ISSI ISSI ASAY GIYOOBAA: “Alamiyaa haariyay Xoossaa gidiyo gishshau, meretay daafabaa gattanaadan oottiyay a; hegaa gishshau, i meqettaa iita gidiyoogee erettidaagaa.”

GEESHSHA MAXAAFAY GIYOOBAA: “Ha mule sa7aikka xalahe halaqan haarettidoogaa eroos.” (1 Yohaannisa 5:19) Hegee ammananau metiyaabee? Ane hagaa qoppa: Seexaanay ha alamiyaa haariyaaba gidikko, asay aagaadan bana siiqanaadan, yaaretanaadaaninne yuushshi qoppennaadan oottees. Asay saˈaa qohiyaabaa oottiyoy aybissakko qonccissanau hegee maaddennee? Daro eranchati, saˈaa qohiyaabaa oottiyoogee meretay gattiyo daafabau gaaso gidana danddayiyoogaa, hegee yaa iitanaadan woy an daro asay qohettanaadan oottana danddayiyoogaa yootoosona.

Yaatin, Seexaanay wolqqaama qohuwaa gattanaadan Xoossay paqqadidoy aybissee? Ha oyshaa zaaruwaa eranau koyro asati, Addaameenne Hewaana Xoossau haarettennan ixxido wode hanidabaa erana koshshees. He wodeppe doommidi asaa naatuppe dariya baggay etaagaadan oottiis. Asay Xoossaayyo haarettennan ixxidoogaa gaasuwan, ha alamiyaa asaa Xoossaa morkkee Seexaanay haarees. Yesuusi Seexaanaa ‘ha saˈaa haariyaagaa’ giidoy hegaassa. (Yohaannisa 14:30) Seexaanay ha saˈaa merinau haaranee? Akkay haarenna!

Yihooway * sheneho giidi, Seexaanaa haaroy gattiyo metuwan tuggatiya asau qoppennan aggibayenna. Xoossay tuggatiya asau wozanappe qarettees. Leemisuwau, Israaˈeelatu bolli gakkida metuwaa xeelliyaagan Geeshsha Maxaafay, ‘Eta waaye ubban Xoossay waayettiis’ yaagees. (Isiyaasa 63:9) Xoossay ba maarotan, meqettaa iita gidida Seexaanaa haaruwaa mata wode xayssanau halchiis! Xoossay ba Naˈaa Yesuus Kiristtoosa xillotettaaninne suuretettan haariya, merinaa Kawo oottidi sunttiis.

HAGEE NENA MAADDIYO OGIYAA: Seexaanaa haaroy meretay gattiyo daafabay asaa naatu bolli gakkennaadan oottenna; shin Yesuusa haaroy hegaa malabay gakkennaadan oottana. Issitoo wolqqaama beetay denddido wode, Yesuusi ba erissiyo ashkkarata ashshiis. Geeshsha Maxaafay, “I . . . gotiyaa, ‘Co77u ga’ giidi abbaakka, ‘Woppu ga’ giis; goteekka co77u gin, ubbabaikka woppu giis” yaagees. Yaatin erissiyo ashkkarati, “Hagee laa harai atto, goteenne abbai azazettiyoogee oonee?” yaagidosona. (Marqqoosa 4:37-41) Hegee, Yesuusi Kawo gididi haariyo wode, azazettiya asaa naata ubbaa iitabaappe ashshanaagaa nuuni ammanettanaadan oottees.—Daaneela 7:13, 14.