Oosuwa Kaalettiya Citay kumetta saꞌan deꞌiya Yihoowa Markkatussi kaaletuwa immiya ayyaanaaban kayma gidida amarida Kiristtaanetu citaa. Eta oosoy naaꞌꞌawu shaahettees:

•   Eti xuufetu, shiiqotunne Yihoowa Markkatu timirtte keettatu baggaara giigiya, Geeshsha Maxaafay denddo gidido timirtteta giigissiyo oosuwa kaalettoosona.—Luqaasa 12:42.

•   Eti Yihoowa Markkatimishiraachchuwa yootiyo oosuwa kaalettoosonanne asay ba dosan immiyo miishshaa waati maara goꞌettanaakko kuuyoosona.

 Oosuwa Kaalettiya Citay koyro xeetu layttan kumetta galchchaa maaddiyabaa kuuyida, ‘Yerusalaamen deꞌiya kiitettidaageetunne cimatu’ leemisuwa kaallees. (Oosuwa 15:2) He ammanettida attumaageetuugaadan, Oosuwa Kaalettiya Citaa yaratikka nu dirijjitiya kaalettiyageeta gidokkona. Eti Geeshshaa Maxaafaa kaaletuwa kaalloosona; qassi Xoossaa Yihooway galchchawu huuphe oottidi Yesuus Kiristtoosa sunttidoogaa ammanoosona.—1 Qoronttoosa 11:3; Efisoona 5:23.

 Oosuwa Kaalettiya Citaa yarati Kenez Kuka, Geji Filigila, Samuꞌel Herda, Jefri Jaksena, Jodi Jedela, Istiven Leta, Gerit Loosha, Jakob Ramfa, Mark Sanddersena, Devid Ispileenanne Jefri Windera. Eti Amarkkan, Niwu Yorken, Worwiken deꞌiya waanna biiruwan oottoosona.

 Oosuwa Kaalettiya Citan nu oosuwawu dumma dumma shaahuwa kaalliya usuppun kontteti deꞌoosona; qassi Oosuwa Kaalettiya Citaa yaray he konttetuppe issuwan woy hegaappe daruwan oottees.

•   Shiishshiyageetu Konttiya: Eti higgiyara gayttidabaa xomoosoosona, qassi meretay daafabaa gattiyo wode, ammanuwa gaasuwan yedetay gakkiyo wodenne keehi koshshiya harabay merettiyo wode Yihoowa Markkata maaddoosona.

•   Personel Konttiya: Beeteele keettaa asaa koshshiyaban maaddees.

•   Attamuwa Konttiya: Geeshsha Maxaafaa qofay deꞌiyo xuufeta attamissiyogaa, caanissiyogaa, qassi shiiquwa addaraashaa, xuufiya birshshiyo biiruwanne macara biiruwa keexxiyogaa xomoosees.

•   Haggaazo Konttiya: ‘Kawotettaa mishiraachchuwa’ yootiyo oosuwa xomoosees.—Maatiyosa 24:14.

•   Timirtte Konttiya: Galchchaa shiiqotun, timirtte keettatun, qassi cenggurssaaninne biiduwan giigiyabatun tamaariyo ayyaanaabaa qumaa giigissiyo oosuwa kaalettees.

•   Xuufiya Giigissiya Konttiya: Attamettidi kiyiya xuufiyaninne nu weyb saytiyan giigiya ayyaanaabaa qumaa, qassi birshshiyo oosuwa kaalettees.

 Hegaa bollikka, Oosuwa Kaalettiya Citay dirijjitiyawu koshshiyabaa tobbanawu saaminttan saaminttan shiiqees. He citaa yarati Geeshsha Maxaafay yootiyobaa he shiiquwan tobboosonanne Xoossaa geeshsha ayyaanaa kaaletuwa kaalloosona; qassi ubbay maayettidi kuuyoosona.—Oosuwa 15:25.

 Eti, Oosuwa Kaalettiya Citaa kontteta maaddiya ammanettida Kiristtaane ishantta. (1 Qoronttoosa 4:2) Eti banttawu deꞌiya oosuwa meeziyan Oosuwa Kaalettiya Citaa Kontteta maaddoosona; qassi he konttetu shiiquwa saaminttan saaminttan shiiqoosona. Eti kuuyennaba gidikkonne, zoroosonanne kuuyidobay oosuwan peꞌanaadan maaddoosona, qassi kuuyidobay ayfiya demissiyakkonne ubbatoo kaalloosona. Oosuwa Kaalettiya Citay, eti kumetta saꞌan deꞌiya nu ishantta xomoosanaadan kiittana, woy layttaa shiiquwan woykko Giiliyaade Timirtte Keettaappe anjjettiyo shiiquwan eti haasayaa haasayanaadan oottana danddayees.