunaꞌu nii Tuminkery taapadan pidiannau patakaꞌyan ipei daynyydaꞌy imiꞌi baaraꞌa, inkaniriben idiaꞌan wyn, ydaryꞌu mizaataakary idiaꞌan uu bauran aimeakan idiaꞌan. Yxaꞌapanym kayꞌan, Tuminkery “mainhaabatan nii pidiannau patakaꞌytinhawyz imiꞌi baara”. (Revelation [Apocalipse] 11:18) Naꞌapam nii Tuminkery xaꞌaptan?

 Tuminkery suꞌutan nii pidiannau naubunaitinpeinhawyz panaubunaitinpen ai, aunaꞌuraz intaapan kaimen imiꞌi baara, ymyydan nii bauran naubunai inwadayn nii kaimenaꞌuraz naubunai aukaz ii. Yryy wyryy Tuminkery Naubunaitinpen. (Daniel 2:44; Matthew [Mateus] 6:9, 10) Disu, Tuminkery dan, yryy kazuwaytipaꞌu Naubunaitinhapkizei aukaz ii. (Isaiah [Isaías] 9:6, 7) Disu maxaapankayzun dun imiꞌi baaraꞌa, yxaꞌapatnii ymanawyn kidiaꞌu aimeakan, yryy idiaꞌan, wa aichiap maꞌuzkaꞌu manawyn yryy, tyryy ymaxaad kidian maꞌuzkaꞌu awary. (Mark [Marcos] 4:35-41) Disu kazuwaytipan dunuꞌu naa imiꞌi baara, ytaapan nii kaimenaimen ipei imiꞌi baara, aunaꞌu nii ytaapadan ywichan manawyn. Ypaꞌinhadan nii ipei aimeakan imiꞌi baaraꞌa, ytanautin kiz kunaynymaꞌu amazada nii, naꞌap kutyaꞌu kawan pauribeibau dakutkariweiz Éden. — Matthew (Mateus) 19:28; Psalm (Salmo) 37:11.

 Aunaa. Pabiꞌi kid pidiannau kian naꞌap, yxaꞌapanym kayꞌan, panaꞌitiꞌu indiꞌitinpen 2 Peter (2 Pedro) 3:7 daꞌyan, ysaadinpen kian: ꞌAizii kaiꞌuraz aukaz naꞌik imiꞌi baara, diinheꞌitiꞌi ykaꞌawaudan nii tikez id kidiaz.ꞌ Pytykap diaytam aimeakan kaminkeꞌytaꞌu nii wa aichipan kaimenaimen wyryy saadinpeꞌu daꞌy:

1.   Tuminkery Paradan idiaꞌa, wyryy paradakary kid “aukaz”, “imiꞌi baara” naꞌik “tikez” kainhaꞌa pabiꞌinaak kidiaꞌu kadyz dayꞌatiꞌu inkiaꞌazun. Genesis (Gênesis) 11:1 kian: “Ipei imiꞌi baara pakawan ykaiweapan baydap paradakary.” Daꞌaa kaiweakau paradakary “imiꞌi baara” pidiannau dayꞌatiꞌu maxaapainhawyz imiꞌi baaraꞌa yryy dun.

2.   2 Peter (2 Pedro) 3:7 iaꞌii aidyan kanum dayꞌatiꞌu wyryy ykian aukaz, imiꞌi baara naꞌik tikez. Versículos 5 naꞌik 6 ykuwad yxaꞌapan nii naꞌap Noé kamuun dunuꞌu kawan. Yryy dun, amazada mainhaabatkau wyn id, mazan aunaa imiꞌi baara mainhaabatkau. Aunaa Tybaryꞌu Dazaaryy mainhaabatan man “imiꞌi baara”, mazan pidiannau dikeydainhau paꞌan. (Genesis [Gênesis] 6:11) Ymainhaabat kapam “aukaz”, mazan aunaa aukaz dayꞌatiꞌu manawyn man, mazan naubunaitinpeinhawyz dayꞌatiꞌu yryy dun. Ymainhaabatan ipei uinheinhawyz manawyn, mazan aunaa ymainhaabatan imiꞌi baara. Noé naꞌik yiribennau kazannaatkau ydaynaꞌan indiribeinhan imiꞌi baaraꞌa. — Genesis (Gênesis) 8:15-18.

 Kutyaꞌa naa Tuminkery kaiweeyznii wyn pamainhaabat kinha nii dikeydainhau, 2 Peter (2 Pedro) 3:7 kuwad “tikez” daꞌy, pamainhaabat kinha nii kuxan suu dikeydainhau, aunaa imiꞌi baara man. Tuminkery kian ytaan nii “paꞌinhaꞌu aukaz naꞌik paꞌinhaꞌu imiꞌi baara”, “naꞌii ipei pidiannau xaꞌapatinhan nii Tuminkery aipen kawan at”. (2 Peter [2 Pedro] 3:13) Wyryy “paꞌinhaꞌu imiꞌi baara” pidiannau dayꞌatiꞌu ykuwadan maxaapaꞌu niꞌu yryy dun. Inmaxaapan nii “paꞌinhaꞌu aukaz” waranyꞌy, daꞌaa ykuwadan paꞌinhaꞌu naubunaitinhapkary dayꞌatiꞌu. Wyryy Tuminkery Naubunaitinpenyz ytanautan nii ipei imiꞌi baara kunaynymaꞌu amazada nii, pidiannau maxaap kiz kaimen naꞌik kunaykii. — Revelation (Apocalipse) 21:1-4.